Miteko co Mapostolu
9 Saulu, nalakenleene waahuviha ni uwiivakaca atthari a Apwiiya, ahorwaa wanankuttho muulupale 2 ni ahonlepela iwarakha yoweettana mmasinakooka u Tamaasku, wiira aatthuke ni aarwaane u Yerusalemu otheene ale yaahalaawe waaphwanya yeettelaka iyo iphirweeyo, alopwana ni athiyana.
3 Eettakoono, aattamelaka u Tamaasku, woohipica, yahommwaleela iluusu yaakhuma wiirimu , 4 ni uyo aahomorela vathi ni aheewa ncu niiraka: “Saulu, Saulu unkilupatthelani?” 5 Uyo ahokoha co: “Nyuuva mwaapani?” Uyo ahaakhula: “Thi miiva Yesu, ule unonlupatthaa. 6 Masi, wunwe ni urwee usittatti ni nwo unaahala uhimeriya itthu inlamuliyaa upanka.” 7 Ni alopwana yaari nkhayi ni Saulu yaaheemelaca anatikhinihiye, kontha khweeliini yaheewa ncu nuulumacaka, masi khayaamoonile ntthu. 8 Saulu ahunwa vathi va, ni uhookhalaru wiira anweha, khaakhitiri woona itthu. Phimaana, ahovareliya moono ni ahorwaaniya u Tamaasku. 9 Ni ahoviriha mahuku mararu woohoona, woohilya ni woohiwurya.
10 U Tamaasku ahaavo ntthari mmoca eehaniya Ananiyasi, ni Apwiiya yahomwiirela nwoonini co: “Ananiyasi!” Uyo ahaakhula eeraka: “Pwiiya kiri va.” 11 Apwiiya yahomwiirela: “Wiitthenkace ni urwee iphiro ineehaniya Direita. Wapuwani wawe Yuuta, unaahala umphwanya nlopwana neehaniya Saulu, o Tarsu, ula uwakatyuula naalompa. 12 Uyo aahookhalana iwooni, ahomoona nlopwana mmoca eehaniya Ananiyasi akelaka ni anvaraka ni matataawe wiira aturuwele woona.” 13 Vano, Ananiyasi ahaakhula eeraka: “Pwiiya, mi kiheewa oolumiyaka uyo nlopwanooyo ni citthu coohinamaana caapankilyaawe atthariinyu u Yerusalemu. 14 Ni mu uyo haana ukhulupale uvahaceriyaawe ni anankuttho oolupale wiira aatthuke atthu otheene ale anromola ncina ninyu.” 15 Vano, Apwiiya yahomwiirela: “Urwee, kontha uyo nlopwanooyo kinonthanla, wiira aacuwelihe ncina naka atthu otheene, mamwene ni asaana o Isarayeli. 16 Kontha kinaahala unthoonyera mananna cinhalaawe uhuva nlattu wo ncina naka.
17 Vano Ananiyasi, ahorwaa iyo inupeeyo ahomweera matataawe ni ahomwiirela: “Saulu, munnaaka, Apwiiya Yesu yookhumelenle iphiro yaawelaa, ahookiruma wiira kuukavihere woona ni wiira nnepa wowaarya ukhale ni weeva.” 18 Yooyo ukatyuuyo, yahommora-mora makahapapa mmiithoni wawe ni uyo ahopacera woona. Vano, aahommwa ni ahorwaa upattisiya, 19 aholya ni cahonturuwela ikuru.
Uyo ahokhala mahuku vakaani naatthari o Tamaasku, 20 ni woohipica ahanca ulalyeera mmasinakooka wiira Yesu aari mwaana a Nluku. 21 Masi atthu otheene yiiwa, yaahokhala ootikhinihiya ni yaheera: “Khanakhala ula nlopwana aalupattha atthu yaavarela nteko nno ncinanno u Yerusalemu? Khaawile mu wiira aacise ni aatthuke wiira aarwaane waanankuttho oolupale?” 22 Masi Saulu anvira atepaka wuunuwa nhina mminepani; aanatikhiniha ayuuta yaakhala u Tamaasku nlattu wo waathoonyera wiira Yesu, khweeliini aari Kristu.
