Yonayeeli ya Akorintu
3 Niireke wiira hiiva nihaana neehimyacaka-tho nikhanle naapani? Niireke wiira nihaana nooveleeliherakani iwarakha neettottopaka toko atthu akhwaawe ampankaaya? Awula nyuuva phinlamuliya uveleeliha iwarakha nnittottopelaka? 2 Nyuuva mwaatthi phikhanle iwarakha cantikhiye wanrimani wihu, cincuweliya ni cinsomiya naapinaatamu otheene. 3 Kontha nyuuva mwaatthiva nnawoonihera sana-saana wiira nkhanle iwarakha ya Kristu. Yantikhiye ni hiiva nikhanle anantekwaawe, kahi niitinta, masi ninnepa wa Nluku nkumi; iyo iwarakheeyo kahi yowantikhiya wanlukuni masi wanrimani.
4 Hiiva kontha ninonswalela Nluku nlattu wa Kristu. 5 Khaninapheelaka uhimya wiira hiiva phiicoonile wiira unaaniphwanela uvara ula ntekoola, masi Nluku phinivahacenre, 6 kontha uyo phinikhitirihile ukhala aswali onleehano nonaanaano, kahi onlamulo nantikhiye, masi onnepa wowaarya, kontha nlamulo nantikhiye ninaawaana ukhwa, masi nnepa wowaarya unvaha ukumi.
7 Vano, nlamulo naawaana ukhwaanno ni nantikhiye wanlukuninno, nahokumiheriya nuuttitthima mpaka Asarayeli wahaakhitiryaa uweha ikhove ya Moocesi nlattu wowaarya. Masi nwo uttitthimanwo wanhala umalamalihiya. 8 Vano, wakhala wiira nno nlamulonno naahokumiheriya nuuttitthima, niireke nnepa wowaarya khunhala utepa uttitthima? 9 Ukhala wiira nnlamulo naawaana ukhwanno nahaana uttitthima, niireke nteko unaakavihera atthu ukhala anasariya, khunhala utepa uttitthima? 10 Khweeliini, hataa itthu yaari yoottitthima khalayi, ihohiya uttitthima nlattu woopwahiya uttitthima waya. 11 Vano, wakhala wiira ile yaahala umalama yaakumiheriye nuuttitthima, niireke khiyaahala utepa ukhala yoottitthima ile ihimmalamala?
12 Ukhala wiira nihaana uyo nwehererooyo, hi ninawuuluma woohaanyihacera mena vakaani, 13 ni hi khanimpanka khampa Moceesi, aattiyelela uwiitho wawe ninleeso wiira Asarayeli ahoone itthu yaahala wiirannya niile yaahala umalamalihiya. 14 Masi moopuwelelwaaya khanvara nteko, ni mpaka nna ankhala khampa ahoottiyeleliya ninleeso ni khankhitiri wiiweeha nleehano nokhalayi, ni nno nleesonno Yesu Kristu phinhala ukhitiri ukumiha. 15 Uhiya commo, nrimaaya uri woottiyeleliya mpaka nna, phimaana ayo khankhitiri wiiweeha citthu cantikhilyaawe Moocesi. 16 Masi, ntthu alakela unswalela Yehova, nno nlesonno ninaakumihiya. 17 Yehova khanle nnepa ni nipuro uryaaya nnepa wa Yehova, nno nipuronno uhaavo utaphuwa. 18 Otheene hiiva nikumihile nleeso uwiitho wihu va, ninkhala khampa ispeeliyu inoonihera uttitthima urinaawe Yehova. Hiiva nineera nitatusiyaka wiira nikhale khampa Nluku ni nitepe woonihera uttitthima urinaawe Nluku, toko nopheelaawe Yehova, ule khanle Nnepa.