Yantikheliyaaya a Akolosu
2 Kontha mi kimpheela wiira ncuwele ikhotto yuulupale inaanaaka nlattu waawinyu, nlattu wo mayamunna o Layotiseya ni otheene ale ahinapaca ukoona.* 2 Itthu impheelaaka ukhanle ulipiha mirima caya, ni wiira ayo otheene waya akhale atthu oofenta. Kontha commo, ayo anaahala ukhalana mihakhu cinkhalaniya nlattu woocuwela sana-saana isiiri yowaarya ya Nluku, kimwaacaka Kristu. 3 Nlattu waawawe hiiva ninaakhitiri woonenela ucuwelaca ni ankhili avithiye khampa nhakhu wofayita venci cinene. 4 Kinoolumaca commo wiira hikhale ntthu nohala wuuthepyani nimoolumo oohiloka. 5 Kihoohikhalaru ni nyuuva co ni co, nrimaaka uri nkhayi ni nyuuva, kitteeliyaka nrima nlattu nyuuva wookhala atthu oothotokannya mwaha woomwaamini cinene Kristu.
6 Phimaana, ukhala wiira nyuuva nhonkupali Kristu Yesu, khanle Pwiiyeehu, nhihiyerere umwaataanana. 7 Khampa ciitthucileenyu, umwaamini winyu Kristu, unlamuliya ukhala woolipa ni woohittinka, khampa mwiri wiithipenle sana-saana mitithari caya. Ukati unonsukhurweenyu Nluku waamini winyu uhaana utepaka winciva.
8 Ratta, wiira hikhale ntthu nohala wuuvarihani khampa mwannama nimoolumo owoothiya ni ciicammo moopuwelelo oohinamaana ahinvaranaca ni citthu ciitthucihilyaawe Kristu, masi anvaranaca niilema ni citthu co ila ituniyeela. 9 Kontha makhalelo otheene a Nluku, Kristu naathoonyera sana-saana. 10 Ni nlattu wo ule khanle nhooleli o ikuvernu cotheene ni akhulupale, nyuuva khiivo inoohaleelani. 11 Nlattu woomwaataanana winyu, nyuuva mwaatthi nhuulihiya, kahi nimatata aapinaatamu, masi muulihiye moopoliyaka nhina citthu coohinamaana cuucivelani upanka, ni commo phinlamuliyaaya wuulihiya atthari a Kristu. 12 Kontha nyuuva mwaatthi nhosikhiya wamoca ni uyova ukati mwaapattisiyeenyu. Ni ukhala wiira nnaamwaataanana ni nnawaamini citthu cipankilyaawe Nluku niikuru cawe, nyuuva nhunwelelihiya wamoca nuuyova. Khweeliini Nluku homunweleliha iriyari yaatthu ookhwa.
13 Uhiya commo, uhookhalaru wiira nyuuva mwaatthi mwaahokhwa nlattu womatampiinyu ni nlattu woohuulihiya, Nluku huuvahani ukumi wamoca ni Kristu. Uyo hothoonyera unamaana, anilevelelaka makoosiihu otheene. 14 Ni ciicammo uyo homalamaliha* malamulo otheene yaavirikaniha citthu hiiva ceetteleehu. Uyo homalamaliha akhomelaka wanipottoni noohuviheriya. 15 Nlattu wo iyo itthwiiyo, uyo haarulaca ikuwo akhulupale otheene ni ikuvernu cotheene, ni ahaakusa khampa ipottha, aarwaanaka waatthuni wiira oonihere wiira haatthema.
16 Phimaana, nhinhiyerere ntthu oohukhumukuni nlattu wo itthu inlyeenyu awula inwuryeenyu, awula nlattu wo ifesta cimpankiya khula mwaakha, ifesta yo mweeri wonaanaano awula nihuku nosaapatu. 17 Nnya citthunnya caari irunku yo citthu caahala uwa, masi mwaneene iyo irunkwiiyo aari Kristu. 18 Ratta naatthu aneeyeviha yapheelaka paasi wiira yooniye naatthu ni ratta naatthu answalela maciini,* kontha ayo pooti uwiirihani nyuuva uhaakhela itthuvweenyu. Ayo atthwaayo anvaresesa citthu cinoonaaya paasi ni anawiittottopa nlattu wo moopuwelwaaya oohinamaana. 19 Atthu toko ayo, khaanovaresesa ule khanle murwaaya, awula ule novaha irutthu itthu yotheene impheelaaya, ni neeriha irutthu yotheene uluttaana. Nlattu wo iyo, Nluku nawuunuwiha irutthu yotheene.
20 Ukhala wiira nyuuva nhokhwa wamoca ni Kristu nlattu wo ileema co ila ituniyeela, kontha isiyani nnokhaleenyu khampa nnaapanka mphantte wo ila ituniyeela nhihiyereraka utthara malakihero toko ala: 21 “Uhivare, uhilawihe ni uhikwanye?” 22 Kontha nnya citthunnya ciholakeliya umalamalihiya, nlattu woovareliya nteko ni nlattu wookhala marumo ni citthu cineetthucihaaya apinaatamu. 23 Ayo marumwaayo ankhala khampa wiira anawaakavihera atthu ukhalana ucuwelaca, masi ayo khaanaakavihera atthu unyema citthu cimpheelaaya irutthu. Iyo itthwiiyo ineerannya, kontha atthwaayo anlakela imwanennyaaya mananna onswalela Nluku ni ciicammo anawoonihera ukhala atthu owiiyeviha ahiri owiiyeviha ni anaahuviha irutthwaaya.