Ki Ete Komite Santral Bann Temwin Zeova?

Komite Santral, li enn ti group bann frer Kretien ki ena matirite ki diriz bann Temwin Zeova dan lemond antie. Bann manb Komite Santral fer de travay:

• Zot siperviz preparasion bann lansegnman baze lor Labib ki nou gagne dan bann piblikasion, bann renion ek bann lekol pou bann Temwin Zeova.​—Lik 12:42.

• Zot siperviz predikasion bann Temwin Zeova dan lemond antie ek zot zer bann don ki bann dimounn ek bann Temwin fer.

Komite Santral swiv lexanp “bann zapot ek bann ansien dan Zerizalem” dan premie siek ki ti pran bann desizion inportan pou tou bann lasanble Kretien. (Zistwar Bann Zapot 15:2) Parey kouma sa bann zom fidel la, bann manb Komite Santral pa bann sef nou lorganizasion. Se Labib ki gid zot dan zot bann desizion parski zot rekonet ki Bondie Zeova finn donn Zezi lotorite antan ki Sef lasanble.​—1 Korintien 11:3; Efezien 5:23.

Kisann-la bann manb Komite Santral?

Bann manb Komite Santral se Kenneth Cook, Jr., Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane ek Jeffrey Winder. Zot servi dan biro mondial dan Warwick, New York, Letazini.

Kouma Komite Santral organize?

Komite Santral finn etablir sis komite pou siperviz diferan laspe nou travay ek sakenn so bann manb servi dan enn ouswa plizir sa bann komite-la.

• Komite Bann Kordinater: Siperviz bann zafer legal ek pran bann aksion kan ena bann katastrof, bann persekision konsernan bann krwayans ek lezot sitiasion irzan ki afekte bann Temwin Zeova.

• Komite pou Personel: Sa komite-la vey lor tou seki konsern bann bezwin fizik ek spiritiel bann manb fami Betel.

• Komite Edision: Siperviz prodiksion bann piblikasion ek avoy zot partou dan lemond. Zot siperviz osi konstriksion bann Lasal renion, bann biro tradiksion ek bann biro nasional.

• Komite Servis: Siperviz predikasion “bon nouvel lor Rwayom Bondie.”​—Matie 24:14.

• Komite pou Lansegnman: Sa komite-la responsab pou lansegnman spiritiel atraver bann renion, bann lekol ek bann program odio ek video.

• Komite Redaksion: Li prepar lansegnman spiritiel ki nou gagne dan bann piblikasion ek osi lor nou sit internet ek siperviz travay tradiksion.

Anplis sa bann travay ki zot fer atraver sa bann komite-la, Komite Santral zwenn sak semenn pou get bann bezwin nou lorganizasion. Dan sa bann renion-la, bann manb komite koz lor seki Lekritir dir. Zot les lespri sin gid zot pou ki zot tou esey pran mem desizion.​—Zistwar Bann Zapot 15:25.

Kisann-la bann asistan Komite Santral?

Zot bann Kretien ki kapav fer konfians ek zot ed bann komite ki anba responsabilite Komite Santral. (1 Korintien 4:2) Zot ena kapasite ek lexperyans dan travay ki sipervize par komite ek zot asiste bann renion ki ena sak semenn. Mem si zot pa partisipe kan pran bann desizion, bann asistan donn bann konsey ek bann ransegnman ki bizin, zot fer seki komite inn deside ek zot verifie regilierman si proze-la pe realize. Komite Santral kapav osi demann bann asistan pou vizit nou bann frer ek ser dan diferan parti lemond ouswa pou fer bann diskour dan bann levennman kouma renion aniel ouswa seremoni diplom Lekol Galaad.