Yantikheliyaaya a Akolosu
1 Miiva Paulu, kikhanle apostolu a Kristu Yesu nuutthuna wa Nluku, wamoca ni munneehu Timotiyu, 2 ninwantikhela ila iwarakheela mayamunna owaarya ni ookhuluvelya ammwaataanana Kristu amphwanyannya u Kolosu:
Nkhalane unamaana woonironya ni nnema na Nluku, akhanle Apaapeehu.
3 Ukati unoolompeleehuni, hi ninansukhurweela Nluku, akhanle athumwanaya Apwiiyeehu Yesu Kristu. 4 Kontha nihohimeriya umwaamini winyu Kristu Yesu ni ciicammo nifento ninaathoonyereenyu mayamunna ookhuluvelya, 5 nlattu woniweherero ntthenkaceriyeenyu wiirimu. Nyuuva nhohimeriya uyo nwehererooyo nimoolumo okhweeli, ohapari comaana 6 cilalyeeriyeenyu. Toko ihapari comaana cinviraaya ciimihaka mihokorokho* ni cinviraaya cimwaryeelaka ntuniyani motheene, itthu imocaaru ineera iwiirannyeelakani nyuuva, ikhumelo mwiiwileenyu ni ncuwenleenyu sana-saana unamaana woonironya weekhweeli wa Nluku. 7 Iyo phiitthu iwiitthucihilyaaweni munneehu Epaafara, khanle nanteko ookhuluvelya a Kristu, novara nteko hiiva waahaleehu uvara. 8 Uyo ciicammo honihimyeera nifento nnothoonyereenyu nkurumuciyaka ninnepa wowaarya.
9 Ni phimaana ikhumelo ukati niiwileehu iyo itthwiiyo, khaninhiyerera wuulompelani nilepelaka wiira ncuwele ile impheelaawe uyova, nuucuwelaca ni wiiweeha unvahaaya nnepa wowaarya. 10 Wiira nyuuva nkhalane makhalelo anoncivela Yehova, anhala wuukhitirihani untteeliha nrima. Mwiimihakoono mihokorokho* nhina nteko nnonvareleenyu ni muncererakoono uncuwela winyu sana-saana. 11 Ni ninaanlompaka Nluku wiira nlipihiye niikuru cinci, wankhitiriinyu uvilela mpisakoono nrima ni ntteeliyaka. 12 Ciicammo mwaasukhurweelakoono Apaapeehu, ale yuukhitirihileni uphwaanela waakhela ile ahiyeriyaaya atthu ookhuluvelya ari waluusuni.
13 Uyo honoopola wapiphini yaanihoolela ni honirwaana wa mwanawe oofentiya, 14 ule nooponle hiiva, nileveleliyaka matampiihu. 15 Uyova ni Nluku hinoonnya, arina makhalelo mamocaaru ni uyo Nluku phimpacenryaawe umumpa; 16 kontha uyo phaavahaceriye wumpa citthu cotheene cikhwaawe wiirimu ni va watuniyani va: Citthu cinoonnya ni citthu cihinoonnya, umwene, ikuru, ikuvernu ni ukhulupale. Citthu cottheene uyo phaavahaceriye wumpa ni umpeliye uyova. 17 Ciicammo cihinaaya wumpiya citthu cikhwaawenyo, uyova ahaavo, ni uyo phaarumiye wumpa citthu cotheene cikhwaawennyo. 18 Ni uyo phiri nhooleli orutthu, ikhanle nloko ni uyo phipacenre wunwelelihiya iriyari yaatthu akhwile, wiira akhale oopacera nhina citthu cotheene. 19 Kontha Nluku pitthunalyaawe ciicammo, wiira Kristu akhale oolikaneliya nhina citthu cotheene. 20 Ni nlattu wa Kristu, iyo maanaaya, nlattu wophome Kristu imwarusalyaawe wanipottoni noohuviheriya, Nluku hiiriha citthu cotheene wiirimu ni va watthuniyani va umwaataanana.
21 Khweeliini, nyuuva khalayi mwaari uttayi ni Nluku ni mwaari nwanannyaawe, kontha uyo ukatyuuyo nyuuva moopuwela citthu coohiloka. 22 Masi vano, uyo howiirihani umwaataanana nlattu worutthwaawe ule eevaherenre wiira eeviye, apheelaka wiira nyuuva mwaatthiva nkhale owaarya, oohipahuwa ni oohootheriya itthu. 23 Masi iyo itthwiiyo inhala wiirannya, wakhalaka wiira khannohala uhiyerera umwaamini Nluku, nkhalaka oolipa waaliseerisini, nhaakhiyaka* niweherero nivahiyeenyu, ukati waalalyeeriyeenyu ihapari comaana, nnye cilalyeeriyaaya atthu otheene va watuniyani va. Miiva Paulu, kikhanle nanteko nolalyeera nnyo ihapari comaanannyo.
24 Mahuviho anaananaaka nnaco nlattu waawinyu anaakitteeliha nrima. Kinawoona wiira mahuviho anaananaaka nnaco khampa wiira kikhanle mphantte wo irutthu ya Kristu, akinlamuliya uhiyerera waanana. Ayo mahuviho anaananaakaayo anahala uphwanyiha ifayita irutthu ya Kristu, nikhanle nloko. 25 Mi kihokhala nanteko o nno nloko nno, nlattu wonrintti kivahiyaaka ni Nluku, ukhanle ulalyeera sana-saana nuulumo na Nluku, wiira kuuphwanyiheni ifayita nyuuva. 26 Iyo, ikhanle isiiri yowaarya yaavithiye ikhumelo ukati woolumwenku wo citthu uvinre ni maloko avinre. Masi nna co, Nluku neera aahimyeeraka atthu ookhuluvelya, 27 ale aatthunnyaawe waacuweliha isiri yowaarya, ikhanle yoottitthima cinene ni yomihakhu cinci coominepani. Iyo isiri yowaaryeeyo khanle Kristu wamoca ni nyuuva, nnoweherera ukhala muuttitthimani waweva. 28 Iyo isiiriiyo phinlalyeereehu, wiira naahimerye atthwaayo ni naacuwelihe citthu cotheene nuucuwelaca urineehu, nipheelaka wiira atthu otheene akhale oolikana ni ciicammo amwaataanane Kristu. 29 Iyo phinkiiriha wiikurumica uvara nteko, kikhuluvelaka wiira Nluku naahala ukikavihera niikuru cawe.