Iwarakha yoopacera yantikheliyaaya akorintu
4 Atthu anlamuliya unoona ukhala anamakavihera a Kristu ni atthu avahaceriye isiri ca Nluku. 2 Vano, ale aakhuluvelihiye isiri ca Nluku, anwehereriya wiira akhale ookhuluvelyaa. 3 Masi mi akinwacera mwakihukhumwaka ni kahukhumwiyaka niitiripunaali yaapinaatamu, ni khweeliini, hataa miiva kimwaneennyaaka akineehukhumu. 4 Kontha akincuwela wakhala wiira miiva kihovonya, masi akineera wiira miiva akinvonya, ukhala wiira Yehova phinkihukhumu. 5 Phimaana, nhinhukhumu hataa ntthu, mpaka unhalaaya uwa Apwiiya. Ayo anaahala woonihera citthu caavithiye ni ciicammo anaahala uhimyaca khula itthu ntthu rinaawe wanrimani wawe, vano Nluku naahala unvaha khula ntthu uttitthima wawe.
6 Mayamunna, mi ni Apolu niheettela nnya citthunnya wiira mphwanyere ifayita, nipheelaka wiira nlattu wontakihero nihu, mweettele ikano ineera: “Nhipanke citthu cihantikhiye,” wiira nhikhale atthu owiithenca, mwanthanlaka mmoca ni mwanthanyaka nkinooyo. 7 Tipani noovirikanihani naakhwiinyu? Khweeliini isiyani nyuuva irineenyu ihaakhenleenyu? Vano, wakhala wiira nhowaakhela citthu cotheene cirineenyu, kontha isiyani nniithenceenyu mwakhalaka khampa khamwaakhenle?
8 Nhotosiya? Nhokhala mathaciri? Nhopacera ulamulela hiiva nihinaaya? Mi wankicivela nyuuva nnapacenre ulamulela, wiira nihiiva ciicammo nilamulele nkhayi ni nyuuva. 9 Kontha unkhala toko wiira hiiva maapoostolu va, Nluku hoonithanla wiira nikhale oomalela ukela nkampu wiira nooniye naatthu otheene, kontha nimpheela wiiviya. Hi ninawooniya ntuniyani motheene naapinaatamu ni ciicammo ni malayikha. 10 Hiiva nikhanle atthu alolo nlattu wa Kristu, masi nyuuva nkhanle atthu oocuwelaca wamoca ni Kristu; hiiva nikhanle atthu oohilipalipa, masi nyuuva nkhanle atthu okuru; nyuuva nkhanle atthu oottitthimihiya, masi hiiva nikhanle atthu oovyaavyeehiya. 11 Mpaka nna co, hi inaanivola itala ni ntthona, cinaanithwaa ikuwo, ninawaattakaciya, khanirina nipuro noorupa 12 ni hiiva ninaavara nteko mwinci. Naruwaniyaka vale, hiiva ninancaaliha ntthuuyo; nalupatthiyaka vale, hiiva ninaavilela; 13 noolumiyaka pusya, hiiva ninawaakhula nimananna omaana; hi ninkhala khampa ikokhola contuniyani, mpaka nna co ninaathanyiya.
14 Kiwantikhenleni nnya citthunnya wiira kiwiitthuciheni khampa asaanaaka kinaafentaaka, kahi wiira kiwuulihihaceni muru. 15 Kontha hataa ukhalaka wiira mwahaana atthu 10.000 oowiitthucihani myaha ca Kristu, khweeliini, nyuuva khamwaarina asithumwaninyu; kontha phi mi kikhanle apaapeenyu nhina myaha ca Kristu Yesu, nlattu wo ihapari comaana. 16 Phimaana, mi kinwiirelani co: “Nkitakihe miiva.” 17 Nlattu wo iyo itthwiiyo, kinawuuveleeliherani Timotiyu, kontha uyo khanle mwanaka kinonfentaaka ni ookhuluvelyaa nhina miteko ca Apwiiya. Uyo naahala uwuupuserani mananna miiva kinonvarelaaka nteko Kristu Yesu, inanna kineetthucihaaka mapuro otheene anviraaka, ni maloko otheene.
18 Ahaavo aneettottopa, khampa wiira miivano akinhala uwa wuuthotolani. 19 Masi, Yehova atthunaka, mi kinaahala uwa wuuthotolani, ni kawaaka, akinhala upheela wiiwa moolumwaaya ayo atthu owiittottopaayo, masi kinhala upheela ucuwela wakhala wiira ahaana nnepa wowaarya awula mena. 20 Kontha umwene wa Nluku khunooniheriya nimoolumo paasi, masi unooniheriya ninnepa wowaarya wa Nluku. 21 Nnothanla isiyani? Nnopheela wiira ukati unhalaaka uwa wuuthotolani kiwaanane ikopo, awula nifento ni unamaana wonnepa wowaarya?