Yonayeeli ya Akorintu
11 Uhookhalaru wiira miiva kinkhala toko nlolo, kinawuulepelani ukivilela. Masi khweeliini, nyuuva nneera nkivilelaka! 2 Kontha miiva kinawuuwacerani nyuuva toko Nluku noowaceraaweni, ukhala wiira kihookhuluvelihani wuuvahani nlopwana mmoca paasi, khanle Kristu. Miiva kimpheela wuuvahererani uhoolo wawe, toko nthiyana hinapaca urupa ninlopwana. 3 Khampa inwaa yanthepilyaaya Hawa nuuwalaala waya, miiva kinawoova nyuuva ciicammo uhononiya moopuwelelweenyu. Ni iyo itthwiiyo, uwiirihani uhintthara Kristu ninrimeenyu wotheene ni upanka citthu coohiirya cinonrusa uyova. 4 Kontha khweeliini, nyuuva khunoorikelani unkupali awaaka ntthu uulalyeerakani myaha cimmuuluma Kristu coovirikana nnye cuulalyenryeehuni, awula khunoorikelani waakhela nnepa wowaarya* woovirikana nuule waakhenleenyu, ni hataa waakhela ihapari comaana coovirikana nnye cuulalyenryeehuni. 5 Kontha miiva akineecoona ukhala mwankaani ukipwaha maapoostolweenyu aneecoona ukhala oolupale. 6 Masi, hataa ukhalaka wiira unaakirika wuulumaca, khweeliini miiva kihaana ucuwelaca; ni nihowooniherani iyo itthwiiyo nimananna otheene ni nhina citthu cotheene caapankeehu.
7 Awula, kiireke kihovara matampi wiiyeviha waka wiira nyuuva nttitthimihiye, ni ulakela waka wuulalyeerani ni nrimaaka wotheene ihapari comaana ca Nluku woohuulivihani itthu? 8 Maloko makhwaawyaayo, kaakhala toko kanwinnyera mayamunnaayo, kipheelaka wiira kikhitiri wuukaviherani nyuuva. 9 Masi uhookhalaru wiira ukati kaaryaaka ni nyuuva caahokithwa citthu, khaavo kanvahilyaaka nrintti wookiwacera, kontha mayamunna yaakhuma u Masetoniya, yahokivaha citthu cotheene caakithwaa. Iyeeni, kaheekurumica wiira kihuuvaheni nrintti wookiwacera mena vakaani, ni akinhala uhiyerera upanka iyo. 10 Ukhala wiira miiva kinooluma ikhweeli toko Kristu caahalaawe wuuluma, akinhala uhiyerera wiittottopa nlattu wo iyo itthwiiyo, micoko cikhwaawe co Akaya. 11 Kontha isiyani kihintthunaaka uvahiya itthu ni nyuuva? Kiireke kontha akinoofentani nyuuva? Nluku naacuwela wiira kinawuufentani.
12 Masi akinhala uhiyerera umpanka itthu kimpankaaka, wiira ale anaavererya itthu yoopheela uthoonyihera wiira anaalikana ni hiiva ni aneettottopa nlattu wo citthu cipankilyaaya, ahikhalane isariya. 13 Kontha ayo atthwaayo akhanle maapoostolu owootha, ananteko oothepyathepya, kontha ayo anawiipankaca ukhala khampa maapoostolu a Kristu, masi ahikhanle. 14 Ni iyo itthwiiyo khinkitikhiniha, kontha hataa Sotwani nawiipankacaka ukhala khampa nlayikha nomaana. 15 Phimaana, nhaatikhinace anantekwaawe mwawoonaka yiipankacaka ukhala khampa ananteko omaana. Masi ayo anhala uhukhumwiya ciweheriyaka citthu cimpankaaya.
