Miteko co Mapostolu
16 Vano, uyo ahophiya u Terpe ni u Listra. Nwo, ahaavo ntthari mmoca eehaniya Timotiyu, mwaana a nthiyana mmoca o Yuteya, aamwaamini Nluku, masi athumwaane yaari nkereku. 2 Ni mayamunna o Listra ni o Ikoniyu yammuuluma saana uyo nttharyuuyo. 3 Paulu wahoncivela wiira Timotiyu anveleele ni ahomuuliha nlattu wayuuta yaakhala uyo ncokooyo, kontha atthu otheene yancuwela wiira athumwaane yaari nkereku. 4 Ukati weettakacaaya nnyo isittattinnyo, yaanaahimerya mayamunna citthu caalakeliye nimaapostolu ni mahumu yaari u Yerusalemu, wiira yiiwelele nnyo ikettelonnyo. 5 Nlattu woopanka commo, maloko yanlipa nhina waamini ni yaanonnuwa khula nihuku.
6 Ayo yahorwaa u Firiisiya ni ncoko wo Kalaasiya, kontha nnepa wowaarya wahowaakhottiiha ulalyeera nuulumo na Nluku iprovinsiya yo Asiya. 7 Uhiya commo, ukati waarweelyaaya u Miisiya, yahomananiha urwaa u Pitiiniya, masi nnepa wa Yesu wahaakhottihera. 8 Phimaana, yahovira u Miisiya ni yahorwaa u Trowate. 9 Uhiyu, Paulu ahokhalana iwooni, ni ahomoona nlopwana mmoca neemenle anlepelaka isontte, amwiirelaka: “Uwe u Masetoniya waanikavihere.” 10 Ukhalana wawe iyo iwooniiyo, nahomananiha urwaa u Masetoniya, hi noonihile toko Nluku phaanihanne wiira nalalyeere ihapai comaana.
11 Vano, ukhuma wihu u Trowate nahokela ikalawa mpaka u Samotraasiya, masi waaseele nahorwaa u Neyaapoli. 12 Ukhuma wihu nwo, nahorwaa u Filipo, u Rooma, ni isittatti yuulupale yoncoko wo Masetoniya. Nahokhala iyo isittattiiyo mahuku vakaani. 13 Nihuku nosaapatu, nahokhumela nkhora woosittatti ni nahorwaa wakhiviru nimooloko, kontha noona wiira nwo naahaavo nipuro noolompa. Nahonkoma ni nahopacera uwuulumana athiyana yaatthukumanne nno nipuronno. 14 Ahaavo nthiyana mmoca, aaviriyana eehaniya Litiya, aatumiha ikuwo consurukhu mwinci, aari oosittatti yo Tiyatira ni aanonswalela Nluku. Ni Yehova ahohula nrimaawe wiira anviriyane sana-saana Paulu itthu yaahimyaawe. 15 Upattisiya wawe uyova ni atthu otheene oowannyawe, uyo ahaakhanyereriha waalattula eeraka: “Mwakoona ukhala ookhuluvelya wa Yehova, nttwee mwalukame uwaani.” Ni ukhala wiira uyo ahonikhanyereriha, hi nahontthara.
16 Nihuku nimoca narwaaka nipuro noolompa, ahoniphwanya nthiyana mmoca aari nanteko, aakeliye nimaciini yaamwiiriha uhimya citthu caahala wiirannya uhoolo. Uyo, aanaphwanyiha nsurukhu mwinci ale aavarelaawe nteko, ahimyaka coohoolo. 17 Uyo nthiyanooyo, aanontthara Paulu ni hiiva akhuwelaka: “Ala alopwanaala akhanle ipottha ca Nluku nkhulupale ni anoolalyeerani nttala wowoopola.” 18 Uyo, ahopanka iyo itthwiiyo mahuku menci. Vano, Paulu ahoocya, ahorukunuwa ni aheerela nciininno: “Kinwiirela mwancina na Apwiiya Yesu Kristu, unkhume.” Ni nciininno naahokhuma ukati yooyo.
