Iwarakha yoopacera yantikheliyaaya akorintu
14 Mwiikurumice ufenta, masi ciicammo nhihiyerere wiikurumica uvara miteko cinkhitiriinyu coominepani, venci-venci, wiitthuciha inatiri ca Nluku. 2 Kontha ule nooluma iluuka cikiina khanwuulumana apinaatamu, masi Nluku. Kontha khaavo neewa itthu inhimyaawe, hataa ukhalaka wiira nuuluma isiri ca Nluku akaviheriyaka ninnepa wowaarya. 3 Ule nohimyaca citthu cinhala wiirannya uhoolo, nawaalipiha ni nawaamaaliha apinaatamu nimoolumwaawe. 4 Ule nooluma iluuka cikiina neelipiha imwaneennyaawe, masi ule nooluma citthu cinhala wiirannya uhoolo, nowaalipiha mayamunna owanlokoni. 5 Mi wankicivela otheene winyu nkhitiriki wuuluma iluuka cikiina, masi phataari nhimyace citthu cinhala wiirannya uhoolo. Kontha khweeliini, ule nohimyaca citthu cinhala wiirannya uhoolo phiri muulupale unvikana ule nooluma iluuka cikiina, uhikhanle wiira uyo ntthuuyo naataphulela itthu inoolumaawe, wiira mayamunna owanlokoni akhale olipihiya. 6 Masi mayamunna, kinawile wuuthotolani kuulumaka iluuka cikiina, itthuni yomaana yaahalaaka upanka? Kapheela wuukaviherani kihaana koolumaka citthu cooniheriyaaka, citthu cincuwelaaka, citthu cinhala wiirannya uhoolo awula uwiitthucihani.
7 Phiitthu imocaaru ineerannya ni citthu cihirina ukumi masi cinruma, toko: Mpetta awula viyola. Wakhalaka wiira ntthu nomoopa mpetta awula viyola khanvirikaniha woorumiha va, tipani nohala ucuwelela marumelwaaya nnya ikarumannya? 8 Vano nipalapatta naahirumeke saana, tipani nohala wiitthenkaca wiira arwee ukhottoni? 9 Inanna imocaaru, moolumaka iluuka cinci cinrika wiiweehiya, tipani nohala ucuwelela itthu impheeleenyu uhimya? Khweeliini, upanka commo unlikanaca wuulumana iphyoo. 10 Hataa ukhalaka wiira mu ntuniyani mu cinawuulumiya iluuka cinci coovirikana, uhookhalaru commo khiivo hataa iluuka imoca ihinhimya itthu. 11 Kontha, kaahicuweleleke itthu impheelaaya uhimya moolumo aneewaaka, ntthu noolumacooyo nohala ukoona khampa ntthu olapo ikhwaawe, ni miiva ciicammo kinhala umoona khampa ntthu olapo ikhwaawe. 12 Vano, ukhala wiira nyuuva mwaatthiva nnaapheela cinene ukhitiri uvara miteko coominepani, mwiikurumice cinene uvara miteko cinhala waalipiha mayamunna o wanlokoni.
13 Phimaana, ule nokhitiri wuuluma iluuka cinci alompe wiira akhitiri utaphulela itthu inoolumaawe. 14 Kontha, miivano kalompaka niiluuka ikhwaawe, kinkhitiri ulompa kikaviheriyaka ninnepa wowaarya, masi miiva, khiivo incuwelaaka. 15 Vano isiyani inlamuliya upankiya? Mi kinaahala ulompa kikaviheriyaka ninnepa wowaarya, masi ciicammo kinaahala ulompa niiluuka kineeweehaaka saana. 16 Masi ciicammo, mwanttottopelaka Nluku nkaviheriyaka ninnepa wowaarya, ntthu oohicuwelaca ri iriyariinyu nohala wiira cani “amem” nuuyo khacuwelenle itthu ihimileenyu? 17 Khweeliini nyuuva nnanlompa Nluku saana, masi nkhunaninyu khankhala oolipihiya. 18 Kinansukhuru Nluku nlattu wookikavihera wuuluma iluuka cinci wuupwahani nyuuva. 19 Masi, mi kinawaamini wanlokoni wuuluma moolumo mathanu paasi wiira yiiweehiye itthu impheelaaka uhimya, uhiya wuuluma moolumo 10.000 oluuka ikhwaawe ahinhala wiiweehiya.
