Miteko co Mapostolu
19 Ukati Apolu waaryaawe u Korintu, Paulu ahovira micoko conhina ni ahophiya u Efesu. Uphiya wawe nwo ahaaphwanya atthari akhwaawe 2 ni ahaakoha: “Nyuuva nhaakhela nnepa wowaarya ukati mwaapacenreenyu umwaamini Nluku?” Ayo yahomwaakhula yeeraka: “Khanincuwela wiira uhaavo nnepa wowaarya.” 3 Paulu ahaakoha: “Vano mpattisiye cani?” Ayo yahaakhula yeeraka: “Nimpattiso wa Joau.” 4 Paulu aheera: “Mpattiso wa Joau waathoonyera uttharuwa, ni uyo anwiirela atthwaayo wiira amwaamini ule aahala uwa, Yesu.” 5 Wiiwa waya iyo itthwiiyo, yahorwaa upattisiya mwancina na Apwiiya Yesu. 6 Ni, ukati Paulu waaweesenryaawe matataawe, ayo yahaakhela nnepa wowaarya, ni yahancera wuulumaca iluuka cikhwaawe ni ulalyeera. 7 Yaari alopwana 12.
8 Paulu ahoviriha myeeri miraru eetthucihaka alipaka nrima, ni ataphulelaka myaha caawiiriha atthu ukupali Umwene wa Nluku. 9 Masi, ukhala wiira yahaavo atthu yahaamini ni yooluma pusya iphiro ca Nluku uhoolo waatthu otheene; uyo ahaahiya ni ahowaawayaniha ale yaari atthari ni khula nihuku antaphulela mwaha ucikola yo Tiranu. 10 Iyo itthwiiyo, yahovira myaakha miili yiirannyaaka, mpaka atthu otheene yaakhala iporovinsiya yo Asiya, ayuuta ni akereeku, yaheewa nuulumo na Apwiiya.
11 Nluku aaneerannyeeha miteko cuulupale anvarelaka nteko Paulu, 12 mpaka maleeso ni ikuwo caawaraawe avaraka nteko, cancisiya ni urwaaneliya atthu oowerennya, ni ayo yanvonihiya ni ale yaarina maciini yaanaakhuma. 13 Ayuuta akhwaawe yeetteetta khula nipuro yoomolaka maciini, ciicammo yammananiha uromola ncina na Apwiiya Yesu wiira yoomole maciini yeeraka: “Kinwiirelani mwancina na Yesu ule Paulu nomuulumaawe, nkhume.” 14 Asaana 7 anankuttho muulupale nyuuta eehaniya Seva, yampanka iyo itthwiiyo. 15 Masi, nciininno nanwaakhula, neeraka: “Mi kinancuwela Yesu ni kinancuwela Paulu. Vano, nyuuva mwaapani?” 16 Vano, nlopwana aarina maciinnyuuyo ahaatuphela ni ahopacera uwaattakaca, ni ayo alopwanaayo yahotthawa woohiwara itthu ni anarakalacile. 17 Iyo itthwiiyo yahocuwelaciya naatthu otheene, ayuuta ni akereku yaakhala u Efesu, ni atthu otheene yahoova ni ncina na Apwiiya Yesu khanaahiya uttitthimihiya. 18 Vano, atthu enci yaamwaaminni Nluku yanwa ni uhimyaca matampyaaya ni citthu caapankaaya. 19 Khweeliini, atthu enci yaapanka macattuka yahothukumaniha ilivuru caya cotheene ni yahopahakaca uhoolo waatthu otheene. Ni caalikeliyaka vale, wahooniya wiira pooti wanhalaaya utumihiya nsurukhu woophiyaka 50.000 woparaata. 20 Vano, niikuru ca Yehova, nuulumo nawe nanvira nimwaryeelaka.
21 Wiirannya waya nnyo citthunnyo, Paulu aholakela wiira aphiyaka u Masetoniya, anhala urwaa u Akaya ni anhala uphiya u Yerusalemu. Uyo enre: “Karwaaka nwo, ciicammo kihaana kiphiyaka u Rooma.” 22 Vano, ahaaveleeliha anamakaviheraawe eeli u Masetoniya, Timotiyu ni Erastu, masi uyo ahohala iporovinsiya yo Asiya ukati vakaani.
