Ya Arooma
2 Phimaana nyuuva, hataa nkhalaka pani, mwaahukhumuku akhunaninyu, khannohala uleveleliya; kontha ukati nnaahukhumwiinyu akhunaninyu nneehukhumu mwaaneeneenyu, kontha nyuuva nnohukhumu nnaapanka citthu cimocaaru naale nnaahukhumwiinyu. 2 Coo, hi noocuwela wiira ihukhumu ca Nluku cikhanle ceekhweeli ni khacinaapheela atthu ampanka nnyo citthunyo.
3 Masi nyuuva, nnaahukhumu atthu ampanka nnyo citthunnyo nyuuva mpankaka citthu cimocaaru, nnoona wiira nnaahala woopwa ihukhumu ca Nluku? 4 Awula nnaavyaavyeeha unamaanaawe mwinci, wuuhiyererani wawe ni wuuvilelani wawe, nlattu woohicuwela wiira Nluku ni nuunamaanaawe, nopheela wiira nttharuwe? 5 Masi, nlattu woohitthuna yoohimiya ni uhittharuwa winyu, nneecuncerera uviruwa wa Nluku, naphiyaka nihuku nohukhumu ca Nluku. 6 Ni uyo nohala unhukhumu khula ntthu nlattu wo citthu cipankilyaawe. 7 Ale ahinhiyerera upanka citthu comaana Nluku naahala waavaha ukumi woohimala, ukhala wiira ayo anaavya waarya wa Nluku, nttitthimiho ni ukumi woohimala. 8 Masi ale anwaana unyakulihana ni ahineewelela ikhweeli, masi aneewelela citthu coohisariya anaahala oviruweliya ni Nluku. 9 Anaahala waaphwanya masakha ni usanka atthu otheene ampanka citthu cootakhala, upacera ayuuta ciicammo akereeku. 10 Masi, atthu otheene ampanka citthu comaana, anaahala uphwanya uttitthimihiya ni nnema, upacera ayuuta ni ciicammo akereeku. 11 Kontha Nluku, khanonthanla ntthu.
12 Kontha otheene avanre matampi ahineetthuca nlamulo, ciicammo anhala ukhwa woohinlamulo, masi otheene avanre matampi aneetthucile nlamulo anhala uhukhumwiya nivareliyaka nteko nlamulo. 13 Kontha khaanakhala ale aneewelela nlamulo akhanle anasariya uhoolo wa Nluku, masi ale aneettela nlamulo phinhala uhimiya ukhala anasariya. 14 Masi, amalaponi ahirina nlamulo anaapanka citthunnyo toko cilamalenlyaaya, masi uhookhalaru commo anaapanka citthu cinhimiya munlamuloni. Hataa ukhalaka wiira khaarina nlamulo, ahaana nlamulo wanrimani waya. 15 Miteko caya cinawoonihera wiira nihantikhiya nlamulo wanrimani waya ni nrimaaya unawoonihera wiira citthu cimpankaaya cikhanle comaana awula mena, ciicammo moopuwelelwaaya anawaakavihera woona wakhala wiira ahaana nlattu awula mena. 16 Iyo inhala wiirannya nihuku Nluku ninhalaawe uhukhumu isiiri caapinaatamu, anvarelaka nteko Yesu Kristu, toko cinhimyaaya ihapari comaana cinlalyeeraaka.
17 Masi, wakhala wiira nyuuva nkhanle nyuuta, ni nkhuluvelaka nlamulo ni mwiittitthimihaka nlattu wa Nluku; 18 wakhala wiira nnaacuwela itthu impheelaawe ni nnaacuwela uvirikaniha itthu yomaana ni yootakhala kontha anawiitthucihiya nivareliyaka nteko nlamulo; 19 wakhala wiira nyuuva nnaakupali wiira nnawaakavihera atthu oohoona, nnaawaakumiha atthu wapiphini mwaarweehaka waluusuni, 20 nnaawiitthuciha atthu oohicuwelaca, nnaawiitthuciha asaana, ni nhaana ucuwelaca weekhweeli umphwanyannya munlamuloni; 21 vano nyuuva nnowiitthuciha akhunaninyu, khanneeciitthuciha mwaasineeneenyu? Nyuuva nnolalyeera mwiiraka: “Nhinnye,” Nnawinnya? 22 Nyuuva nneera: “Nheette uluva,” nnaweetta uluva? Nyuuva nnaanyema attontto, nnawinnya ntempulu? 23 Nyuuva nniittottopa nlattu wookhalana nlamulo, khannonhisima Nluku nlattu woovonyaniha winyu nlamulo? 24 Kontha toko cantikhiyaaya: “Ninaaveehiya ncina na Nluku iriyari ya apoovu nlattu waawinyu.”
25 Khweeliini, wuulihiya urinaa ifayita neetteliyaka nlamulo, masi wakhalaka wiira nnaavonyaniha nlamulo, wuulihiya winyu uhokhala uhuulihiya. 26 Phimaana ntthu oohuulihiya, eettelaka citthu cosariya cinhimyaaya nlamulo, khunhala ukhala uhuulihiya wawe toko owuulihiya? 27 Ni ule huulihiye mwiirutthuni wawe eettelaka nlamulo, naahala wuuhukhumuni nyuuva nnovonyaniha nlamulo, hataa nkhalanaka nleehano mwiirutthuni winyu nowuulihiya. 28 Kontha nyuuta khankhala nyuuta vate paasi, hataa wuulihiya khinakhala itthu impankiya vate paasi mwiirutthuni. 29 Masi nyuuta ukhanle ukhala nyuuta wanrimani ni wuulihiya ukhanle wo wanrimani ni ninnepa, kahi ninleehano nowantikhiya. Uttitthimihiya wawe uyo ntthuuyo unkhuma wa Nluku kahi waapinaatamu.