Ny batisan-jaza: nahoana ny pretra sasany no manohitra izany?
TIAN’I Alain sy Sonia fotsiny ny hampanao batisa ny zanany kely. Noho izany dia gaga aoka izany izy ireo rehefa tsy vitan’ny hoe nanda ny fankalazana io fombafomba io ny pretrany anglikana, fa nanome azy ireo izao torohevitra izao koa: “Ianareo ihany manao azy.” Inona no antony tsy nanekeny ny fangatahan’izy ireo? Satria tsy mpiangona narisika na i Alain na i Sonia. — The Christian Century, 3-10 jona 1981.
Tato ho ato, dia maromaro ny mpivady nahita fandavana toy izany. Izany dia mampiseho mazava fa manova ny fomba fiheverany ny batisan-jaza ny Fiangonana sasany. Raiso ho ohatra ny amin’ny Eglizy katolika. Taorian’ny konsily Vatican II, dia nasiany fanitsiana ny fombafomba amin’ny batisan-jazakely. Satria na dia manao batemy zaza vao teraka foana aza ny Eglizy, dia mangataka amin’ny ray aman-dreny izy izao mba hanome antoka aloha fa hitaiza ny zanany ao amin’ny lovantsofina katolika izy ireo. Namoaka izao didy izao ny Vatican: “Raha tsy tena tsara izany antoka izany, dia mety ho voatarika ny tena hampihemotra ny fanamasinana, ary tokony holavina aza izany raha tena tsy misy izany.” — L’Osservatore Romano, “Toromarika momba ny batemin-jaza”, 1 desambra 1980.
Io torohevitra io dia mifanalavitra aoka izany amin’ny notohanana tamin’ny fotoana, araka ny voalazan’ilay pretra katolika atao hoe Joseph Champlin, nisian’ny “misionera feno zotom-po nanao batemy zaza vao nateraky ny mpanompo sampy nariana teny amoron-dalana”, ka nisian’ny pretra “namporisika ny ray aman-dreny tsy hamela iray volana mahery ho lasa vao hampanao batemy zaza vao teraka, raha tsy izany dia hanao fahotana mahafaty izy”.
Inona no niteraka izany fiovan’ny fihetsika izany. Voalohany indrindra, dia miaiky ankehitriny ireo filoha ara-pivavahana fa tsy ny batisa akory no mahatonga ho kristiana. Manjary tena loharanom-panahiana ny fihenan’ny famonjena fotoam-pivavahana sy ny fitaran’ny tsy fahampian’ny fitiavam-pivavahana eo amin’ireo katolika vita batisa. Ny lahatsoratra iray ao amin’ny revio U.S Catholic koa dia nametraka izao fanontaniana izao: “Nahoana ny Eglizy no hampitombo ny zava-manahirana amin’ny fanaovana batisa zaza izay saika azo antoka fa ho tonga olon-dehibe tsy mpivavaka marisika?”
Io fandraisana toerana vaovao sy hentitra ny amin’ny batisa io dia mampiharihary fisaratsarahana lehibe eo amin’ireo teolojiana. Araka ny fanamarihan’ilay mpanoratra katolika atao hoe Joseph Martos, dia mpitondra fivavahana maro no tsy mino fa ny batisan-jaza dia “fombafomba ara-majika misy vokany tsy hita maso eo amin’ny fanahy”. Hitan’izy ireny ho efa tranainy sy lany andro izany fiheverana izany.
Tsy mahagaga amin’izany raha very hevitra ny katolika tso-po maro. Moa ve tsy nampianatra foana ny Eglizy fa ny zaza tsy vita batisa dia nety ho any amin’ny afobe mivaivay iray na hijanona ao amin’ny afo fandiovana? Raha marina izany zavatra inoana izany, ho azo atao ve ny handa tsy hanao batisa noho ny antony sasany na inona izany na inona? Fanontaniana tena lehibe ireo. Araka ny nomarihin’i Vincent Wilkin, pretra katolika, ny tontalin’ireo maty tsy vita batisa dia “maro aoka izany sy tsy tambo isaina, hany ka mifanitsy amin’ny ankamaroan’ny taranak’olombelona izany”.
Aoka anefa hojerentsika kosa izay ampianarin’ny Tantara sy ny Baiboly antsika ny amin’ny batisan-jaza.