20 Mayamunna, nhuupuwele khampa asaana, masi muupuwele khampa atthu oolupale. Nkhale khampa asaana nhina citthu coohinamaana. 21 Munlamuloni uhantikhiya co: “‘Niiluka yaatthu olapo ikhwaawe, ni nimalaku aatthu ahincuweliya unkhumaaya, kinaahala uwuulumana ala apoovwaala, masi hataa ukhalaka commo ayo khanhala utthuna ukiviriyana,’ neera Yehova.” 22 Phimaana, ukhitiri wuuluma iluuka cinci, nikhanle nthoonyero ninwiiriha atthu ahinonkupali Kristu wancera umwaamini, masi ukhitiri utaphulela citthu cinhala wiirannya uhoolo ikhanle itthu impankeliyaaya atthu ahinonkupali Kristu. 23 Vano, wakhalaka wiira mwaatthi nnaathukumana ni khula ntthu nawuuluma iluukaaweru, ni anaakela atthu oohiitthucihiya myaha ca Nluku ni atthu ahinonkupali Kristu, niireke wiira ayo atthwaayo khanhala wiira nyuuva mwaatthi nhovahuwa? 24 Masi, mwakhalaka wiira otheene nnawuuluma citthu cinhala wiirannya wahoolo ni akelaka ntthu hiitthucile myaha ca Nluku awula himmwaamini Kristu, uyo naahala uhukhumwiya ni cinaahala unvara nrima sana-saana nnyo myahannyo. 25 Isiiri cirinaawe wanrimani uyo ntthuuyo, cinaahala uhimyaciya, mpaka uyo naahala ukhoroma ni wuuramela vathi ni nunswalela Nluku eeraka: “Nluku khweeliini ri ni nyuuva mwaatthiva.”
26 Vano isiyani mayamunna inlamuliyeenyu upanka? Mwathukumanaka vale, akhale ule neepa isaalimu cinonttottopela Nluku, ule neetthuciha, ule nohimyaaca citthu cihimyeeriyaawe ni Nluku, ule nooluma iluuka coovirikana ni ule notaphulela itthu inoolumiya. Citthu cotheene nnya mpanke mpheelaka wiira nlipihane. 27 Vano wakhalaka wiira ntthu nawuuluma iluuka ikhwaawe, inlamuliya upankiya iyo itthwiiyo naatthu eeli awula araru, ni khula ntthu nolamuliya wuuluma ikwahaaweru, ni ciicammo nolamuliya ukhala ntthu ootaphulela. 28 Masi, aahikhaleke ntthu ootaphulela itthu inoolumaawe uyo ntthuuyo, uyo nolamuliya umaala wathukumaniye va ni umuulumana Nluku wanrimani wawe. 29 Maporofeeta eeli awula araru phinlamuliya wuuluma, vano atthu akhwaawyaayo anlamuliya waaca wuupuwela paasi itthu impheelaaya uhimya ayo maporofeetaayo. 30 Vano, wakhalaka wiira ntthu naahimyeriya ni Nluku itthu wonkomenlyaawe, ule oolumaca amaale. 31 Kontha otheene winyu pooti waneetthuciheenyu inatiri ca Nluku, masi khula ntthu oolume ikwahaaweru, wiira atthu otheene yiitthuce ni alipihiye. 32 Maporofeeta anlamuliya weettihera saana nteko weeporofeeta uvahaceriyaaya ni Nluku. 33 Kontha Nluku khanakhala Nluku hinthotokaniha citthu cawe, masi khanle nannema.
Khampa ciryaaya maloko otheene aatthu ookhuluveliya, 34 athiyana khanlamuliya wuuluma mmalokoni, kontha khantthuniheriya upanka iyo itthwiiyo. Uhiya commo, khampa nlamulo ninhimyaaya, ayo anlamuliya uthoonyera wiiwelela. 35 Yapheela ucuwela itthu, yaakohe awannyaya anari uwaani, kontha inkhala itthu yowuulihaca muru nthiyana wuulumaca wanlokoni.
36 Niireke phi nyuuva mpattusacile nuulumo na Nluku? Niireke nyuuva paasi phihimyeeriye ayo moolumwaayo?
37 Wakhala wiira haavo neecoona ukhala porofeeta awula nocuwela upanka itthu akaviheriyaka ni nnepa wowaarya, uyo ntthuuyo haana akupaleelaka wiira citthu kinwantikhelaakani akhanle marumo Aapwiiya. 38 Masi ntthu aahiwacereke nnya citthunnya, uyo ntthuuyo ciicammo khanhala uwaceriya. 39 Phimaana mayamunna, nhihiyerere wiikurumica ukhitiri wiitthuciha citthu cinhala wiirannya uhoolo; masi, nhimwaateelihe ntthu wuuluma iluuka cikhwaawe. 40 Masi, citthu cotheene cipankiye nimananna omaana ni oothotokannya.