Jesosy, ny fiainany sy ny fanompoany
Ataovy izay hahazoana antoka ny amin’ny hoavinao noho ny fahendrena ampiharina
VAO avy nitantara indrindra ny amin’ilay zanaka adala tamin’ny vahoaka voaforon’ny mpianany, ny mpamory hetra tsy marina sy ny mpanota fanta-bahoaka hafa mbamin’ny mpanora-dalàna sy ny Fariseo i Jesosy. Miteny amin’ireo mpianany izy izao ka mitantara amin’izy ireo fanoharana hafa: ny amin’ny lehilahy iray izay nandre fitantarana ratsy momba ny mpitantana ny fananany, ny mpitandrin-draharahany.
Niantso ilay mpitandrina ny fananany ilay lehilahy nanan-karena, hoy Jesosy ka nampahafantatra azy fa horoahiny izy. “Inona ange no hataoko, hoy io nanontany tena fa esorin’ny tompoko amin’ny fitandremana ny fananany aho? Ny miasa tany tsy tratry ny aiko; ny mangataka mahamenatra ahy. Fantatro izay hataoko, mba hisy handray ahy ho ao an-tranony, rehefa voaisotra amin’ny fitandremana ny fananana aho.”
Inona àry no drafitr’io mpitandrina fananana io? Niantso izay rehetra nitrosa tamin’ny tompony izy. “Hoatrinona no trosan’ny tompoko aminao?” hoy izy nanontany ny voalohany.
‘Diloilon’oliva 2 200 litatra’, hoy ny navalin’io.
‘Raiso ny taratasinao, ary mipetraha faingana, ka 1 100 litatra no soraty’, hoy ilay mpitandrim-pananana.
Avy eo dia nanontany hafa iray izy hoe: “Hoatrinona kosa no trosa aminao?”
‘Vary 22 000 litatra.’
‘Raiso ny taratasinao, ka 18 000 litatra no soraty.’
Zon’ilay mpitandrin-draharaha ny hampihena ny trosa tokony haloa amin’ny tompony satria tamin’izay fotoana izay dia mbola mpitantana ny volany izy. Nahazo namana izy rehefa nanao toy izany ka hisy amin’ireo kosa ho afaka hanampy azy rehefa hamoy ny asany izy.
Rehefa notantaraina taminy ilay raharaha, dia gaga ilay tompo, hany ka raha ny marina dia ‘nidera ilay mpitandrina tsy marina nanan-tsaina [nanam-pahendrena nampiharina, MN ] izy’. Nanampy teny toy izao tokoa i Jesosy: “Ny zanak’izao tontolo izao dia manan-tsaina kokoa ny amin’ny karazany noho ny zanaky ny mazava.”
Nanatsoaka ny fianarana avy amin’io fanoharana io ho an’ireo mpianany izao i Jesosy. Nananatra azy ireo toy izao izy: “Aoka ny mamôna [harena, MN ] tsy marina ho entinareo mahazo sakaiza, mba horaisin’ireo ho any amin’ny fonenana mandrakizay hianareo, rehefa lany izany.”
Nidera ilay mpitandrin-draharaha i Jesosy, tsy noho ny tsy fahamarinany fa noho ny fitsinjovany ny hoavy, noho ny fahendreny nampiharina. Matetika tokoa, “ny zanak’izao tontolo izao” dia mampiasa amin-kafetsen-dratsy ny volany sy ny toerany mba hahatongavana ho naman’ireo izay mety hanome tombontsoa azy ho valiny. Ireo mpanompon’Andriamanitra, “ny zanaky ny mazava”, àry, dia tokony hampiseho fahendrena koa amin’ny fampiasana ny fananany ara-nofo, na ny ‘hareny tsy marina’, mba hahazoana soa.
Araka ny filazan’i Jesosy anefa, izy ireny dia tokony hampiasa izany harena izany mba hahazoana ho sakaiza ireo izay ho afaka handray azy any amin’ny “fonenana mandrakizay”. Ho an’ireo anisan’ny ondry vitsy, izany fonenana izany dia any an-danitra; ho an’ny ondry hafa, izany dia ny Paradisa ho eto an-tany. Koa satria Jehovah Andriamanitra sy ny Zanany ihany no afaka handray antsika any amin’ireo fonenana ireo, na toy inona na toy inona “harena tsy marina” ananantsika, dia tokony hiezaka hampiasa izany mba hanohanana ny tombontsoan’ilay Fanjakana isika. Amin’izany isika dia hitana fifandraisana amim-pisakaizana amin’i Jehovah sy Jesosy. Rehefa tsy hisy na hanjavona ny harena ara-nofo, tsy maintsy hitranga izany, dia ho azo antoka ny hoavintsika mandrakizay.
Nanohy ny teniny i Jesosy tamin’ny filazana fa ireo izay niseho ho nahatoky hatramin’ireny zavatra madinika tokoa ireny, ny zavatra ara-nofo, dia hiseho hahatoky amin’ireo raharaha lehibe kokoa. Ary nanampy toy izao izy: “Koa raha tsy mahatoky amin’ny mamôna [harena, MN ] tsy marina hianareo, iza no hatoky anareo ny amin’ny tena harena [ny tombontsoa ara-panahin’ilay Fanjakana]? Ary raha tsy mahatoky amin’izay an’olona [ny tombontsoan’ilay Fanjakana nankinin’Andriamanitra amin’ireo mpanompony] hianareo, iza no hanome anareo izay anareo [ny fiainana ho valisoa ao amin’ireo fonenana mandrakizay?”
Tsy azontsika atao tanteraka ny sady ho tena mpanompon’Andriamanitra no ho andevon’ny harena tsy marina, ny harena ara-nofo. Tamin’izany hevitra izany no namaranan’i Jesosy ny teniny rehefa nilaza izy hoe: “Tsy misy mpanompo mahay manompo tompo roa; fa ny anankiray ho halany, ary ny anankiray ho tiany; na ny anankiray hombany, ary ny anankiray hohamavoiny. Tsy mahay manompo an’Andriamanitra sy mamôna [ny harena, MN ] hianareo.” Lioka 15:1, 2; 16:1-13.
◆ Ahoana moa no nahatonga ilay mpitandrin-draharaha voalazan’ny fanoharana nataon’i Jesosy ho naman’ireo izay mety hanampy azy any aoriana?
◆ Inona moa no atao hoe “harena tsy marina”, ary ahoana no azontsika ampiasana izany mba hahazoana sakaiza?
◆ Iza no afaka mandray antsika “any amin’ny fonenana mandrakizay”, ary fonenana inona izany?