19 Ukati ale yaavarelaawe nteko wonnyaaya wiira khayaahala uphwanya-tho nsurukhu mwinci, yahonvara Paulu ni Sila mpaka yahaarweeha waatthuni waari akhulupale. 20 Yahaakusa ni yahaarwaana waahooleli okuvernu ni yaheera: “Ala alopwanaala anaanyakuliha isittattiihu. Ala akhanle ayuuta 21 ni anawiitthuciha ileema hiiva ninaateelihiyeehu weettela, ukhala wiira hi nikhanle arooma.” 22 Vano, atthu otheene yahaarukunuwela. Vano, ahooleli okuvernu yahaarula ikuwo ni yahoruma wiira yaattiye niikopo. 23 Uwaattakaca waya venci, yahorwaa waatthukela nkhattya ni yahomwiirela nkhalenli okhatteyooyo wiira aakhalenle saana. 24 Urumiya wawe, uyo aahaakusa ni ahaarwaana nkhattya yonhina ni ahaatthukelela metto caya nthaapwani.
25 Vano uhiyu, Paulu ni Sila, yanlompa ni yaanonttottopela Nluku yiipacaka macipo, ni atthu akhwaawe yaatthukeliye yanwiiwa. 26 Woohipica, yahottettemela venci itthaya ni alisersu okhatteyaayo yahottikhinyaa. Yooyo ukatyuuyo, cahotthukuwa mikhora cotheene ni unyolo waatthukeliye maperesooyo wahokattuwaca. 27 Ukati nkhalenli okhattya wonwilyaawe ni woona wawe wiira mikhora cokhattya caari coohulya, ahokusa ikatanaawe ni aapheela wiiciiva, oonihaka toko atthu yaatthukeliye yahotthawa. 28 Masi Paulu ahokhuwela, eeraka: “Uhiiciive, kontha hi nihaavo mu!” 29 Vano, uyo aholepela nthuko, ahokela atthawaka ni attettemelaka, ahokhoroma uhoolo wa Paulu ni Sila. 30 Uyo ahaakumihera vate ni ahaakoha: “Kipankeke isiyani wiira koopwe?” 31 Ayo yahomwaakhula: “Uwaamini Apwiiya Yesu ni unaahala woopwa, weeva ni atthu otheene owapuwani waa.” 32 Ni yahonhimerya moolumo a Yehova, uyo ni atthu otheene owapuwani wawe. 33 Uyo ahaakusa yooyo uhiyuuyo uwannyawe ni ahaarapihaca makhwattaaya. Vano, uyo ni atthu otheene oowannyaawe yahopattisiya woohipica. 34 Uyo aahaakusa uwannyawe ni aahaavaha iyoolya, uyo ni atthu otheene oowannyawe yahotteeliya nrima nlattu woomwaamini Nluku.
35 Usa waya, ahooleli okuvernu yahaaruma makwaarta wiira yamwiirele nkhalenli okhattya: “Waatthukule ayo alopwanaayo.” 36 Nkhalenli okhattya ahonhimerya ayo moolumwaayo Paulu, amwiirelaka: “Ahooleli okuvernu ahoruma wiira kuutthukulaceni ooyeeli. Vano, pooti ukhuma nrweeke ninnema.” 37 Vano, Paulu ahowiirela: “Ayo anaattakacile waatthuni woohinihukhumu, uhookhalaru wiira hiiva nikhanle arooma, ni ahonitthukela nkhattya. Vano, ampheela unikumiha mmwiitihoni? Mena! Aweeke asinene yaanikumiheke.” 38 Akhalenlyaayo yahaahimerya ayo moolumwaayo ahooleli okuvernu. Vano, ayo yahoova wiiwa waya wiira ayo alopwanaayo yaari arooma. 39 Vano, ayo yahorwaa mpaka nkhattya waaryaaya ni yahaalepela wiira yaalevelele, ni waakumihera waya vate, yahaalepela wiira akhume nsittattimmo. 40 Uhiya commo, Paulu ni Sila, ukhuma waya ukhattya, yahorwaa uwannyawe Litiya. Ukati waawonnyaaya mayamunna, yahaalipiha. Ni waalipiha waya yahorwaa.