Iwarakha yoopacera yantikheliyaaya akorintu
6 Mwakhalanaka nlattu ninkhunaninyu, nlattuni nnorwaaneenyu utiripunali wiira wuulumaceriye naatthu oohikhuluvelyaa, uhiya waarwaanela atthu Nluku nowoonaawe ukhala ookhuluvelyaa? 2 Khannocuwela wiira atthu Nluku nowoonaawe ukhala ookhuluvelyaa phinhala uhukhumu ila ituniyeela? Vano, ukhala wiira phi nyu nnohala uhukhumu ila ituniyeela, niireke khannohala ukhitiri wuulumacera milattu coohitepa ukhalana ifayita? 3 Khannocuwela wiira ninaahala uhukhumu malayikha? Vano, ukhala wiira ninaahala uhukhumu malayikha, niireke khaninhala ukhitiri uhukhumu citthu cinnikhumelela ila ituniyeela? 4 Ukhala wiira nhaana milattu co ila ituniyeela wiira cuulumaceriye, nlattuni nnaathanleenyu alopwana anooniya ukhala oohikhuluvelya wanlokoni wiira yuulumacere? 5 Kinoolumaca commo wiira kiwoonihaceni ihaaya. Kiireke khaavo nlopwana oocuwelaca iriyariinyu aahala ukhitiri wuulumacera myaha cinaakhumelela mayamunneenyu? 6 Uhiya commo, munna naarwaaka unkasari munna nkhunanawe, iriyari ahinonkupali Kristu!
7 Mwarwaananaka utiripunaali, inkhala itthu inhala uwuulihacani muru. Nlattuni nhinonvileleenyu munneenyu ootafitikini woohisariya? Khawaareera nyuuva ukupali uhaleela* citthu cinyu nlattu wa munneenyu? 8 Uhiya upanka commo, nyuuva nnawaatafiti woohisariya ni nnawaaphwanyiha masakha asunninyu!
9 Awula nyuuva khannocuwela wiira atthu ahineettela isariya khanhala ukela Muumweneni wa Nluku? Nhiithepye.* Ale anrupihana woohiloka, ale anaaswalela anluku oohikhweeli, ale aneetta uluva, ale anrupihana alopwanaru awula athiyanaru,* 10 malatarawu, ale cinaacivela cinene mihakhu, ananhapaliya, atthu anaaveeha ni anaanyonka akhwaaya, khanhala ukela Muumweneni wa Nluku. 11 Iriyariinyu, ahaavo yaarina ala makhalelwaala. Masi nyuuva nhorapihiya, nhoreerihiya, nhooniya ukhala atthu osariya nlattu woncina Naapwiiya Yesu Kristu ni nnepa wowaarya wa Nlukweehu.
12 Cotheene kinaatthuniheriya, masi kahi wiira cotheene cihaana ifayita. Cotheene kinaatthuniheriya, masi khiivo itthu inhalaaka uhiya ikihoolelaka. 13 Iyoolya ipankiye wiira irwe nnapwiipwini ni napwiipwi pankiye wiira aakhele iyoolya, masi Nluku naarwaa umalamaliha nnyo citthu coopiilinnyo. Irutthu khiyumpeliye urupihana woohiloka, masi yumpeliye Apwiiya ni Apwiiya phinkavihera irutthu. 14 Vano, Nluku howunweleliha Apwiiya, ni inanna imocaaru, avarelaka nteko ikuru cawe, naahala ununweleliha muukhwani.
15 Khannocuwela wiira irutthu cinyu cikhanle miphantte ca Kristu? Niireke wanhala ureera ukumiha miphantte ca Kristu ni utakaniha wamoca ninthiyana ooraruwa? Mena vakaani! 16 Khannocuwela wiira ule nonruparupana namararuwa nokhalana irutthu imoca ni uyo namararuwooyo? Kontha Nluku heera “ooyeeli anhala ukhala irutthu imoca.” 17 Masi ule nowaataanana Apwiiya, ooyeeli waya ankhalana nnepa wowaarya mmocaaru. 18 Ntthawe urupihana woohiloka! Khiivo itampi inlikana niila. Ule norupihana woohiloka nohonona irutthwaawe. 19 Nyuuva mwaatthi khannocuwela wiira irutthwiinyu ikhanle itempulu yonnepa wowaarya urineenyu ni unvahiyeenyu ni Nluku? Uhiya commo, khannocuwela wiira nyuuva khannakhala aneene irutthwiiyo? 20 Kontha nhothumiya ni Nluku. Phimaana, munttitthimihe Nluku niirutthwiinyu.