Bann Leson ki Nou Kapav Aprann ar Profesi Zakob—2^em Parti

1. Ki nou pou examine dan sa lartik-la?

ZAKOB so bann garson ti otour li, ek zot ti pe ekout bien seki zot papa ti pe dir. Dan lartik avan, nou’nn trouve kouma Zakob ti dir Ribenn, Simeon, Levi, ek Zida bann kitsoz ki zot pa ti atann. Alor, sirman zot pe anvi kone ki kitsoz Zakob pou dir zot bann frer. Dan sa lartik-la, nou pou get bann leson ki nou kapav aprann ar seki Zakob ti dir Zabilon, Isakar, Dann, Gad, Aser, Neftali, Zozef, ek Binzamin.a

ZABILON

2. Explik benediksion ki Zabilon ti gagne ek kouma sa ti realize. (Zenez 49:13) (Get lankadre osi.)

² Lir Zenez 49:13. Zakob ti dir ki Zabilon so bann desandan ti pou viv pre ar lamer, dan lenor Later Promiz. Sa ti realize plis ki 200 an apre, kan tribi Zabilon ti gagn enn teritwar ki ti ant Lamer Galile ek Lamer Mediterane. Moiz ti dir sa profesi-la: “A Zabilon, to pou dan lazwa kan to pe vwayaze.” (Det. 33:18) Moiz kitfwa ti dir sa parski bann-la ti pe res ant sa de lamer-la, ek ki li ti pou pli fasil pou zot pou vwayaze ek al dan bann lezot landrwa pou fer biznes ar bann dimounn ki res laba. Nou pa vremem kone kifer Moiz ti dir sa. Selman, nou kone ki bann desandan Zabilon ti ena boukou rezon pou zot ere.

3. Ki kitsoz kapav ed nou pou nou kontant nou ar seki nou ena?

³ Ki leson nou aprann? Ninport kotsa nou reste ek dan ninport ki sitiasion nou ete, nou touletan ena bann rezon pou nou ere. Ek pou ki nou ere, nou bizin kontant nou ar seki nou ena. (Ps. 16:6; 24:5) Parfwa, olie ki nou apresie bann bon kitsoz ki nou ena, nou konsantre nou plis lor bann kitsoz ki nou pena ek sa rann nou malere. Alor, anou fer zefor pou konsantre nou lor bann bon kitsoz ki nou ena dan nou lavi.—Gal. 6:4.

ISAKAR

4. Explik benediksion ki Isakar ti gagne ek kouma sa ti realize. (Zenez 49:14, 15) (Get lankadre osi.)

⁴ Lir Zenez 49:14, 15. Zakob ti felisit Isakar parski li ti travay bien dir. Li ti dir ki Isakar ti koumadir enn zanimo bien for ki ti sarye bann kitsoz bien lour. Zakob ti osi dir Isakar ki li ti pou gagn enn teritwar kot li ti pou viv bien. Seki Zakob ti dir ti realize parski bann desandan Isakar ti gagn enn teritwar pre ar Larivier Zourdin, ek so later ti bien fertil. (Zozwe 19:22) Tribi Isakar ti travay dir pou okip later-la, ek zot ti osi fer zefor pou ed lezot. (1 Ler. 4:7, 17) Par exanp, kan Ziz Barak ek Profetes Debora ti demann bann Izraelit enn koudme pou lager kont Sisera, tribi Isakar ti enn parmi bann tribi ki ti al ede, ek zot ti pre pou lager dan bann lezot lokazion osi.—Ziz 5:15

5. Kifer nou bizin fer zefor pou travay dir?

⁵ Ki leson nou aprann? Parey kouma Zeova ti apresie tribi Isakar parski bann-la ti travay bien dir, Zeova bien kontan kan nou travay dir pou Li. (Ekle. 2:24) Par exanp, ena bann frer ki travay bien dir pou pran swin lasanble. (1 Tim. 3:1) Azordi, sa bann frer-la pena pou al lager. Selman, zot fer boukou zefor pou protez zot bann frer ek ser kont bann kitsoz ki kapav gat zot lamitie ar Zeova. (1 Kor. 5:1, 5; Zid 17-23) Zot fer boukou zefor osi pou prepar ek pou fer bann diskour ki pou ankouraz bann frer ek ser.—1 Tim. 5:17.

