Eski Mo Bizin Aret Kondir?

SA FER boukou lane ki to kondir. To bien kontan roul to loto pou to al kot to anvi. Selman, to fami ek to bann kamarad trakase pou to sekirite ek zot panse ki to bizin aret kondir. Me to pa konpran kifer zot trakase.

Eski to dan sa sitiasion-la? Si wi, ki kitsoz kapav ed twa pou kone si to bizin aret kondir?

Dan sertin pei, kan enn sofer ariv enn sertenn laz, li bizin pas devan enn dokter pou li gagn permision pou kontign kondir. Bann Kretien ki res dan sa bann pei-la, zot obeir sa lalwa-la. (Rom. 13:1) Me mem si pena enn lalwa koumsa dan to pei, ena sertin kestion ki to kapav poz tomem pou to kone si to kapav kontign kondir.

EXAMINN FASON KI TO KONDIR

Dan Letazini, enn lorganizasion pou bann vie dimounn (National Institute on Aging) ankouraz bann vie dimounn pou poz zotmem sa bann kestion-la:

Eski mo gagn difikilte pou lir bann pano ki ena lor sime, ouswa eski mo gagn difikilte pou trouve aswar?
Eski mo pe gagn deplizanpli difikilte pou vir mo latet pou chek bann blind spot ek pou get dan retrovizer?
Eski mo gagn difikilte pou reazir vit, par exanp, eski mo ankor ena reflex pou tir mo lipie vit-vit lor akselerater pou pez frin?
Eski mo roul telman dousman ki mo blok sirkilasion?
Se dernie tan, eski mo’nn manke fer bann aksidan, ouswa eski mo loto inn rey-reye parski souvan mo frot ar bann kitsoz ki ena lor semin?
Eski lapolis inn deza aret mwa akoz fason ki mo ti pe kondir?
Eski mo’nn deza kaskou lor volan?
Eski mo pran bann medsinn ki kapav afekte fason ki mo kondir?
Eski bann manb mo fami ouswa bann kamarad inn dir mwa ki zot trakase ar fason ki mo kondir?

Si to’nn reponn wi pou enn ouswa de parmi sa bann kestion-la, alor inn ler pou to fer bann sanzman. Par exanp, to kapav desid pou roul mwins, sirtou aswar. Kontign examinn regilierman fason ki to kondir. To kapav demann enn manb to fami ouswa enn kamarad seki li panse lor fason ki to kondir. To kapav osi pran de-trwa leson otoekol ek demann moniter-la bann konsey pou to kondir pli bien. Parkont, si to’nn reponn wi pou plizir kestion ki ena lao, li pli bon ki to aret kondir.a

KOUMA LABIB KAPAV ED TWA POU PRAN ENN BON DESIZION?

Kitfwa to trouv sa difisil pou aksepte ki to nepli enn bon sofer, ek kitfwa to pa dakor ki to bizin aret kondir. Alor, ki prinsip Labib kapav ed twa pou pran enn bon desizion? Anou get de prinsip.

Konn to bann limit. (Prov. 11:2) Lavieyes ena enn lefe lor nou lizie, nou zorey, nou bann misk, ek nou bann reflex. Par exanp, laplipar dimounn aret fer sertin spor kan zot ariv enn sertenn laz, parski zot kone ki zot ena plis sans pou bles zotmem. Li parey pou enn sofer ki konn so bann limit. Li konpran ki pou so prop sekirite, ariv enn moman li pou bizin aret kondir. (Prov. 22:3) Ek si lezot pe dir li ki zot trakase pou li, enn kikenn ki ena modesti pou ekout zot.—Konpar ar 2 Samiel 21:15-17.

Nou pa anvi met lavi personn an danze. (Det. 22:8) Si enn sofer pa roul bien, li kapav bles ouswa touy enn kikenn. Enn kikenn ki kontign kondir alor ki li nepli roul bien, li kapav met so lavi ouswa lavi lezot dimounn an danze. Ek si li fer enn aksidan ek ki enn kikenn mor akoz sa, li pou ena disan sa dimounn-la lor so latet.

Fode pa to panse ki lezot pou nepli respekte twa si to aret kondir. Zeova kontan twa parski to ena bann zoli kalite kouma modesti, limilite, ek to gagn traka lezot. Ek Li promet twa ki Li pou soutenir twa ek rekonfort twa. (Iza. 46:4) Zame Li pa pou abandonn twa. Alor, demann Li so led pou to gagn sazes ek pou to swiv bann prinsip Labib pou to deside si to bizin aret kondir.

Seki Lezot Kapav Fer

Kan bizin koz ar enn kikenn ki vie lor sa size-la, se sirtou bann manb lafami ki plis kapav fer sa. Ouswa, kitfwa to so kamarad ek to’nn tann lezot koz lor fason ki li kondir. Ekout bien seki bann-la dir. Apre sa, to kapav vwayaz ar li kan li pe roule. Si to trouve ki to bizin koz ar li lor fason ki li kondir, pa ezite pou fer li. Ek kan to fer sa, met twa dan so plas. To bizin zanti, me to bizin fran osi. Fer li konpran ki se pa so laz ki enn problem, me se fason ki li kondir. Olie ki to dir li “To nepli enn bon sofer,” dir li “Mo trakase pou to sekirite.” Rapel li seki Labib dir lor modesti ek lor met lavi lezot an danze, ek dir li ki to kone ki li anvi swiv bann prinsip Labib.

Nou tou nou bizin esey konpran seki sa dimounn-la pou resanti kan li pou aret kondir. Kitfwa li kapav panse ki li pou perdi so liberte ek ki li pou bizin depann lor lezot. Kouma to kapav ed li? To bizin zanti avek li ek propoz li to led. (Prov. 17:17) Kitfwa li pou ezite pou demann twa enn lift ouswa pou amenn li kitpar, alor pran linisiativ ek fer li kone ki to dispoze pou ed li. Kitfwa to kapav organiz twa pou amenn li pou bann aktivite inportan, kouma renion, predikasion, shoping, ouswa pou al so bann randevou kot dokter. Dir li ki to kontan fer sa pou li ek ki to kontan pas letan avek li.—Rom. 1:11, 12.

a Pou konn plis lor la, get lartik « Circulation routière: êtes-vous en sécurité ? » dan Leve! 22 Out 2002, an Franse.