Miteko co Mapostolu
26 Akiripa ahomwiirela Paulu: “Unaatthuniheriya wuulumaca wiira wiicaakihe.” Vano, Paulu ahowusa ntata ni ahopacera wuulumaca wiira eecaakihe eeraka:
2 “Nuulumaka citthu cotheene ayuuta ankootheryaaya, amwene Akiripa, unaakitteela nrima wiicaakiha uhoolo winyu Akhulupale, 3 venci-venci kontha nyuuva nnaacuwela ileema cotheene ni uvaanyihana waayuuta. Phimaana, kinaalepela mpise nrima ni nkiviriyane.
4 “Khweeliini, kuulumaka makhalelwaaka ikhumelo kaaryaaka mmirawo, iriyari yaapoovwaaka ni u Yerusalemu, ayuuta otheene 5 ankicuwela ikhumelo yokhalayi, anaacuwela wiira mi kaakhala khampa nfariseu keettelaka mattharelelo ottiiniihu, ayo yapheelaka pooti uvaha usaahiti. 6 Masi, nlattu wo niweherero nirinaaka Nluku aakhuluvelihilyaawe asinhiya-taateehu, phinhukhumweliyaaka ilelo. 7 Wiirannya waya nno nikhuluvelihonno malokweehu 12 phinwehereraaya woona, yanvarelaka nteko Nluku woohihiyerera uthana ni uhiyu. Ukhanle nlattu wo nno niwehereronno kinootheriyaaka naayuuta amwene Akiripa.
8 “Nlattuni unoorikelaayani ukupali wiira Nluku naahala uwunweleliha atthu ookhwa? 9 Mi mwaanennyaaka, kankupali wiira kanhala ukhitiri umalamaliha ncina na Yesu o Nasaree, mapuro otheene. 10 Iyo phi itthu ipankilyaaka u Yerusalemu. Kaanaatthukela nkhattya atthu ooreera nrima enci, kontha kahovahiya ukhulupale wiira kipanke iyo itthwiiyo naahooleli aanankuttho, ni ukati waarwaniyaaya wiiviya, mi wankicivela. 11 Mmasinakooka motheene, kaanaattarusa ikwaha cinci kimananihaka waakhanyereriha wiira ahiye waamini waya. Ukhala wiira kaahowaaviruwela venci, kahopacera waalupattha isittatti cikhwaawe.
12 “Nlattu wo iyo itthwiiyo, phaakiirihile urwaa u Tamasku, kinari niikuru ni ukhulupale kaavahiyaaka naahooleli aanankuttho. 13 Amwene, ninari niiparapaara, meetiiya, kahoona iluusu yaakhuma wiirimu ni yaapharela cinene upwaha upharela woncuwa, yaahokirukureerya nipuru naaryaaka ni yahaarukureerya atthu yaari nkhayi ni miiva. 14 Otheene cinyu nahomorela vathi, vano kaheewa ncu nuulumaka niluuka iheperewu niiraka: ‘Saulu, Saulu, unkilupatthelani? Wamananihaka ukaanana uneecooniha uwerya mwaneennya.’ 15 Ni miiva kahaakoha: ‘Nyuuva tipani pwiiya?’ Ni Apwiiya yahokaakhula: ‘Mi ki Yesu, unonlupatthaa. 16 Masi wunwe ni weemele. Kuukhumelenle wiira kuuthanle ukhale nantekwaaka ni saahityaaka o citthu woonilyaa ni cinhalaaka uwoonihera cinkuuluma miiva. 17 Ni kinaahala uwoopola mmatatani waala apoovwaala ni atthu ahikhanle ayuuta, mapuro kinhalaaka wuuruma; 18 wiira waahule miitho, waakumihe wapiphini waarwaanaka waluusuni ni mmatatani wa Sotwani, waarwaanaka wa Nluku, wiira aleveleliye itampi caya ni yaakhele mapuro nkhayi naale areerihiye nlattu wookaamini.’
19 “Phimaana, amwene Akiripa, mi kaheewelela ncu neewilyaaka naakhuma wiirimu. 20 Masi, kaapaceraka atthu o Tasmasku, uweelela o Yerusalemu ni atthu otheene oncoko wo Yuteya ni ciicammo atthu ahikhanle ayuuta, kahorwaa waalalyeera wiira attharuwe ni amwaamini Nluku, yavaraka citthu cinoonihera uttharuwa. 21 Nlattu wo iyo itthwiiyo, ayuuta yahokivara ntempulu ni yahomananiha ukiiva. 22 Masi, ukhala wiira Nluku naakikavihera mpaka ilelo, akinhiyerera waalalyeera ooyevaca ni oolupale, akinooluma hataa itthu ihikhale ile yantikhiye nimaporofeeta ni Moocesi yenryaaya wiira yanhala wiirannya: 23 wiira Kristu ahaana ahuvaka, ni khampa oopacera wunwelelihiya, anhala ulalyeera iluusu yaala apoovwaala hataa yaatthu ahikhanle ayuuta.”
24 Ukati Paulu woolumaawe eecaakihaka, Festu ahokhuwela eeraka: “Paulu wee unaavahuwa! Ucuwelaca waa unawuuvahusa!” 25 Masi, Paulu ahaakhula: “Akinavahuwaka itthu Akhulupale Festu, masi kinhimya moolumo eekhweeli ni owuupuweliya saana. 26 Khweeliini, amwene kinwuulumanaaka woohakhuwakhuwa anaacuwela nnya citthu cotheenennya sana-saana; kinaakupaleela wiira khiivo hataa itthu yuulumilyaaka ahicuwelenlyaaya, kontha citthu cotheene nnya khiivo ipankiye mmwiitihoni. 27 Amwene Akiripa, nnawaakupali maporofeeta? Kinaacuwela wiira nnawaakupali.” 28 Vano, Akiripa ahomwiirela Paulu: “Ukati vakaani wanhala ukiiriha ukhala nkristau.” 29 Vano, Paulu ahaakhula: “Kinanlepela Nluku wiira ukati vakaani awula ukati mwinci, kahi nyuuva paahi Akhulupale, masi, otheene ale ilelo ankiiwelela, wiira akhale khampa miiva masi woohitthukiya nuunyolo.”
30 Vano, amwennyaayo yahonwa, hataa kovernatoore, Perenise ni alopwana yonkomacile nkhayi naayo. 31 Ni waakhumaaya, yaanawuuluma ayaayoru yiirelanaka: “Ula nlopwanoola khiivo ipankilyaawe yootakhala inomphwanela wiiviya awula utthukiya.” 32 Vano, Akiripa ahomwiirela Festu: “Ula nlopwanoola anhala utthukuliya hilepenle uhukhumwiya ni Seesari.”*