Mitantara ireo mpitory ilay Fanjakana
Nitana ny finoana izy teo anivon’ny tokantrano voazarazara
NILAZA izao fananarana izao ho an’ny kristiana tsirairay avy ny apostoly Paoly: “Tandremo ny tenanao sy ny fampianaranao, ka mahareta amin’izany; fa raha manao izany hianao, dia hamonjy ny tenanao sy izay mihaino anao.” (1 Timoty 4:16). Tao amin’ny tany iray any Atsinanana, Rtoa L..., tonga Vavolombelon’i Jehovah, dia nandray soa mahatalanjona rehefa ‘naharitra’ tamin’ny fampianarana araka ny Baiboly.
Sahala amin’ny vadiny, Rtoa L... dia avy amin’ny fianakaviana hindoa. Nisy Vavolombelon’i Jehovah nitsidika azy tamin’ny 1959 ary, rehefa avy niara-nianatra ny Baiboly tamin’izy ireo izy dia nanaraka ny fahamarinana ao amin’ny Tenin’Andriamanitra. Tamin’izay izy dia nanao fanambarana tamin’ny vadiny sy ny mpianakaviny (jereo Jaona 1:40, 41). Tsy naneho fahalianana mihitsy ho an’ny fahamarinana ny vadiny, fa ny rahavaviny, R..., kosa, dia niara-nianatra Baiboly taminy. Tamin’ny 1961 izy mirahavavy dia nanamarika ny fanolorana ny tenany ho an’i Jehovah tamin’ny batisa. Raha mbola niray trano taminy koa ireo zanany, dia niara-nianatra tamin’izy ireo ny anabavy L... ary nitondra azy nankany amin’ireo fivoriana. Rehefa tsy nianatra tany an-tsekoly intsony i S... zanany vavimatoa, dia nanolo-tena ho an’i Jehovah, natao batisa ary nanambady Vavolombelona. Indrisy anefa fa tatỳ aoriana dia nanjary tsy niasa intsony izy mivady. Nanao fianarana ambony ny zanany lahimatoa ka nanana fifaneraserana ratsy. Nanambady zazavavy katolika izy ary nitsahatra tsy niaraka tamin’ny vahoakan’i Jehovah. Fa raha ny amin’ny zanany faravavy, rehefa vita ny fianarany dia nanolo-tena ho an’i Jehovah izy ka natao batisa.
Nanohy nanao fanambarana tamin’ny mpianakaviny ny anabavy L.... Liana ny fahamarinana ny anankiray hafa tamin’ireo rahavaviny, nefa nanohitra azy mafy ny vadiny ka nahavita hatramin’ny nanafoana ny Baiboliny sy ireo bokiny. Tsy navelany hitondra ireo zanany telo ho any am-pivoriana izy, nefa niara-nianatra tamin’izy ireo tao an-trano ilay reny. Rehefa nandeha ny fotoana, dia nanolo-tena ho an’i Jehovah koa izy ary natao batisa, na dia tao aza ny fanoherana mafy nataon’ny lahy. Tamin’ny farany, ireo zanany telo dia samy tonga Vavolombelona nanolo-tena sy vita batisa daholo.
Nandritra izany fotoana izany, ny anabavy L... dia nanohy nanao fanambarana tao amin’ny fianakaviany. Rehefa niresaka ny amin’ny vaovao tsara tamin’ny anadahiny sy ny vadin’io izy, dia tsy naneho fahalianana ilay anadahiny, fa nihaino azy kosa ny vadiny. Rehefa avy nahazo fahalalana ampy ny Baiboly izy io dia nanolo-tena ho an’Andriamanitra ary nanamarika izany voady izany tamin’ny alalan’ny batisa.
Nanao fanambarana tamin’ny anankiray hafa tamin’ireo anadahiny koa ny anabavy L.... Nanohitra ny fahamarinana izy io, kanefa nanomboka nianatra ny vadiny sy ny zanany vavy. Nankany Kanada io zazavavy io mba hanohy ny fianarany ka tany dia nanohy nianatra ny Baiboly sy nifanerasera tamin’ny Vavolombelona izy. Tamin’ny farany izy io dia nanaiky ny fahamarinana koa ary natao batisa. Nanambady mpitory maharitra kanadiana izy, ary nanatrika ny fampakarana azy ny rainy sy ny reniny. Nisy heriny tsara teo amin’ny rainy ny nataon’ireo rahalahy kanadiana.
Nisy vokany ny fanambarana nataony tamin’ny fianakaviany
Nitahy ireo fiezahana nataon’ny anabavy L... tamim-paharisihana Jehovah. Rehefa nandeha ny fotoana, dia niala tamin’ny asany be karama ny zanany faravavy mba hanao asa tapak’andro, ary nanomboka nanompo an’i Jehovah tamin’ny naha-minisitra manontolo andro. Nanomboka nianatra ny Baiboly indray ny zanany vavimatoa sy ny vadiny ary nanatrika fivoriana. Mandray anjara indray amin’ny fitoriana izy ireo. Ilay zanany lahy nanambady zazavavy katolika ka niala tamin’ny fahamarinana dia nanomboka nianatra indray koa ary tamin’ny farany dia nanolotra ny fiainany ho an’i Jehovah izy ary natao batisa. Nanolo-tena ho an’i Jehovah sy natao batisa koa ny zanany faralahy. Nampiseho fihetsika hentitra izy tatỳ aoriana raha ny amin’ny raharaha momba ny fialanalanana (Isaia 2:4). Voaheloka hotanana telo taona tao amin’ny tranomaizin’ny tafika izy, nefa nandritra izany vanim-potoana izany dia nanana fahafahana hanao fanambarana teo anatrehan’ireo mpitsara. Nanaitra ny sain’ny vadin’ny anabavy L... aoka izany ny herim-pon’ilay zanany lahy, hany ka liana ny fahamarinana izy izao ary mamonjy ireo fivoriana.
Ireo 29 taona niasan’ny anabavy L... tamim-pahatokiana teo anivon’ny tokantrano voazarazara dia nitondra tena fahafahampo ho azy sy nahitam-bokatra. Manana fifaliana izy izao satria 18 ny Vavolombelona vita batisa ao amin’ny fianakaviany. Enga anie ny ohatra nomeny ho loharanom-pampirisihana sy fampaherezana ho an’ireo namantsika kristiana maro izay ao anatin’ny tarehin-javatra toy izany ka tsy maintsy maharitra sy mitana ny finoana ao anatin’ny tokantrano voazarazara. — 1 Petera 2:19, 20; 1 Korintiana 7:12-16.