Miteko co Mapostolu
25 Vano, uvira waya mahuku mararu alamulelaka iprovinsia yo Yuteya, Festu ahokhuma u Seseraya arwaaka u Yerusalemu. 2 Ni ahooleli aanankuttho ni alopwana yaattitthimihiya yahonhimeeryaca citthu caamootheryacaaya Paulu. Yahopacera unlepela Festu yankhanyererihaka 3 wiira anwaane Paulu u Yerusalemu. Masi, ayo yaholeehana umwiipithela mparapaarani wiira amwiive. 4 Masi, Festu ahaakhula wiira Paulu khaalamuliya ukumihiya ikhattya yo Sesareya ni wiira uyo anhala uturuwela nwo woohipica. 5 Vano, uyo ahowiirela: “Akitthare alopwana akiina ampanka mphantte waahooleliinyu wiira yahimyace itthu ipankilyaawe yootakhala.”
6 Vano, uviriha wawe mahuku vakaani* nari nkhayi naayo, uyo ahoturuwela u Sesareya ni waaseele ahonkoma utiripunaali ni ahoruma wiira awaaniye Paulu. 7 Ukati Paulu waakenlyaawe ntiripunaali, ayuuta yaakhuma u Yerusalemu yahonrukureerya, yamootheryacaka citthu cinci ni cowoopiha, ni ayo khayaarina itthu yowoonihera wiira citthu caahimyaaya caari ikhweeli.
8 Vano, Paulu aheecaakiha eeraka: “Akipankile hataa itthu yootakhala invonyaniha nlamulo naayuuta, notempulu hataa na Seesari.” 9 Festu apheelaka waatteeliha nrima ayuuta, ahonkoha Paulu eeraka: “Unaapheela urwaa u Yerusalemu wiira wahukhumwiye wonwo, uhoolo waka, nlattu wo nnya citthunnya?” 10 Masi, Paulu aheera: “Kiri itiripunaali ya Seesari, kinlamuliyaaka uhukhumwiya. Akaapankile itthu yootakhala ayuuta, khampa Akhulupale cincuweleenyu sana-saana. 11 Wakhala wiira mi kinammalukuni ni kihopanka itthu kimphwanelaaka wiiviya, akinkhotta wiiviya. Masi, wakhala wiira citthu cinkootheryaaya ala alopwanaala khacinakhala cokhweeli, khaavo nolamuliya ukivaherera mmatatani waala alopwanaala. Mi kimpheela urwaa wa Seesari!” 12 Vano, Festu uwuulumana wawe anamavaha ikano, ahomwaakhula: “Weeva unlepela uhukhumwiya ni Seesari, vano unaahala uhukhumwiya ni Seesari.”
13 Uvira waya mahuku vakaani, mwene Akiripa ni Perenise yahorwaa u Sesareya unthotola Festu wiira yavahane ankhili. 14 Ukhala wiira anhala ukhala nwo mahuku menci, Festu ahonhimeerya mwaha wa Paulu amwiirelaka:
“Haavo nlopwana mmoca Felisi nhiilyaawe nari nkhattya; 15 ukati waaryaaka u Yerusalemu, ahooleli aanankuttho ni mahumu aayuuta yahokihimeryaca myaha cawe uyo nlopwanooyo ni yahokilepela wiira ahukhumwiye. 16 Masi mi kahowaakhula wiira, khinakhala itthu arooma impankaaya unhukhumu ntthu hinawoonanana atthu ammotheryaca ni wiira akhalane ukati wowiicaakiha. 17 Vano, waseele, mi kaahophiya mu ni kahonkoma utiripunaali, woohipica kahoruma wiihaniya uyo nlopwanooyo. 18 Ukati wonwilyaaya atthu yaamootheryacaayo, khayaahimile hataa itthu yootakhala koopuwelaaka wiira phaahalaaya uhimya. 19 Masi yaanyakulihana nlattu wottiinnyaaya ni nlattu wanlopwana mmoca neehaniya Yesu, khwile masi Paulu aakhanyereraawe wiira haavo nkumi. 20 Nlattu woohicuwela mawacerero uyo mwahooyo, mi kahonkoha wakhala wiira ampheela urwaa u Yerusalemu wiira ahukhumwiye nlattu wo uyo mwahooyo. 21 Masi, ukati Paulu waalepenlyaawe uhikumihiya nkhattya ni uweherera itthu yaahalaawe ulakela Akustu*, kahoruma wiira uyo atthukeliye mpaka waahalaaka unveleeliha wa Seesari.”
22 Vano, Akiripa ahomwiirela Festu: “Mi wankicivela umwiiwa mwaaneennyaawe uyo nlopwanooyo.” Vano, uyo ahomwiirela: “Nnaahala umwiiwa meelo.” 23 Vano, waaseele, Akiripa ni Perenise yahophiya utiripunaali ni yahokela yiittitthimihaka, nkhayi ni makomantante aanatoropa ni alopwana ofayita o iyo isittattiiyo. Ni Festu ahoruma uwaaniya Paulu. 24 Vano, Festu aheera: “Mwene Akiripa ni atthu otheene ari va, mmoone ula nlopwanoola ayuuta ankilepelaaya o Yerusalemu ni hataa omoomu, yakhuwelaka wiira haana wiiviya. 25 Masi kahoona wiira uyo khiivo yaapankilyaawe yootakhala yamphwanela wiiviya. Vano, ukati waalepenlyaawe uhukhumwiya ni Akustu, mi kaholakela unveleeliha. 26 Masi, akirina hataa itthu yoocuwannya yoopheela uwantikhela Apwiiyaaka immuuluma ula nlopwanoola. Phimaana, kihonwaana uhoolo waatthu otheene venci-venci uhoolo winyu Akhulupale, amwene Akiripa, wiira mwankohakoha vale kikhalane itthu yowantikha. 27 Kontha akinoona ukhala itthu yomaana waaveleelihera pereso, woohihimya itthu yootakhala ipankilyaawe.”