Miteko co Mapostolu
22 “Alopwana, mayamunna ni mayaapaapa, nkiviriyane itthu inhalaaka wuuhimeryani wiira kiicaakihe.” 2 Umwiiwa waya awuulumanaka niiluuka iheperewu, ayo yahotepa umaala. Vano, uyo aheera: 3 “Miiva kinyuuta, kiyariye u Tarsu u Siliisiya, masi kisomihiye yeela isittatiila ni Kamaliyeeli. Kiheetthucihiya weettela sana-saana Nlamulo neettelaaya asinhiya-taateehu, kiikurumicaka unswalela Nluku khampa nyuuva ilelo. 4 Mi kaanaalupatthaka ni uwiiva atthu yeettela ula nttaloola, kaatthukaka ni kaarwaanaka nkhattya alopwana ni athiyana; 5 nankuttho muulupale ni mahumu otheene aapoovu, anaacuwela iyo itthwiiyo. Ayo ciicammo yahokivaha iwarakha yaawantikhenlyaaya mayamunna o Tamaasku, ni mi kaarwaa wonwo, wiira kaavare atthu kaahalaaka waaphwanya ni kaarwaane u Yerusalemu kinaatthukile wiira yattarusiye.
6 Masi, keettakoono anari meetiiya, kinari wakhiviru ni u Tamaasku, iluusu yaakhuma wiirimu yahopharela nipuro kaaryaka, 7 ni mi kahomorela vathi ni kaheewa ncu nakiirelaka: ‘Saulu, Saulu, unkilupatthelani?’ 8 Miiva kahaakhula: ‘Nyuuva mwaapani?’ Ni uyo ahokiirela: ‘Miiva Yesu, Nnasareenu, unonlupatthaa.’ 9 Ni alopwana yaari nkhayi ni miiva yahoona iluswiiyo, masi khayeewile ncu naakulumananno. 10 Vano, mi kahaakoha co: ‘Isiyani inlamuliyaaka upanka Pwiiya?’ Ayo yahokiirela: ‘Wunwe ni urwee u Tamaasku, nwo phinhala uhimeriya citthu cotheene cinlamuliyaa upanka.’ 11 Masi, ukhala wiira akaakhitiri woona nlattu woluswiiyo, kaakhitinri uphiya u Tamaasku kinavareliye moono naatthu kaarinaaka.
12 “Vano, nlopwana mmoca neehaniya Ananiyasi, owiivaherera toko cinhimyaaya Nlamulo ni ayuuta otheene yaamulumaaya saana, 13 ahowa ukaavya. Ahophiya mpaka nipuro kaaryaaka ni ahokiirela: ‘Saulu, munnaka uturuwele woona! Ni yooyo ukatyuuyo kahoturuwela woona ni kahomoona. 14 Uyo ahokiirela: ‘Nluku aasinhiya-taateehu hoothanla wiira ucuwele itthu impheelaawe, woone wiira uyo khanle nasariya ni wiiwelele itthu inkhuma wamalakuni wawe, 15 kontha unhala ukhala saahiti iriyari yaatthu otheene nlattu wo citthu coonilyaa ni ciiwilyaa. 16 Vano, unweherera isiyani? Wunwe ni upattisiye, wiira uleveleliye itampi caa, uromolaka ncina nawe.
17 Vano, uturuwela waka u Yerusalemu, kilompaka ntempulu kahokhalana iwooni 18 ni kahowoona Apwiiya akiirelaka: ‘Waakuve, ukhume u Yerusalemu, kontha atthwaayo khanhala waamini usaahiti unhala uvaha mwancina naka.’ 19 Vano, mi kaheera: ‘Pwiiya, atthu otheene anaacuwela sana-saana wiira mi, mmasinakooka motheene, kaanaatthuka ni kanwaattakaca atthu yaawaaminini. 20 Ni ukati weeviyaawe saahitiinyu Estevau, mi kaari wonwo, ni khampheela wiira eeviye ni kankhalenla ikuwo caatthu yaamwiiva.’ 21 Vano, ayo yahokiirela: ‘Urwee, kontha kinaahala wuuveleeliha waamalaponi oottayi.’”
22 Ayo yahomwiiwelela mpaka ayo moolumwaayo. Vano, yahokhuwela yiiraka: “Mmwiive uyo nlopwanooyo, khunomphwanela ukhala ila ituninyeela!” 23 Ukhala wiira yankhuwela yanyakulihacaka ikuwo caawanryaaya ni ahawulaka itthaya avonyeraka nculu, 24 komantante aanatoropooyo ahoruma wiira akusiye Paulu ni arwaaniye nkwartelu ni aattiye akohiyaka, kontha isiyani apoovwaayo anonkhuwelelaaya. 25 Vano, utthukiya wawe wiira oofyulaciye, Paulu ahonkoha nhooleli aanatoropa aari wonwooyo co: “Nlamulo ninawuutthuniherani umwaattakaca nrooma hinahukhumwiya?” 26 Nhooleli aanatoropa umwiiwa wawe iyo, ahorwaa unttonkela komantante ni ahomwiirela: “Pwiiya vano nnohala upankani? Uyo nlopwanooyo nrooma!” 27 Phimaana, komantantyooyo ahomwaattamela ni ahomwiirela: “Ukihimerye, weeva nrooma?” Uyo ahaakhula: “Iyee.” 28 Vano, komantantyooyo ahomwiirela: “Mi kilivile nsurukhu mwinci wiira kikhale nrooma.” Paulu ahomwiirela: “Masi mi kiyariye u Rooma.”
29 Nlattu wo iyo itthwiiyo, alopwana yaapheela unkohakoha ni unhuvihaca, yahokhuma woohipica. Ni komantantyooyo nlattu wontthuka nuunyolo ahoova cinene, ucuwela wawe wiira uyo aari nrooma.
30 Vano, waaseele, apheelaka ucuwela kontha isiyani ayuuta waamootheryacaaya, ahontthukula ni ahoruma wiira ahooleli aanankuttho ni isinedriyu yotheene ithukumane. Vano, ahonkurusa Paulu ni ahomweemesa iriyari yaatthu otheene.