Yantikheliyaaya a Akolosu
3 Masi ukhala wiira nyuuva nhorapihiya wamoca ni Kristu, nhihiyerere waavya citthu cooculu, nwe Kristu ookomilyaawe moono wonlopwana wa Nluku. 2 Nhihiyerere wuupuwela citthu cooculu, kahi citthu co va watuniyaniva. 3 Kontha nyuuva nhokhwa ni ukumiinyu uhovithiya wamoca ni Kristu, toko cimpheelaawe Nluku. 4 Ukati Kristu, khanle ukumiihu, nohalaawe wooniheriya, nyuuva ciicammo nnaahala wooniheriya, vano nyuuva ni uyova nnaahala ukhala oottitthima.
5 Phimaana, mwiive miphantte cinyu co mwiirutthuni wiira nnyeme urupihana woohiloka,* wiira nhipanke itthu yoohiirya, wiira nkhitiri wiivaraca nhina upheela cinene uruparupa ninthiyana awula ninlopwana, wiira nhuupuwele citthu coohinamaana, ni wiira nhiipheelele citthu, kontha wiipheelela citthu khunvirikana nunswalela nluku oohikhweeli. 6 Nlattu atthu woopanka nnya citthunnya, Nluku naahala uviruwa. 7 Nyuuva mwaatthiva khalayi mwampankaka nnyo citthunyo.* 8 Masi vano, nyuuva nnolamuliya uhiya citthu cotheene nnya: urusiya, uviruwaca, upanka citthu coohiloka, ni wuuluma moolumo ooveeha; ni ciicammo nnolamuliya uhuuluma myaha coosece iriyariinyu. 9 Khannolamuliya uthepyana. Nrule makhalelweenyu okhalayi* ni citthu caapankeenyu, khampa wiira ikuwo. 10 Ni nware makhalelo onaanaano, khampa wiira ikuwo, ale anrehereriya nuucuwelaca weekhweeli, wiira akhalane makhalelo khampa arinaawe Nluku. 11 Nhina ayo makhalelo onaanaanwaayo, khaavo nkereeku ni hataa nyuuta, khaavo ntthu owuulihiya ni hataa ntthu oohuulihiya, khaavo ntthu olapo ikhwaawe, khaavo namantakhwaani,* khiivo ipottha ni hataa ntthu hikhanle ipottha; masi Kristu ri nhina wo citthu cotheene ni uyo phinnihoolela.
12 Phimaana, ukhala wiira nyuuvano nthanliye ni Nluku, nkhanle atthu owaarya ni atthu oofentiya; nware ikiriri khampa ikuwo,* unamaana, wiiyeviha,* ureera nrima ni uvilela. 13 Nhihiyerere uvilelana ni ulevelelana ninrima wotheene, hataa ukhalaka wiira ntthu haana isariya yootthekeliya. Khampa Yehova cuulevelenlyaaweni ninrima wotheene ni nyuuva ciicammo nhaana ulevelelana. 14 Masi, uhiya nnya citthunnya paasi, ciicammo nware nifento khampa wiira ikuwo, kontha nno nikhanle itthu yuulupale cinene inkavihera waataana.
15 Ciicammo, nnema na Kristu nikhale wanrimani winyu,* kontha nyuuva nheehaneliya nno nnemanno khampa wiira miphantte co irutthu imoca. Nthoonyihere usukhuru. 16 Nuulumo na Kristu nikhale ni nyuuva, ni ucuwelaca wotheene. Nhihiyerere wiitthucihana, ulipihana* niisaalimu, unttottopela Nluku ni wiipa icipo coominepani, nthoonyeraka usukhuru, mmwiipele Yehova ninrimeenyu wotheene. 17 Khula itthu nnohaleenyu wuuluma awula upanka, mpanke mwancina Naapwiiya Yesu, mwansukhurweelaka Nluku, akhanle Athumwanaya, ciicammo mwancina naawaya.
18 Weeva nthiyana ootheliya, uwiiwelele awannyaa khampa Apwiiya cimpheelaaya. 19 Weeva nlopwana oothela, uhihiyerere waafenta amwaaraa, ni uhaaviruwele cinene.* 20 Nyuuva asaana, nwiiwelele asipaapeenyu nhina citthu cotheene, kontha iyo inawaacivela Apwiiya. 21 Nyuuva ayari, nhaanyoonyihe asaaniinyu wiira ayo ahilolovace. 22 Nyuuva ananteko, nwiiwelele mapatarawiinyu apinaatamu nhina citthu cotheene, kahi paasi wakhalaka wiira nnawooniya,* mwapheelaka wiira mwaatteelihe nrima apinaatamu. Masi ninrimeenyu wotheene, mwaavarele nteko mwapheelaka unttitthimiha Yehova. 23 Khula itthu nyuuva invareenyu, nvare ninrimeenyu wotheene, khampa wiira nnonvarela nteko Yehova, kahi apinaatamu. 24 Kontha nyuuva nnaacuwela wiira Yehova naahala wuuvahani itthuvo caakhuluvelihilyaawe atthu ookhuluvelya. Phimaana, nkhale nanteko Aapwiiya, Kristu. 25 Khweeliini, ale ampanka citthu coohiloka anhala waakhela citthu coohiloka, kontha Nluku nohala unlivyaanihera khula ntthu niitthu yaapankaawe.