23 Vano, anavinreene mahuku menci, ayuuta yaholeehana umwiiva. 24 Vano, Saulu ahocuwela wiira aapheeliya wiiviya. Ayo ciicammo yankhalenla mikhora uthana ni uhiyu wiira amwiive. 25 Phimaana, attharyaawe yahoncisa uhiyu yahonhela nsestuni ni yahonviriha wacanelani yo wamuuruni yankumiheraka vate.
26 Uphiya wawe u Yerusalemu, ahomananiha waatakaneelana atthari akhwaawe, masi ayo yammova, konttha khayaamini wiira uyo aari ntthari. 27 Phimaana, Pernape ahowa unkavihera ni ahoncisa mpaka wo maapostolu. Vano, ahanca waattonkela mananna Saulu awonnyaawe Apwiiya mparapaarani, mananna Apwiiya yamuulumannyaaya ni mannaana Saulu aalalyenryaawe alipaka nrima u Tamaasku mwancina na Yesu. 28 Vano Saulu ahokhala nkhayi naayo ni aaneetta u Yerusalemu woohoova,* alalyeeraka mwancina na Pwiiya alipaka nrima. 29 Uyo aanooluma ni aanaanyakulihanana ayuuta yuuluma ikereeku, masi ayo yammananiha umwiiva. 30 Ukati mayamunna yaacuwenlyaaya iyo itthwiiyo, yahonrwaana u Sesareya ni yahonveleeliha u Tarsu.
31 Vano, maloko otheene o Yuteya, o Kalileya ni o Samariya, yaahokhala ni nnema ni yanlipihiya. Ni ukhala wiira yammoova Yehova ni yammaalihiya ni nnepa wowaarya, ayo yanvira yuncererannyaaka.
32 Ukhala wiira Peturu aaneettakaca ncoko wotheene, ahorwaa ciicammo waathotola mayamunna, yaakhala u Lita. 33 Nwo ahomphwanya nlopwana mmoca eehaniya Ineeya, aavirihile myaaka 8 nari wankorini nlattu wowuntakya. 34 Peturu ahomwiirela: “Ineeya, Yesu Kristu hoovoniha. Wunwe ni ulokihace nkoryooyo.” Uyo ahommwa woohipica. 35 Atthu otheene yaakhala u Lita ni u Saro, umoona waya nlopwana aavonihiyooyo yahaakupali a Pwiiya.
36 U Yope ahaavo nthiyana mmoca ntthari eehaniya Tapita,* nataphuleliyaka nno ncinanno maanaaya Torka. Uyo nthiyanooyo, ampanka citthu cinci comaana ni aanakavihera amasikhini. 37 Ale mahukwaale, uyo aahowerennya ni ahokhwa. Vano, aahocisiya ni aheesiya isaala yooculu. 38 Ukhala wiira u Lita waari wakhiviru ni u Yope, ni nwo phaaryaawe Peturu, ucuweliya waya wiira aari iyo isittattiiyo, atthari yahaaruma alopwana eeli wiira yamwiirele: “Sontte, uwe woohipica.” 39 Vano, Peturu aheetthenkaca ni ahorwaa nkhayi naayo. Uphiya wawe nwo, ahorwaaniya isaala yooculu, ni manankhweli otheene yahonrukureerya. Yunlaka ayo yammoonihera ikuwo cinci ni cikhwaawe Torka caattotthilyaawe nari nkhayi naayo. 40 Peturu ahaalepela atthu otheene wiira akhumele vate, ahokhoroma ni aholompa. Vano, ahowehanana mahithyaayo ni aheera: “Tapita wummwe! Uyo ahotthukhula miitho ni umoona wawe Peturu, ahonkoma. 41 Peturu, ahonvarela ntata ni ahomunwusa, ahowiihana atthari akhwaawe ni anankhweli, ni ahowoonihera Tapita nari nkumi. 42 Atthu otheene o isittatti yo Yopi yahocuwela iyo itthwiiyo, ni atthu enci yahowaamini Apwiiya. 43 Ni uyo, aahokhala mahuku menci u Yope ninlopwana mmoca aavara nteko ninttapala, eehaniya Simau.