Miteko co Mapostolu
27 Ukhala wiira waholakeliya wiira nanhala urwaa u Italiya nnaviyuni, Paulu ni mapereso makhwaawe aahovahiya nhooleli aanatoropa eehaniya Cuuliu, okhurupu yaanatoropa yeehaniya Akustu wiira aacise. 2 Nahowela nnaviyuni o Atramitiu, aahaleela vakaani ukhuma arwaaka mapuro yaaweliya anaaviyu o provinsiya yo Asiya, ni nahopacera nkwaha; Aristarku, o Masetoniya, u Tesalonika, aari nkhayi ni hiiva. 3 Waaseele, nahovira u Sitoni, ni Cuuliu ahonwacera Paulu nuunamaana. Ni ahontthunihera waathotola apatthannyaawe ni uwaceriya naayo.
4 Nahokhuma ni nahovira mmiikitthoni co Siipere, kontha iphyoo yaarwaa mphantte nkhwaawe. 5 Vano, naholapuwa niviraka ncoko wowoonnya wompahaari ncoko wo Siliisiya ni u Panfiliya, ni nahophiya u Miira, u Liisiya ni nahokhuruwa. 6 Nwo, nhooleli aanatoropa ahomphwanya naviyu o Alexantriya aarwaa u Italiya, ni ahoniirela ninkele. 7 Weetta wihu vakaani-vakaani mahuku menci, nahophiya u Kinitu masi mmasakhani. Ukhala wiira iphyoo khayanihiya urwaa uyo mphanttyooyo, naheetta mmiikitthoni co Kereta waattamela u Salimone. 8 Ni mmarikarikoni, naheetta nseresere waya ipahari, nahophiya nipuro nineehaniya Ipoortu-Comaana, waattamenle isittatti yo Laseya.
9 Wahovira ukati mwinci ni waanoopiha weetta ninaviyu, kontha mpaka nihuku nootthuka* nahovira. Vano, Paulu ahowiirela: 10 “Alopwana kinawoona toko ila ikwaheela, kinhala uneettela saana ni ninaahala uhaleela citthu cinci, kahi paahi mirintti ciri nnaviyuni, masi ciicammo ukumiihu.” 11 Masi, nhooleli aanatoropooyo uhiya wiiwelela itthu Paulu yaahimilyaawe, aamwiiwelenle aamweettiha naviyuuyo ni mwaneene naviyuuyo. 12 Ukhala wiira nipuro naaweliya naviyu naaryaaya, khanaari nipuro nooreera ukhala iyiita, atthu enci yeera wiira yahaana akhumaka, wiira yoone wakhala wiira yanhala ukhitiri uphiya u Feenikisi, nipuro naaweliya naviyu u Kereta waaphwanyannya mphantte unkhuma ncuwa wiira yavire iyiita wonwo.
13 Ukati iphyoo coohitto ilapo waapacenryaaya uwuka vakaani-vakaani, yoona wiira itthu yaalakenlyaaya yaheerannya. Woohipica, ahoheliya ankora nnaviyuni ni nahopacera weetta nseresere waya ipahari ncoko wo Kereta. 14 Vano, unavinreene ukati vakaani, yahowa iphyoo yuulupale ineehaniya Erkilawu yaakhuma mphantte wo iiliya, 15 yahompurula naviyuuyo niikuru cinene, mpaka uhikhitiri-tho weetta arwaaka uhoolo. Vano, nahoocya ni nahohiya wiira iphyeeyo inikuse. 16 Nahovira mmwiikitthoni wo iiliya yankaani ineehaniya Kauta; wahookhalaru commo, wahonirika venci upurula ikalawa yankaani* yaawaanileehu. 17 Uheliya waya ikalawa yankaani nnaviyuni, yahopacera untthukaca naviyuuyo nimikhoyi wiira alipe. Vano, ukhala wiira yaanawoova uphara mmihaavani co Sirti yahotaphulaca iveelannyo ni yahonhiya naviyuuyo eettihiyaka niiphyoo. 18 Ukhala wiira iphyeeyo yaari yuulupale ni anttakhinyiya naviyuuyo venci, waaseele, cahopaceriya uvonyeriya mirinttinnyo mmaacini. 19 Ni nihuku noneeraru, yahovonyera mmaacini ikaruma cikiina conaviyu.
