Yoopacera ya Peturu
2 Vano nhiye upanka citthu cotheene cootakhala, wootha, uhihimya ikhweeli, nttima ni uhankawaani. 2 Khampa asaana ooyariya naanaano ntepe upheela ileeti yo nuulumo, wiira nlattu wo nna nuulumonna muunuwe ni mphwanye woopwa, 3 ukhala wiira nhoona* wiira Apwiiya ahaana unamaana.
4 Ukati unomwaattameleenyu ule khanle nluku nikhottiye naapinaatamu, masi nithanliye ni nooniya ukhala nofayita ni Nluku, 5 nyuuva, nkhanle maluku makumi, nnotekeliya inupa yo mminepani wiira nkhale anankuttho, ni nvaherere itthuvo co mminepani concivela Nluku nlattu wa Yesu Kristu. 6 Kontha cowantikhiya cowaarya cineera: “Moone! Mi kinaweesa nluku noothanliya u Siyau nluku nofayita nowanloothoni naaliseersu ni ule nohala waamini khanhala uttharuwa.”*
7 Phimaana, uyo khanle ofayita wamiithoni winyu, kontha nyuuva nnawaamini; masi ale ahinaamini, “nluku anamatekateka nikhottilyaaya nno nihokhalihiya nluku nofayita nowanloothoni,” 8 ni “nluku ninkakathula ni nluku nimmorusa.” Ayo ahokakathuwa, kontha khaaneewelela nuulumo. Iyo phiitthu ithanleliyaaya. 9 Masi nyuuva nkhanle “nloko noothanliya, nloko naanankuttho anvara nteko khampa mamwene, nloko nowaarya apoovu a Nluku, nyuuva nthanliye wiira nlalyeere citthu cootikhiniha ca Nluku”* ule wiihanneni wapiphini wiira nrwee wa luusuni wawe yowaarya. 10 Khalayi nyuuva khamwaari apoovu a Nluku, masi nna coo nhokhala apoovwaawe; khalayi nyuuva mwaari nhinooniheriya uthunku, masi nnava nhooniheriya uthunku.
11 Mayamunna, mi kinoohimeeryani wiira: ukhala wiira nhoowa ni nkhanle aletto nhihiyerere unyema citthu cimpheeleenyu comwiirutthuni, cinwaananani.* 12 Nkhalane meettelo omaana iriyari yaatthu ontuniyani, wiira mootheriyaka upanka itthu yootakhala, ayo atthwaayo akhale masaahityeenyu anwoonani mwapankaka citthu comaana, ni nlattu wo iyo itthwiiyo munttitthimihe Nluku naphiyaka nihuku nohalaawe waahukhumu atthu.
13 Nlattu wa Apwiiya, mwiiwelele ukhulupale wotheene unkumiheriya* naapinaatamu. Mmwiiwelele mwene ukhala wiira khanle nkhulupale, 14 hataa ni makovernatoore aveleelihiye ni mwene wiira yaattaruse atthu ampanka citthu cootakhala ni wiira yaattottopele atthu ampanka citthu comaana. 15 Kontha iyo phiitthu impheelaawe Nluku, wiira napankaka citthu comaana, naamaalihe* atthu oohankhili. 16 Nkhale atthu ootaphuwa, masi nhivarele nteko utaphuwa winyu wiira mpanke citthu cootakhala, masi wiira nkhale ipottha* ca Nluku. 17 Mwaahisime atthu okhapila cotheene, mwaafente mayamunna otheene, mmoove Nluku, munhisime mwene.
18 Ananteko yaahisime ni awoove ale anaavarelaaya nteko toko cinreeranaaya, kahi paahi ale ooreera nrima ni anaawacera saana ananteko, masi ciicammo ale anrika waatteeliha nrima. 19 Kontha ntthu avilelaka masakha* ni ahuvihiyaka woohisariya nlattu woomwiiwelela Nluku, iyo ikhanle itthu yomaana. 20 Nnohala uphwanyani mwavilelaka waattakaciya nlattu woovara itthu yootakhala? Masi nyuuva mwavilelaka uhuvihiya nlattu woovara itthu yomaana, iyo inancivela Nluku.
21 Khweeliini iyo phiihaneeliyeenyu, kontha Kristu yooyo hohuva nlattu waawinyu, oohiyerakani ntakihero wiira ntthare sana-saana inyaa cawe*. 22 Uyo khavanre matampi, hataa kheewiye oolumaka itthu yootakhala. 23 Ukati waaruwaniyaawe,* uyo khaahokolosera atthu yanruwana,* ukati waahuvihiyaawe, uyo khaamoopopiha ntthu, masi ankhuluvela ule nohukhumu niisariya. 24 Uyo hokusa matampiihu mwiirutthuni wawe akhomeliyaka wanipottoni,* wiira nikhwe* nlattu womatampi ni nikhale akumi nlattu wosariya. Ni “nlattu woohuva wawe nyuuva nhovonihiya”. 25 Kontha nyuuva mwaari khampa ikhontwaa coorimela,* masi nna va nhoturuwela wa nhooleli ni makampuci nosunka ukumiinyu.