Yantikheliyaaya a Efesu
2 Uhiya commo, Nluku hoovahani ukumi, uhookhalaru wiira mwaari ookhwa nlattu wo matampiinyu. 2 Uyo ukatyuuyo, nyuuva mwaatthi mwaatthara meettelo o ila ituniyeela ni ciicammo mwaapanka citthu cinoncivela nhooleli o ila ituniyeela. Yooyo phineettihera moopuwelelo aatthu ahimmwiiwelela Nluku, moopuwelelo acanre ntuniyani khampa iphyoo. 3 Khalayi, otheene cihu naarina makhalelo toko ayo atthwaayo arinaaya, kontha naapanka citthu caanicivela ni citthu coopuweleehu. Ikhumelo ukati niyariyeehu, wanniphwanela umalamalihiya ni Nluku, toko atthu akhwaawe cinaaphwanelaaya. 4 Masi Nluku, ule noonela uthunku cinene, ni nlattu woonifenta cinene uthoonyenryaawe, 5 uyo honivaha ukumi wamoca ni Kristu, waahookhalaru wiira hiivano naahokhwa nlattu wo matampiihu. Nlattu woonamaanaawe woonironya, uyo howoopolani. 6 Uhiya commo, Nluku honivaha ukumi ni honivaha nipuro wiirimu wiira nunkome, kontha uyo honaataaniha ni Kristu Yesu. 7 Apheelaka wiira, ilapo yonaanaano inhala uwa, uyo oonihere cinene unamaanaawe woonironya, anipankelaka citthu comaana hiiva nimmwaatanana Kristu Yesu.
8 Nlattu wo uyo unamaana woonironya wa Nlukuuyo, nyuuva nhoopoliya nlattu woothoonyera waamini. Nyuuva khamoopoliye nlattu wo citthu cimpankeenyu, masi moopoliye nlattu Nluku wookhala namavaha. 9 Mena, nyuuva khamoopoliye nlattu wo citthu cimpankeenyu, wiira hikhale ntthu nohala ukhalana isariya yo wiittottopa. 10 Hi numpiye ni Nluku ni numpiye wamoca ni Kristu Yesu, wiira nivare miteko Nluku caanilakelenlyaawe wiira nivare.
11 Phimaana, nhiliyale wiira nyuuva nhiyariye wanlokoni naayuutava, khalayi mweehaniya “oohuulihiya” naatthu yeehaniya “owuulihiya,” wuulihiya waapankiya nimatata aapinaatamu. 12 Ule ukatyuule, nyuuva mwaatthi khamwancuwela Kristu, khamwaataana ni nloko naasarayeli, khamwaapanka mphantte wo nleehano naahela nhina inatiri ca Nluku; khamwaarina nweherero ni hataa ciicammo khamwancuwela Nluku. 13 Masi nna co, nyuuva nlattu woomwaataanana Kristu Yesu, nyuuva mwahancuwela Nluku va, nna co nnaancuwela nlattu wophome ya Kristu. 14 Kontha uyo phiri nnemanihu, uyo phiirihile ikhurupu piili ukhala imoca ni phikomolacile isiri yaakawaniha nnyo ikhurupunnyo. 15 Nlattu woovaherera irutthwaawe, uyo homalamaaliha malamulo a Moocesi, wiira ikhurupu coopiili cimwaataanane uyova, cikhale ntthu mmoca paasi. Ni uyo ciicammo howaana nnema, 16 wiira nlattu wo nipotto nawe noohuviheriya, ikhurupu coopiili cimwaataanane Nluku khampa irutthu imoca, kontha uyo homaliha uhiiwananiyanwo avarelaka nteko irutthwaawe. 17 Ni uyo howa, ni hoolalyeerani ihapari comaana wiira wahoolo ninaahala ukhala nnema, uyo hoolalyeerani nyuuva mwahancuwela Nluku va ni ciicammo honilalyeera hiiva nancuwela va. 18 Kontha nlattu wowiivaherera wawe, hiiva otheene nimpanka mphantte wo ikhurupu coopiili, pooti wanaalompeehu Apaapeehu owiirimu, kontha otheene cihu naakhenle nnepa wowaarya mmocaaru.
19 Nnaco nyuuva khannakhala atthu ahincuweleliya unkhumaaya ni ciicammo atthu olapo ikhwaawe, nnaco nyuuva nnaapanka mphantte waatthu ookhuluvelya ni ciicammo nnaapanka mphantte waamuci a Nluku. 20 Ni nyuuva nholipihiya naalisersu, iyo maanaaya wiira, ni maapoostolu ni maporofeeta, ni Kristu Yesu phiri nluku nootepa ukhalana ifayita naalisersu. 21 Nlattu waawawe, inupa yotheene ihokhalihiya itempulu yowaarya wamiithoni a Yehova, ukhala wiira miphantte cotheene conupannyo ciholuttaanihiya sana-saana. 22 Kontha nlattu woomwaataanana Kristu, Nluku howiirihani nyuuva wamoca naatthu akhwaawe, ukhala inupaawe, kontha nnepaawe wowaarya uri mommo.