DANN

6. Ki responsabilite tribi Dann ti gagne? (Zenez 49:17, 18) (Get lankadre osi.)

⁶ Lir Zenez 49:17, 18. Zakob ti dir ki Dann ti kouma enn serpan ki atak bann zanimo ki pli gran ki li, kouma par exanp, enn seval ki servi dan bann lager. Tribi Dann ti ena boukou kouraz, ek zot ti pre pou atak bann lennmi pep Izrael. Pandan ki bann Izraelit ti pe marse pou al dan Later Promiz, tribi Dann ti pe mars “par deryer pou protez” zot. (Nonb 10:25) Mem si bann lezot tribi pa ti trouv tou seki tribi Dann ti fer par deryer, tribi Dann ti ena enn responsabilite bien inportan.

7. Kan nou gagn enn responsabilite, ki kitsoz fode pa nou bliye?

⁷ Ki leson nou aprann? Eski to’nn deza gagn enn responsabilite ek to panse ki personn pa remark seki to fer? Kitfwa to’nn donn enn koudme pou netway ek pou fer mintenans Lasal Renion, to’nn port twa volonter pou travay pandan enn lasanble, ouswa to’nn fer bann lezot kitsoz. Nou vremem felisit twa pou sa! Pa bliye ki Zeova remark tou seki to fer pou Li, ek ki sa ena valer pou Li. Zeova sirtou apresie ki to servi Li, pa pou ki lezot felisit twa, me parski to vremem kontan Li.—Mat. 6:1-4.

GAD

8. Kifer li ti fasil pou ki bann lennmi Izrael atak tribi Gad? (Zenez 49:19) (Get lankadre osi.)

⁸ Lir Zenez 49:19. Zakob ti dir ki bann bandi ti pou atak Gad. Plis ki 200 an plitar, bann desandan Gad ti gagn enn teritwar ki ti trouv dan les Larivier Zourdin, enn teritwar ki ti antoure ar bann lennmi. Alor, li ti fasil pou ki zot bann lennmi atak zot. Selman, tribi Gad ti anvi res laba mem, parski ti ena boukou karo laba pou zot nouri zot bann zanimo. (Nonb 32:1, 5) Bann desandan Gad ti ena boukou kouraz. Zot ti osi ena konfians ki Zeova ti pou ed zot pou atak zot bann lennmi ek defann teritwar ki Li ti donn zot. Pandan plizir lane, zot ti mem avoy bann solda pou ed bann lezot tribi pou gagn bann teritwar ki ti lot kote Larivier Zourdin. (Nonb 32:16-19) Kan sa bann solda-la ti al lager, zot ti sir ki Zeova ti pou protez zot madam ek zot bann zanfan. Zeova ti beni zot pou zot kouraz ek pou sakrifis ki zot ti fer.—Zozwe 22:1-4.

9. Kan nou fer Zeova konfians, kouma sa ena enn lefe lor bann desizion ki nou pran?

⁹ Ki leson nou aprann? Pou ki nou kapav servi Zeova kan nou pe fer fas ar bann sitiasion difisil, nou bizin kontign fer Li konfians. (Ps. 37:3) Azordi, boukou frer ek ser montre ki zot ena konfians dan Zeova kan zot fer bann sakrifis pou al ede lor bann santie konstriksion, kan zot al servi kot bizin plis proklamater, ouswa kan zot fer bann lezot kitsoz pou lorganizasion Zeova. Zot fer sa parski zot ena konfians ki Zeova pou touletan pran zot swin.—Ps. 23:1.

ASER

10. Ki kitsoz tribi Aser pa ti fer? (Zenez 49:20) (Get lankadre osi.)

¹⁰ Lir Zenez 49:20. Zakob ti dir ki tribi Aser ti pou vinn bien ris, ek se seki ti arive. Tribi Aser ti gagn bann later ki ti bien fertil. (Det. 33:24) Zot teritwar ti pre ar Lamer Mediterane, ek li ti osi pre ar lepor Sidon, ki trouv dan Fenisi. Selman, tribi Aser pa ti pous bann Kananeen depi pei-la. (Ziz 1:31, 32) Ek kitfwa tribi Aser ti koumans negliz zot ladorasion pou Zeova parski zot ti ris ek osi akoz move linflians ki bann Kananeen ti ena lor zot. Par exanp, kan Ziz Barak ti demann bann Izraelit pou donn zot enn koudme pou al lager kont larme Kananeen, tribi Aser pa ti port li volonter pou al ede. Alor, zot pa ti trouv bann kitsoz extraordiner ki Zeova ti fer pou ed bann Izraelit pou gagn laviktwar “pre ar bann delo Megido.” (Ziz 5:19-21) Sirman tribi Aser ti bien onte kan zot ti tann Barak ek Debora sant sante laviktwar, kot ti ena sa bann parol-la: “Aser ti pe asize bor lamer ek li pa ti pe fer nanye.”—Ziz 5:17.

