NADABA
(Nadàba) [Tia Manome; Tsara Toetra; Malala-tanana].
1. Lahimatoan’i Arona sy Eliseba. (Ek 6:23; 1Ta 6:3) Teraka tany Ejipta i Nadaba ary anisan’ireo Israelita nafahana avy tany Ejipta izy. Nantsoina hiakatra tany amin’ny Tendrombohitra Sinay niaraka tamin’i Arona sy Mosesy izy sy Abiho zandriny lahy nanarakaraka azy ary ireo anti-panahy israelita 70. Nahazo fahitana an’Andriamanitra izy ireo tany. (Ek 24:1, 9-11) Napetraka teo amin’ny toeran’ny mpisorona niaraka tamin’ny rainy i Nadaba sy izy telo lahy rahalahiny. (Ek 28:1; 40:12-16) Toa ny androtr’iny ihany, dia nanao zavatra tsy nety i Nadaba sy Abiho ka nanolotra afo tsy ara-dalàna. Tsy voalaza hoe nahoana no tsy ara-dalàna ilay afo. Mamo angamba izy ireo rehefa nanao an’ilay fahotana (taorian’izay avy hatrany mantsy dia norarana ny fisotroana divay na toaka rehefa manao fanompoana). Mety tsy ho izay fotsiny anefa ilay fahotana nanasaziana azy. Na izany aza, dia mety ho noho izy roa lahy mamomamo no nahatonga azy hanao ilay fahotana. Nisy afo avy tamin’i Jehovah namono azy ireo, ary nentina tany ivelan’ny toby ny fatiny. (Le 10:1-11; No 26:60, 61) Maty tsy niteraka i Nadaba sy Abiho, ka ankohonana roa sisa no hiavian’ireo mpisorona atỳ aoriana, dia ny ankohonan’i Eleazara sy Itamara.—No 3:2, 4; 1Ta 24:1, 2.
2. Taranak’i Jeramela avy amin’ny fokon’i Joda. Zanakalahin’i Samay i Nadaba ary rain’i Saleda sy Apaima.—1Ta 2:3, 25, 26, 28, 30.
3. Zanakalahin’i Jeiela avy amin’ny fokon’i Benjamina.—1Ta 8:1, 29, 30; 9:35, 36.
4. Zanakalahin’i Jeroboama ary mpanjaka faharoa tany amin’ny fanjakan’ny foko folon’ny Israely tany avaratra. Nanjaka nanomboka tamin’ny 976 T.K. tany ho any i Nadaba, ary naharitra roa taona teo ho eo ny fanjakany. Mbola notohiziny ny fivavahana tamin’ny zanak’omby izay natomboky ny rainy. Novonoin’i Basa izy rehefa nanao fahirano an’i Gibetona, tanànan’ny Levita teo aloha (Js 21:20, 23) izay nalain’ny Filistinina. Novonoin’i Basa koa avy eo izay sisa tavela tamin’ny ankohonan’i Jeroboama, mba hiarovany ny seza fiandrianany.—1Mp 14:20; 15:25-31.