Yonayeeli ya Akorintu

2 Mi kiholakela wiira ikwaha inhalaaka uwa wuuthotolani akinhala wuuriipihani nrima. 2 Kontha kahalaka wuuripihani nrima, tipani nohala ukitteeliha nrima nhikhanle nyuuva kuuriipihilyaakani nrima vaa? 3 Citthu ciwantikhenlyaakaninnyo, kiwantikhenleni wiira kihiriipiye nrima kawaaka nwo, nlattu wo ale yaalamuliya ukitteeliha nrima; kontha kinaakhuluvela wiira ile inkitteeliha nrima ni nyuuva otheene winyu inawuutteelihani nrima. 4 Kontha kiwantikhenleni kinasankile, kinariipiye nrima ni kunlaka, kahi wiira kuuripiheni nrima, masi wiira ncuwele wiira kinawuufentani venci cinene otheene winyu.

5 Masi ntthu akiriipihaka nrima, khanakiriipihaka itthu nrima miiva paasi, masi nyuuva mwaatthi otheene winyu ciicammo nawuuripihani nrima. Akimpheela wuuluma venci ula mwahoola. 6 Wakhalaru wiira mayamunna encyaayo ahonttarusa uyo nlopwanooyo, wahotosa; 7 uhiya commo, nhaana mwanlevelelaka ni mwammaalihaka uyo nlopwanooyo, wiira hikhale ooriipiya nrima mpaka wanhiyaawe unswalela Nluku. 8 Phimaana mayamunna, kinookurumicani unthoonyera wiira uyo nnanfenta. 9 Iyo phiitthu ikhwaawe ikiirihile uwantikhelani ila iwarakheela: kimpheela woona wakhala wiira khweeliini nnawiiwelela malakihero otheene nnaakheleenyu. Wakhala wiira nnanlevelela ntthu oopankaleni itthu ni mi ciicammo kinanlevelela. 10 Khweeliini, khula itthu miiva inlevelelaaka (wakhala wiira kihotoko ulevelela itthu ), kinoolevelelani wiira mphwanyere ifayita wa Kristu, 11 wiira nihitthemiye ni Sotwani, ukhala wiira khanintikhina itapha cawe.

12 Waaphiilyaaka o Trowate wiira kaalalyeere ihapari comaana cimmuuluma Kristu, ni waatthukuleliyaaka nkhora wiira kivare nteko wa Apwiiya, 13 akaataphuwile nlattu woohimphwanya munneehu Titu. Phimaana, woohipica kahaaleeha mayamunna ni kahorwaa u Masetoniya.

14 Masi attottopeliye Nluku, nonihoolela khampa anatoropa anturuwa ukhottoni anatthemileene anari nkhayi ni Kristu, ni nonivarela nteko hiiva wiira amwarusele mapuro otheene unukhela urinaaya ucuwelaca wawe! 15 Kontha Nluku nonoona ukhala nhiriri woonukhela wa Kristu, ni uyo nhiriryuuyo unaaphwanya atthu anrwaa uwoopoliyani* ni ale anrwaa wuutankanyiyani. 16 Ala atthu oomalela kaaromonlyaakaala, unaaphwanya nhiriri wo nookhwa unrweeha wuukhwani; atthu oopacera kaaromonlyaakaayo, unaaphwanya nhiriri wookumi umphwanyiha ukumi. Ni tipani unomphwanela uvara uyo ntekooyo? 17 Hiiva unaaniphwanela, ukhala wiira khaninakhala anamatumihaca* nuulumo na Nluku, khampa atthu enci aryaaya, masi hiiva ninooluma woohaanyihacera itthu, ukhala wiira Nluku phiniveleelihile, ni ninawuuluma uhoolo wawe nikaviheriyaka ni Kristu.