Ya Arooma
9 Kinhimya ikhweeli mwancina na Kristu, ukhala wiira nrimaaka unaavaha usaahiti ni miiva, nhina nnepa wowaarya: 2 wiira kiri ooriipiya nrima cinene ni wiira ihaavo inkiwerya wanrimani waka ihimmaala. 3 Kontha, mi wankicivela ukhala ule mwalanihiye ni Kristu, laphakaciye wiira awoopole mayamunnaaka, amucyaaka, 4 asarayeli. Ayo phithanliye wiira akhale asaana a Nluku, wiira attitthimihiye, wiira apankaniye maleehano, wiira avahiye nlamulo, wiira avare nteko wowaarya ni wiira akhuluvelihiye. 5 Ayo ankhuma nloko naasinhiya-taateehu ni Kristu nokhuma nloko nenno. Attottopeliye Nluku naalamulela atthu otheene ni citthu cotheene mpaka. Amem.
6 Phimaana, kahi wiira itthu ihimilyaaya nuulumo na Nluku ihoohiirannya. Kontha khaanakhala asarayeli otheene, akhanle khweeliini asarayeli. 7 Khaanakhala asaana otheene Nluku nowoonaawe ukhala ucuulu wa Aparahaamu; uhiya commo: “Ule unhala wiihaniya ucuulwaa unhala uweela nloko na Isaaki.” 8 Iyo khintaphulela wiira asaana otheene Aparahaamu phiri asaana okhweeli a Nluku, masi asaana ayariye nnikhuluvelihoni na Nluku, phiri ucuulu weekhweeli wa Aparahaamu. 9 Kontha itthu yaakhuluvelihiye, yeera: “Uyo ukatyuuyo kinaahala uwa, ni Sara kinhala umphwanya narina mwaana.” 10 Iyo yeerannyeele kahi ule ukatyuule paasi, masi ciicammo ukati Repeka waayanryaawe asaana a nlopwana mmoca paahi, Isaaki nhiya-taateehu; 11 Kontha, ukati waaryaaya ahinayariya asaana hataa ahinapanka itthu yomaana ni yootakhala, Nluku hoonihera wiira uyo nopanka itthu impheelaawe kahi nlattu wo miteko ca ntthu masi nlattu wa Ule neehana. 12 Nluku ahomwiirela: “Omuulupalyooyo nohala ukhala ipottha yo mwankaannyuuyo.” 13 Toko cantikhiyaaya: “Mi kihonfenta Yakopi, masi kihonthanya Isawu ”
14 Vano ninhala uhimyani-tho? Niireke Nluku khanle oohisariya? Khweeliini mena! 15 Kontha uyo ahomwiirela Moceesi: “Mi kinaahala umoonela uthunku ule kinhalaaka umoonela uthunku, ni kinaahala umoonela ikiriri ule kinhalaaka umoonela ikiriri.” 16 Phimaana, iyo khinakhala utthuna wa ntthu awula wiikurumica wa ntthu masi wa Nluku, ule nowoonela uthunku atthu. 17 Kontha cowantikhiya cowaarya cahomwiirela Farawo: “Phimaana kuuhiilyaaka ukhala nkumi: wiira nlattu wawaa koonihere ikuru caka ni wiira ncina naka nilalennye ntuniyani motheene.” 18 Phimaana uyo naamoonela uthunku ule nompheelaawe, masi nanhiya wiicuunuwiha ule nopheela wiicuunuwiha.
19 Vano, unaahala ukiirela: “Kontha isiyani uyo nowehawehaawe citthu atthu anvonyanihaaya? Ni tipani nohala umwaateeliha upanka itthu inoncivela?” 20 Masi pinaatamu khanle tipani wiira annyakulihanane Nluku? Niireke ule numpiya naamwiirela ule nomumpa: “Kontha isiyani ukumpilya commo?”. 21 Isiyani? Niireke ule nuupa myaapu khanlakela itthu inhalaawe upankela ulokwaawe, wiira apankele uloko mmocaaru mwaapu unhala uheliya citthu cofayita ni nkinooyo unhala uheliya citthu coohifayita? 22 Vano ninhala wuulumani, kontha Nluku hataa apheelaka woonihera uviruwa wawe ni ucuweliha ikuru cawe haavilela atthu ootakhala nrima hataa yaphwanelaka utankanyiya. 23 Ni ninhala wuulumani ukhala wiira uyo pankile iyo wiira aacuwelihe mihakhu cawe coottitthima ale woonenlyaawe uthunku, aatthenkacilyaawe nenne nokhalayi wiira aattitthimihe, 24 hi niihannyaawe, kahi paahi ayuuta masi ciicammo amalaponi. 25 Toko cihimilyaawe nhina ilivuru ya Oseiya: “Ale yahaari apoovwaaka kinhala uwiihana apoovwaaka, ule ahaafentiya kinaahala unfenta. 26 Ni nipuro niireliyaaya: ‘Nyuuva khannakhala apoovwaaka,’ nno nipuronno anaahala wiihaniya asaana a Nluku nkumi.”
27 Uhiya commo, Isaiya naamuuluma Isarayeli eeraka: “Uhookhalaru wiira asaana a asarayeli akhanle enci toko nhaava woopahari, vakaani phinhala woopwa. 28 Kontha woohipica Yehova naahala waahukhumu atthu otheene owatuniyani.” 29 Toko Isaiya caahimilyaawe: “Yehova nhooleli aanatoropa ahaanihiyenre ucuulu, hi naahala ukhala khampa Sotoma ni Komora.”
30 Vano ninhala uhimyani? Ninhala wiira co: atthu ontuniyani hataa ukhalaka wiira khayiikurumicile ukhala atthu osariya, ahokhala anasariya, isariya imphwanyiha waamini. 31 Masi hataa ukhalaka wiira asarayeli yahiikurumica weettela nlamulo nosariya, ayo khayaakhitinri weettela nno nlamulonno. 32 Kontha isiyani? Kontha ayova khayiikurumicile nlattu wowaamini, masi yiikurumicile nlattu wo miteko caya. Phimaana, ayova ahokakathuwa “wanlukuni ninkakathuwiya,” 33 khampa cantikhiyaaya co: “Moone! Kinaweesa u Siyau nluku ninkakathuwiya ni mwala ummorosa, masi ule nohala waamini nlattu wo nno nlukunno khanhala ulolovaca.”