23 Ule ukatyuule, wannyakulihaniya cinene nlattu wo iphiro ca Apwiiya. 24 Nlopwana mmoca eehaniya Demeetriu, aapanka itempulu cooyevaca coparaata caalikana niitempulu ca Artimis, ni uyo aanaaphwanyiha nsurukhu mwinci ale aavaranaawe nteko. 25 Uyo, ahaathukumaniha atthu otheene ni ahowiirela: “Alopwana, nyuuva nnaacuwela sana-saana wiira ula ntekoola phinniphwanyiha nsurukhu. 26 Vano, nyuuva nnawoona ni nnawiiwa, wiira kahi u Efesu paahi masi iporovinsiya yotheene yo Asiya, Paulu howiiriha atthu otheene urukunusa moopuwelelwaaya, eeraka wiira anluku hiiva ninaapankeehu khaanakhala okhweeli. 27 Uhiya commo, kahi paahi unoopiha upwata ula ntekoola, masi ciicammo itempulu ya nluku muulupale Artimis khinhala uvahiya ifayita, ni ule noswaleliya iporovinsiya yotheene yo Asiya ni ituninya yotheene khanhala uttitthimihiya-tho.” 28 Wiiwa waya iyo itthwiiyo, atthu otheene yahoviruwa ni yahancera ukhuwela yiiraka: “Muulupale khanle nluku Artimis o Efesu!”
29 Vano, uyo mwahooyo wahomwaryeela isittatti yotheene, ni atthu otheene yahokela yatthawaka nipuro naapankiya iteyaturu, yahompurulaca Kaayu ni Aristarku, ale yanveleela Paulu. 30 Paulu aapheela ukela mmo nteyaturunimmo masi atthari kayantthunihenre upanka iyo itthwiiyo. 31 Hataa ciicammo ale yaatthenkaca ifesta, icooku ni yaapatthanannyaawe, yaholeehera wiira alepeliye Paulu wiira hikele uteyaturuni. 32 Vano, atthu otheene yahanca unyakulihana: Atthu akhwaawe yaakhuwela itthu imoca ni akhwaawyaayo itthu ikiina, ni atthu enci khayacuwela nlattuni waathukumaniyaaya. 33 Vano, Alexantere ahokhuma iriyari ya apoovu, ni ayuuta yahonkakhela uhoolo ni uyo ahowusa ntata nawe, kontha aapheela wiicaakiha iriyari ya apoovu. 34 Vano, atthu otheene ucuwela waya wiira uyo aari nyuuta, yahancera ukhuwela wookhalaka iwoora piili yeeraka: “Muulupale khanle nluku Artimis o Efesu!”
35 Vano, nsatoro o iyo isittattiiyo waamaaliha wawe apoovu, aheera: “Nyuuva atthu o Efesu, tipani hincuwela wiira isittatti yo Efesu ikhanle nkhikicero wo itempu ya nluku muulupale Artimis ni yolatarato imonre wiirimu? 36 Ukhala wiira nnya citthunnya khacinnyakuliheraniya, nyuuva nhaana mmaalaka ni nhipuphe. 37 Nyuuva nhaawaana ala alopwanaala va, hataa ukhalaka wiira khaanakhala malatarawu ontempulu ni khanveehile nlukweehu. 38 Vano, wakhala wiira Demeetriu nkhayi naale naavaranaawe nteko anaapheela unkasari ntthu, ahaavo mahuku itiripunaali inthukumanaaya ni anaakhalaka makovernatoore vaava; vano, pooti urwaa wonwo ukasari. 39 Masi wakhala wiira nnopheela itthu ikhwaawe uhiya ila ihimalyaakeela, iyo itthwiiyo ihaana ilakeliyaka ni nivareliyaka nteko nlamulo. 40 Kontha hiiva pooti woothererihiya uvirikaniha nlamulo no ila isittattiila, nlattu wo itthu yiirannyeele ilelo. Kontha khiivo itthu inhaleehu wuuluma wiira niicaakihere nlattu wo ila itthu yiirannyeeleela.” 41 Ni umaliha wawe wuuluma, ahaamwarusa atthu otheene.