16 Kinwiirelani-tho co: Hikhale noopuwela wiira miiva kinlolo. Masi, wakhala wiira phi itthu inoopuweleenyu, nkikupali nuulolo urinaaka wiira ni miiva kisiittitthimihe. 17 Nna co akinuulumaca toko caahalaaya wuulumaca Apwiiya, masi kinuulumaca khampa nlolo neekhuluvela ni neettottopa. 18 Ukhala wiira atthu enci aneettottopa nlattu wo citthu co ila ituniyeela, miiva ciicammo kinaahala wiittottopa. 19 Vano nyuuva atthu oocuwelaca vaa, mwaavilele ninrimeenyu wotheene ale akhanle alolo. 20 Ni khweeliini, nyuuva nnawaavilela ale anookhalihani ipottha, ale anwya mihakhu cinyu, ale anwya citthu cirineenyu, ale aneecuunuwiha iriyariinyu ni ale anwaattaani uwiitho.
21 Unaanuulihaca muru wuulumaca commo, kontha atthu akhwaawe iriyariinyu pooti unooniha wiira nikhanle atthu oololovaca.
Masi ukhala wiira atthu akhwaawe khaanoovelela wiittottopa, ni miiva ciicammo akinoovelela wiittottopa, hataa ukhalaka wiira ahaavo anhala ukoona ukhala nlolo. 22 Yakhala wiira ayo atthwaayo Maheperewu; ni miiva ciicammo kinheperewu. Yakhala wiira asarayeli; ni ciicammo kinsarayeeli. Yakhala wiira ucuulu wa Aparahaamu; ni ciicammo kikhanle ucuulu wa Aparahaamu. 23 Wakhala wiira ayo atthwaayo akhanle ananteko a Kristu, mi kinawuulumaca khampa nanvahuwa: Miiva ciicammo kikhanle ntthari a Kristu ootepa ucuwelaciya; mi kihovara nteko venci, kihotthukiya imaara cinci, kihaattakaciya ikwaha cinci ni imaara cinci kaahanle vakaani ukhwa; 24 ayuuta yahokaatta imaara thanu, khula imaara yaakaattilyaaya, yankicapha mpaka imaara 39. 25 Kihaattiya ikwaha tthaaru niithaapwa, ikwaha imoca kihopaca uvonyakaciya ni maluku, kihotoko uttittha ni naviyu ikwaha tthaaru, ni kihoviriha nihuku nteru kinari iriyari ipahari; 26 ikwaha cinci keettilyaaka, kihokumanana citthu cinci cowoopiha mmamyoolokoni, kihokhala iriyari yo malatarawu, iriyari yaapovwaaka yaakilupattha, iriyari yaatthu ontuniyani yaakilupattha, kihovira mmasittatti waalupatthiyaaka, muuthakoni wowoopiha, ahokiphwanya marikariko mpahari, kihokhala iriyari yo mayamunna oohikhuluvelya, 27 kiheekurumica ni kihovara nteko mwinci, ikwaha cinci uhiyu akaarupa, kanvoliya itala ni ntthona, ikwaha cinci akoona itthu yoolya, kanririnnya* ni akaarina itthu yoowara.*
28 Uhiya nnya citthu cinkhitiriya woninyannya, ihaavo itthu inkihiya nimasukhuli khula nihuku: mi kinaakhalela iwasi-waasi maloko otheene. 29 Ntthu alolovacakavale, miiva ciicammo kinaasanka. Ntthu akakathuwakavale ahiyaka waamini, miiva kinkhala ooriipiya nrima cinene.
30 Wakhala wiira kihaana wiittottopa, miiva kinaahala wiittottopa nlattu wo citthu cinthoonyera wiira miiva kikhanle oovyaavyaa. 31 Nluku ni Apaapaaya Apwiiyeehu Yesu, Ale anlamuliya uttitthimihiya mpaka, anaacuwela wiira akinootha. 32 Nsatoro o Tamaasku, aathanliye naamwene Areta, ahoweesa makwarta mmamikhorani co usittatti wiira akitthuke, 33 masi kinaheliyeene nsestuni, kahokumihiya nsittattimmo kavirihiyaka wacanelani yaaphwanyannya wasirini yo isittattiiyo.