11. Kifer fode pa ki nou les kas vinn kitsoz ki pli inportan dan nou lavi?

¹¹ Ki leson nou aprann? Nou anvi fer nou best pou Zeova. Nou bizin fer bien atansion ki nou pa vinn parey kouma bann dimounn dan lemond, ki panse ki kas ek bann kitsoz ki nou kapav aste ar kas, samem kitsoz pli inportan dan lavi. (Prov. 18:11) Mem si nou bizin kas pou viv, fode pa nou panse ki gagn boukou kas li pli inportan ki servi Zeova. (Ekle. 7:12; Ebre 13:5) Fode pa nou gaspiy nou letan ek nou lenerzi pou esey gagn bann kitsoz ki nou pa vremem bizin. Me plito, nou bizin fer tou seki nou kapav pou servi Zeova. Anplis, si nou res fidel, Zeova pou rekonpans nou ek Li pou donn nou enn zoli lavi dan lemond nouvo.—Ps. 4:8.

NEFTALI

12. Kouma bann parol ki Zakob ti dir Neftali ti realize? (Zenez 49:21) (Get lankadre osi.)

¹² Lir Zenez 49:21. Zakob ti dir ki Neftali ti pou dir “bann zoli parol.” Kan Zakob ti dir sa, kitfwa li ti pe koz lor fason ki Zezi ti pou koze kan li ti pou prese. Zezi ti res boukou letan dan lavil Kafarnaom, ki ti trouv dan teritwar Neftali. Akoz sa, ti apel lavil Kafarnaom, “lavil kot [Zezi] ti reste.” (Mat. 4:13; 9:1; Zan 7:46) Izai ti predir ki Zezi ti pou kouma “enn gran lalimier” pou bann dimounn ki res dan teritwar Zabilon ek dan teritwar Neftali. (Iza. 9:1, 2) Gras-a so lansegnman, Zezi ti “vre lalimier ki ekler tou sort kalite dimounn.”—Zan 1:9.

13. Kouma nou kapav dir bann parol ki fer Zeova plezir?

¹³ Ki leson nou aprann? Bann parol ki nou dir ek fason ki nou koze, bien inportan pou Zeova. Alor, kouma nou kapav dir “bann zoli parol” ki fer Zeova plezir? Premierman, se kan nou dir laverite. (Ps. 15:1, 2) Nou bizin osi dir bann kitsoz ki pou ankouraz lezot. Par exanp, nou bizin felisit lezot kan zot fer bann bon kitsoz. Ek nou bizin osi pa kritik lezot ouswa plengne. (Efe. 4:29) Nou kapav osi fixe lobzektif pou amelior fason ki nou koumans bann konversasion avek bann dimounn, parski sa pou permet nou pou koz lor Zeova.

ZOZEF

14. Kouma profesi konsernan Zozef ti realize? (Zenez 49:22, 26) (Get lankadre osi.)

¹⁴ Lir Zenez 49:22, 26. Zakob ti fier so garson Zozef. Zeova ti swazir li parmi “so bann frer” ek ti servi li dan enn fason spesial. Zakob ti apel li “brans enn pie ki donn bann frwi.” Zakob ti sa pie-la, ek Zozef ti enn brans sa pie-la. Zozef ti premie-ne Rasel, ek Rasel ti madam ki Zakob ti bien kontan. Zakob ti dir ki Zozef ti pou gagn de par dan so bann dibien, enn leritaz ki Ribenn, premie-ne Lea, ti sipoze gagne. (Zen. 48:5, 6; 1 Kro. 5:1, 2) Sa profesi-la ti realize kan de garson Zozef, Efraim ek Manase, ti vinn de tribi dan Izrael, ek toule-de tribi ti gagn zot prop teritwar.—Zen. 49:25; Zozwe 14:4.

