Miteko co Mapostolu
8 Saulu, ahotthuniha wiira Estevau eeviye.
Ukhuma nne nihukunne, nahancera ulupatthiya nloko no Yerusalemu ni atthu otheene, waahiya maapostolu, yahomwaruseliya micoko co Yuteya ni co Samariya. 2 Masi alopwana owiivaherera wa Nluku, yahoncisa ni yahorwaa unsikha Estevau ni yahomunlela cinene. 3 Vano, Saulu ahopacera waalupattha atthu enci wanlokoni. Uyo, ankela khula inupa ni anaakumihera vate alopwana ni athiyana nuurwaa waatthukela nkhattya.
4 Masi atthu yaamwarusiye, yanlalyeera ihapari comaana micoko cotheene caarwaaya. 5 Filipe ahorwaa isittatti yo Samariya ni ahopacera ulalyeera ihapari ca Kristu. 6 Atthu yanviriyana saana itthu Filipe yaahimyaawe; yammwiiwelela ni yaanoona mathoonyero yaapankaawe. 7 Ni atthu enci yaarina maciini, yankhuwela ni ayo maciinnyaayo, yaanaakhuma. Uhiya commo, atthu owuntakya ni atthu ooheetta yanvonihiya. 8 Vano, atthu otheene o ile isittattiile, yahotteeliya nrima cinene.
9 Ni ile isittattiile ahaavo nlopwana mmoca eehaniya Simau, aapanka macattuka ikhumelo yo khalayi. Ni anwiiriha atthu enci o Samariya ukhala ootikhinihiya, ni uyo eecoona ukhala nkhulupale. 10 Atthu otheene yaanonviriyana, ukhuma oolupale mpaka anamwane ni yaaneera: “Ula nlopwanoola khanle Ikuru ca Nluku, neehaniya Ikuru Cuulupale.” 11 Yaananviriyana kontha ahaatikhiniha ukati mwinci, nlattu wo macattuka aapankaawe. 12 Uhookhalaru commo, ukati Filipe waalalyenryaawe ihapari comaana co Umwene wa Nluku, ni mwancina na Yesu Kristu, ayo yaahaamini ni alopwana ni athiyana yahopattisiya. 13 Hataa ciicammo nuuwakatyaaya, Simau ahopattisiya, ni ahomweettana Filipe. Ni uyo ankhala ootikinihiya venci nlattu wowoona mathoonyero menci Filipe aapankaawe.
14 Vano, ukati maapostolu u Yerusalemu yeewilyaaya wiira atthu o Samariya yahotthuna wiiwelela nuulumo na Nluku, yahonveleeliha Peturu ni Joau, 15 ni yahorwaaca ni yaholompa wiira atthu o Samariya yaakhele nnepa wowaarya. 16 Kontha ayo yaari ahinaaya waakhela nnepa wowaarya, masi yaapattisiye mwancina na Yesu Kristu. 17 Vano, ayo yaahoweesera matataaya ni yahancera waakhela nnepa wowaarya.
18 Simau woona wawe wiira yaakhela nnepa nlattu wo maapostolu wooweesera matataaya, ahaavahaca nsurukhu, 19 eeraka: “Nkivahe ni mi uyo ukhulupalyooyo, wiira otheene ule nohalaaka umweeserera ntata naka aakhele nnepa wowaarya.” 20 Masi, Peturu ahomwiirela: “Ukhwe nkhayi ninsurukhwooyo, kontha woopuwela wiira wanhala uthuma ninsurukhu itthu Nluku novahaawe mahala. 21 Khunlamuliya upanka mphantte nhina iyo itthwiiyo hataa vakaani, kontha weeva ukhanle ntthu oohisariya wamiithoni wa Nluku. 22 Phimaana, uttharuwe nlattu wo itthu yootakhala upankilyaa, ni unlepele isontte Yehova wiira atthuna vale oolevelele itthu yootakhala iri wanrimani waa, 23 kontha kinwoona ukhala itthu yoohapala ni ipottha co citthu coohisariya.” 24 Simau ahaakhula eeraka: “Nkilepelele isontte wa Yehova wiira citthu cotheene muulumileenyu cihikirannyeele.”
25 Vano, uvaha waya usaahiti ni ulalyeera waya nuulumo na Yehova, yahoturuwela u Yerusalemu yalalyeeraka ihapari comaana aliteeya enci o Samariya.
26 Vano, nlayikha na Yehova, nahomwiirela Filipe co: “Wiitthenkace ni urwee uhitto ilapo, iphiro inrwaa u Yerusalemu mpaka u Kasa.” (Iphiro yo muuthakoni.) 27 Phimaana, uyo aheetthenkaca ni ahokhuma. Vano, ahonkumanana Eunuku o Etiyopia, nanteko aapwiyamwene yeehaniya Kantasi, uyo phaavahaceriye uwacera mihakhu caya cotheene. Uyo aarweele uswali u Yerusalemu. 28 Ukati waaturuwaawe, ansoma ilivuru ya porofeeta Isaiya, akumiheraka ncu nawe vate. 29 Vano, nnepa wowaarya wahomwiirela Filipe: “Urwee waattamele iyo ikarweeyo.” 30 Filipe ahotthawelela iyo ikaarweeyo, ahaattamela ni ahomwiiwa Eunuku asomaka ilivuru ya porofeeta Isaiya, akumiheraka ncu nawe vate. Vano ahonkoha: “Unneeweeha itthu unsomeeyo?” 31 Uyo ahomwaakhula: “Kinhala wiiweeha cani, woohikhala ntthu ookitaphulela?” Ni uyo ahonlepela Filipe wiira awele nkaaronimmo ni amunkomane. 32 Mphantte waasomaawe nhina cowantikhiya cowaarya, weera: “Khampa ikhontwaa, uyo horwaaniya wuuhitiyani, ni khampa ikhontwaa immaalaaya uhoolo wawe ule nomettha mapuruurwaaya, uyo khanaakhula itthu. 33 Ukati wuulihiihaciyaawe muru, khaavahiye isariya. Tipani nohala uhimyaca citthu ciirannyeele ukatyaawe? Kontha uyo nawiiviya watuniyani.”
34 Vano, Eunuku, ahonkoha Filipe: “Sontte, ukihimeerye: Ula porofeetoola amwaaca pani? Eecaacaa uyova awula ntthu nkhwaawe?” 35 Filipe ahopacera wuulumaca, ni ataphulelaka cowantikhiya cowaarya aasomaawe, ahonlalyeera ihapari comaana caamuuluma Yesu. 36 Yeettacakoono, yahophiyaca nipuro yaarivo maaci, ni Eunuku aheera: “Wooneke! Ahaavo maaci va! Inkihaleela isiyani wiira kipattisiye?” 37 —— 38 Vano, uyo aholepela wiira yeemesiye ikaarweeyo, Filipe ni Eunuku yahokelaca mmaacinimmo ni uyo ahompattisa. 39 Ukhuma waya mmaacinimmo, nnepa wowaarya wa Yehova wahonkusa Filipe wohipica, ni Eunukuuyo khaamonne-tho, masi uyo ahorwaa unanttenle nrima. 40 Vano, Filipe ahorwaa u Astote ni uvira wawe uyo ncokooyo, khaahiyerenre ulalyeera ihapari comaana isittatti cotheene mpaka waaphilyaawe u Sesareya.