20 Yahovira mahuku menci nihoonaka ncuwa ni itthonttwa, ni iphyoo yuulupale yanneepettha. Vano niweherero nihu nowoopwa naahomala. 21 Uviriha waya ukati mwinci woohilya itthu, Paulu ahonwa iriyaryaaya ni aheera: “Alopwana khweeliini, nneewelenle ikanwaaka yoohikhuma u Kereta, ni nnapankile iyo itthwiiyo khamwaahala uhuva ala manannaala hataa uhaleela citthu cinyu. 22 Uhookhalaru commo, kinawuukurumicani wiira nlipe nrima, kontha khaavo nohala ukhwa, masi naviyu ninaahala unhaleela. 23 Uhiyu uvinre, nlayikha na Nluku kinonswalelaaka ni kinonvarelaaka nteko wowaarya naahokikhumelela, 24 ni naheera: ‘Paulu uhoove itthu. Uhaana umoonanana Seesari. Uhiya commo, Nluku howoopola weeva ni atthu otheene aari nkhayi ni weeva.’ 25 Phimaana, alopwana, nlipe nrima kontha mi kinankupali Nluku wiira inaahala wiirannya khampa cihimeriyaaka. 26 Masi, hi ninhala uvonyeriya nseresere iiliya.”
27 Uviriha wihu mahuku 14, uthana ni uhiyu, neepetthiyaka niiphyoo mpahari u Atriya, uhiyu iriyari, atthu yaamweettiha naviywaayo yahopacera wooniha toko wiira nahaattamela itthaya. 28 Ulika waya wiiserya waya, yahoona wiira yaari imeeturu cene 36. Vano, weetta waya vakaani, yaholika-tho ni yahoona wiira wiiserya waya yaari imeeturu cene 27. 29 Nlattu wowoova wiira yanhala uphara wamalukuni, yahaavonyera ankora acese uttuli wawe naviyu, ni yaanonlela cinene wiira use. 30 Masi, ukati atthu yaavara nteko nnaviyunnyaayo waapheelaaya utthawa yahokurusela ikalawa yankaani mmaacini, yoothereerihaka wiira yaarwaa waakurusa ankora oohoolo. 31 Vano, Paulu ahomwiirela nhooleli aanatoropa ni anatoropaayo co: “Ala alopwanaala yakhumaka mu nnaviyuni mu, nyuuva khannohala woopwa.” 32 Anatoropa yahothikila nkhoyi waatthukeleliye ikalawooyo ni yaahomora ikalaweeyo.
33 Uhalaka vakaani usa, Paulu ahaakurumica wiira atthu otheene alye, eeraka: “Ilelo nnaapiihera mahuku 14 mwaarerihaka, ni khannalya itthu. 34 Phimaana, kinookurumicaakani wiira nlye; iyo inaahala uwiirihani ukhala saana, kontha hataa ikharariinyu imoca yommuru khinhala umora.” 35 Umaliha wawe wuulumaca, ahocisa iphaawu imoca, aholompa uhoolo waatthu otheene, ahomya ni ahokhuura. 36 Vano, atthu otheene yaholipa nrima, ciicammo yahopacera ulya. 37 Otheene wihu nnaviyunimmo naari 276. 38 Umaliha waya ulya, yahopacera uvonyera itiriku mmaacini wiira hilemeliye naviyuuyo.
39 Usa waya, khayaacuwelela nipuro naaryaaya, masi yahoona nipuro nohiisa mpahari, ni yaholakela wiira wakhitirya, yaarwaa umweemesa wonwo naviyuuyo. 40 Vano, yahokwattulaca mikhoyi co ankora, ni yahomorihela mpahari, yooyo ukatyuuyo yahotthukulaca mikhoyi coleemi ceettiheriya naviyu. Vano, yahorukunusela uphyooni iveela yoohoolo, ni yahorwaa mpaka nseresere ipahari waari nhaava. 41 Vano, uphiya wawe naviyuuyo nipuro naari mihaava cinci, ayo yahomananiha umweettiha nipuro naari mihaava cinci ni uhoolonwo ahophara ni mawimpi yaanaamweepetthaca mphantte woottuli ni yaanankwanyula. 42 Vano anatoropa yaholakela uwiiva ale yaatthukiye wiira ahituphele mmaacini ni atthawaka. 43 Vano, nhooleli aanatoropooyo, aholakela umoopola Paulu ni ahaakhottiha anatoropa upanka itthu yaalakenlyaaya. Ni ahoruma wiira atthu yaakhitiri urampela, arampele mpaka nipuro naaryaaya itthaya. 44 Ni atthu akhwaawe yahaakhitiri urampela: yaahala urwaa niithaapwa ni ipetaasu conaviyu. Vano, atthu otheene yahophiya waari itthaya anari akumi.