Ya Arooma
16 Vano, naawa nwo nrokorihu neehaniya Feepe, nokhuma nloko no Senkiriya, 2 wiira mmwaakhelele ni nifento na Apwiiya, toko cinreeranaaya waakheliya atthu ookhuluvelyaa, ni munkavihere nhina wo citthu cinhala unthwaa, kontha uyo haakavihera atthu enci, ukihela nhina miiva.
3 Kinanveleelihera isalamu Priska ni Aakila, kinaavaranaaka nteko wa Kristu Yesu. 4 Ayo, yaholeva ukumyaaya wiira akikavihere, masi kahi miiva paasi, ciicammo maloko otheene aatthu ahikhanle ayuuta, ninawaasukhuru. 5 Kinawaaveleelihera isalamu mayamunna o nloko ninthukumana uwannyaya. Kinanveleelihera isalamu munnaaka oofentiya Epenetu, pacenre umwaakhela Kristu u Asiya. 6 Ciicammo kinanveleelihera isalamu Maria, oovarenleni nteko cinene. 7 Kinanveleelihera isalamu Antoroniku ni Cuuniya amucyaaka ni yaatthukiye nkhayi ni miiva nkhattya, akhanle alopwana oocuwelaciya ni maapoostolu ni ciicammo amwaataananne Kristu khalayi ukivikana miiva.
8 Munvahe isalamu caka Piliyatu, munnaaka oofentiya na Apwiiya. 9 Kinanveleelihera isalamu Urpanu, nonvaraneehu nteko wa Kristu, ciicammo munnaaka Estakhi. 10 Kinanveleelihera isalamu Apeleesi, khanle ookhuluvelya wa Kristu. Kinawaaveleelihera isalamu amucyaawe Aristoopulu. 11 Kinanveleelihera isalamu mmucyaaka Erotiyau. Kinawaaveleelihera isalamu amucyaawe Narisisu naatthara Apwiiya. 12 Kinanveleelihera isalamu Trifena ni Trifosa athiyana aneekurumica waavarela nteko Apwiiya. Kinawaaveleelihera isalamu anuunwiihu Persite, kontha ayo ciicammo anawiikurumica waavarela nteko Apwiiya. 13 Kinanveleelihera isalamu Rufu, oothanliya ni Apwiiya ni anumwaane ciicammo akhanle amaama. 14 Kinanveleelihera isalamu Asinkiritu, Filekoti, Ermes, Patropa, Erime ni mayamunna ari nkhayi naayova. 15 Kinanveleelihera isalamu Filologu ni Julia, Nerewu ni mwanrokorawe, ni Olimpasi ni mayamunna otheene ari nkhayi naayova. 16 Nkohaneke isalaama niipeecu. Maloko otheene a Kristu anawuuveleeliherani isalamu.
17 Vano mayamunna, mwaaweheehe ale anaakawaniha mayamunna ni anaakakathula, yeetthucihaka citthu cinvirikana ninnye mwiitthucileenyu, mwaahuluwe ayo atthwaayo.* 18 Kontha ayo atthwaayo khaanakhala ipottha ca Kristu khanle Pwiiyeehu, masi ayo akhanle ipottha co citthu cinaacivela, ni nimoolumo omaana ni oohikhweeli, ayo anawaahapusa atthu oohilipa nhina mminepani. 19 Atthu otheene, anaacuwela wiira nyuuva nnawiiwelela Cowantikhiya Cowaarya, ni iyo itthwiiyo inaakitteeliha nrima. Masi kimpheela wiira ncuwele ikhanle yooreera, masi nhittharelele ikhanle yootakhala. 20 Nluku novaha nnema woohipica naahala unnyakata Sotwani vathi inyaa cinyu. Unamaana woonironya wa Apwiiyeehu Yesu Kristu ukhale ni nyuuva.
21 Timotiyu nonvaranaaka nteko, nawuuveleeliherani isalamu, ni ciicammo asimucyaaka Lusiyu, Casoni ni Sisipatru.
22 Miiva Terisiyu kantikhile ila iwarakheela, kinawuuveleeliherani isalamu mwancina na Apwiiya.
23 Kaayu kaakhelenle wapuwani wawe ni mayamunna otheene o wanlokoni, anawuuveleeliherani isalamu. Erastu namawacera nsurukhu wo isittatti, nawuuveleeliherani isalamu ni ciicammo Kwartu munnaawe. 24 ——
25 Ule noolipihani ni ihapari comaana kinlalyeeraaka, ca Yesu Kristu toko cihimilyaaya isiiri yowaarya ivitthiye ukati mwinci, 26 masi ihimiye ni icuwelihiye atthu otheene o watuniyani civareliyaka nteko Cowantikhiya Cowaarya co maporofeeta, khampa Nluku himmalela aahimilyaawe wiira awiirihe atthu wiiwelela nlattu wowaamini waya. 27 Nluku mmoca paasi rina ucuwelaca, attitthimihiye, nlattu wa Yesu Kristu mpaka. Amem.