15. Kouma Zozef ti reazir kan ti tret li dan enn fason inzis?

¹⁵ Zakob ti koz lor bann dimounn ki “ti tir kout fles lor [Zozef] ek ti kontign ena laenn pou li.” (Zen. 49:23) Sa bann dimounn-la ti bann frer Zozef. Zot ti bien zalou li, zot ti tret li dan enn fason inzis, ek li ti soufer akoz bann move kitsoz ki zot ti fer li. Selman, Zozef pa ti ena laenn pou so bann frer, ek li pa ti met tor lor Zeova pou bann kitsoz ki ti ariv li. Me plito, kouma Zakob ti dir: “[Zozef] ti pe tini bien so lark. So lame ti res for ek ti tir kout fles vit.” (Zen. 49:24) Kan li ti gagn bann leprev, Zozef ti kont lor Zeova. Zozef pa ti zis pardonn so bann frer, me li ti osi tret zot avek zantiyes. (Zen. 47:11, 12) Zozef ti les bann leprev ki li ti gagne fer li vinn enn pli bon dimounn. (Ps. 105:17-19) Ek akoz sa, Zeova ti servi Zozef pou fer bann kitsoz extraordiner.

16. Kan nou gagn bann leprev, kouma lexanp Zozef kapav ed nou?

¹⁶ Ki leson nou aprann? Nou bizin pa les bann leprev fer nou perdi nou lamour pou Zeova ek pou nou bann frer ek ser. Pa bliye ki Zeova kapav form nou kan nou kontign servi Li dan bann sitiasion difisil. (Ebre 12:7, not.) Li kapav ansegn nou pou imit so bann zoli kalite pli bien, kouma par exanp so mizerikord ek so pardon. (Ebre 12:11) Nou kapav sir ki si nou andire, Zeova pou rekonpans nou parey kouma Li’nn rekonpans Zozef.

BINZAMIN

17. Kouma profesi konsernan Binzamin ti realize? (Zenez 49:27) (Get lankadre osi.)

¹⁷ Lir Zenez 49:27. Zakob ti dir ki tribi Binzamin ti pou “parey kouma enn loulou” ek ki zot ti pou bann gran gerye. (Ziz 20:15, 16; 1 Kro. 12:2) Lexpresion “gramatin” montre ki dan koumansman regn bann lerwa dan Izrael, se enn desandan tribi Binzamin, setadir Sail, ki ti vinn premie lerwa dan Izrael. Ek avek kouraz, li ti lager kont bann Filistin. (1 Sam. 9:15-17, 21) Ek lexpresion “aswar,” konsern seki Larenn Ester ek Mardose ti fer pou sov bann Izraelit dan lame bann Pers. Toule-de ti sorti dan tribi Binzamin.—Est. 2:5-7; 8:3; 10:3.

18. Parey kouma tribi Binzamin, kouma nou kapav montre ki nou fidel anver Zeova?

¹⁸ Ki leson nou aprann? Tribi Binzamin sirman ti kontan kan Sail ti vinn lerwa, parski Sail ti form parti dan tribi Binzamin. Me apre, Zeova ti fer David vinn lerwa, ek David ti form parti dan tribi Zida. Kanmem sa, tribi Binzamin ti soutenir David. (2 Sam. 3:17-19) Bann dizenn lane apre, kan dis tribi ti rebel kont tribi Zida, tribi Binzamin ti res fidel ar tribi Zida ek ar lerwa ki ti sorti dan fami David. (1 Ler. 11:31, 32; 12:19, 21) Parey kouma tribi Binzamin, nou osi nou kapav montre ki nou fidel anver Zeova kan nou res fidel ar bann dimounn ki Zeova inn swazir pou diriz so pep azordi.—1 Tes. 5:12.

19. Ki bienfe nou kapav gagne ar profesi Zakob?

¹⁹ Nou kapav gagn bann bienfe gras-a profesi Zakob. Seki nou’nn aprann ar profesi Zakob ek fason ki sa profesi-la inn realize, kapav ogmant nou konfians dan bann lezot profesi ki ena dan Labib. Ek kan nou reflesi lor bann benediksion ki Zakob so bann garson ti gagne, sa ed nou pou konpran pli bien kouma nou kapav fer Zeova plezir.