Iwarakha yoopacera yantikheliyaaya akorintu

5 Kontha kiheewa wiira haavo nlopwana mmoca wanlokoni winyu va aathenle amwaara athumwaane. Ayo mananna oorupihana oohilokaayo,* akhanle ootakhala uvikana ale ampankaaya atthu ontuninyani. 2 Vano nyuuva nnawiira wiittottopa nlattu wo iyo itthwiiyo? Keera mwaalamuliya ucukula ni umoomola wanlokoni va ntthu vanre ayo matampyaayo? 3 Nihoohikhalaru nkhayi ni nyuuva co ni coo, nrimaaka uri nkhayi ni nyuuva, ni kihonhukhumu nlopwana pankile iyo itthwiiyo, khampa wiira kiri nkhayi ni nyuuva. 4 Ukati unthukumaneenyu, moopuwelelwaaka ni ikuru yaapwiiya Yesu iri ni nyuuva. Phimaana, mwancina Naapwiiya Yesu, 5 munvaherere uyo nlopwanooyo wa Sotwani, wiira amalamalihiye. Wapankiya commo, nloko ninaahala wooniya ukhala nooloka nhina matampi, naphiyaka nihuku Naapwiiya.

6 Wiittottopa winyu khunakhala womaana. Khannocuwela wiira ifermentu vakaani pooti urunwiha iphepa yoweethenya? 7 Mmalamalihe ifermentu yokhalayi, wiira nkhale itiriku yonaanaano yoohifermentu, toko ciriinyu nna co. Ukhala wiira Kristu, khanle ikhontwaa yopaasikuweehu, hovahereriya khampa itthuvo. 8 Phimaana, nitthape ifesta kahi niifermentu yokhalayi ni hataa niifermentu yokhirini ni yoohikiriri, masi ntthape niiphaawu coohifermentu cinthoonyihera citthu cooreera ni ceekhweeli.

9 Kaahowantikhelani iwarakha keeraka wiira nhiye waakhalakhalana* ale anrupihana woohiloka, 10 Akinapheelaka uhimya wiira nhiye waakhalakhalana atthu o ila ituniyeela anrupihana woohiloka, ahintosiya ni citthu cirinaaya, ale anennya, ni ale anaaswalela anluku oohikhweeli. Unari commo, nyuuva mwahaana nkhumaka mu ntuninyani mu. 11 Masi, nnaco kinwantikhelani wiira, nhiye unkhalakhalana khula ntthu neeciihana munna, masi noraruwa, cihinontosa citthu cirinaawe, naaswalela anluku oohikhweeli, namaveeha, nanhapaliya, awula latarawu; ni hataa nhinlyane uyo ntthuuyo. 12 Ntekwaaka, khunaakhala waahukhumu atthu ahikhanle owanlokoni. Keera phi nyuuva nnolamuliya waahukhumu atthu owanlokoni, 13 ni Nluku waahukhumu atthu ahikhanle owanlokoni? “Munkumihe wanlokoni ntthu nopanka citthu cootakhala.”