Yantikheliyaaya a Akolosu
4 Nyuuva mapatarawuva, mwaawacere anantekweenyu niisariya ni nimananna omaana, nhiliyalaka wiira nyuuva ciicammo nhaana Apwiiyeenyu wiirimu.
2 Nhihiyerere ulompa ni nhiitthaale nhina iyo itthwiiyo, ni ciicammo munsukhuru Nluku. 3 Ciicammo, nnilompele hiiva, wiira Nluku anaakele nttala unhala unikhitiriha ulalyeera isiiri yowaarya immuuluma Kristu, ile ikiirihile utthukiya nuunyolo, 4 ni wiira kilalyeere iyo isiiriiyo sana-saana khampa kinlamuliyaaka upanka.
5 Nhihiye uthoonyera ucuwelaca iriyari yaatthu ahimpanka mphantte wonloko neekristau, nvarelaka nteko saana ukatiinyu.* 6 Ukati wotheene, moolumweenyu akhale oociva ni oolukiya ni maakha, wiira ncuwele umwaakhula khula ntthu.
7 Tiikiku munnaaka kinonfentaaka, khanle nanteko ookhuluvelyaa ni ipottha yaapwiiyeehu, naahala wuuhimyeerani ihapari cotheene caawaka. 8 Kinawuuveleeliherani uyo munnooyo, wiira oohimyereni mananna ciryeehu ni wiira oomaaliheni. 9 Uyo nowa nkhayi ni Oneesimu, ule nokhala ni nyuuva, khanle nanteko ookhuluvelya ni munnaaka kinonfentaaka; ayo anaahala wuuhimyerani citthu cotheene cineerannya uno.
10 Aristarku, tthukeliye nkhattya wamoca ni miiva, nawuuveleeliherani isalamu, ni ciicammo Markus, mwanhimaawe Pernape (kamuulumaka Markus, nyuuva nhohimeriya mananna nnolamuliyeenyu untafiti awaaka wuuthotolani.) 11 Ciicammo Yesu, ule neehaniya Ookhuluvelyaa, nawuuveleeliherani isalamu. Ala phaale yuulihiye. Ala paasi phinvara nteko wowaakihera Umwene wa Nluku wamoca ni miiva, ni ahokimaaliha* venci cinene. 12 Epaafara, ule nokhalaka ni nyuuva, khanle nanteko a Kristu Yesu, nawuuveleeliherani isalamu. Uyo khanhiyerera wiikurumica wuulompelani, wiira nyuuva nkhale oolikaneliya ni ciicammo nkhale oolipa nhina upanka citthu cinoncivela Nluku. 13 Mi, kihomooneeha uyo wiira naavara nteko mwinci, apheelaka wuukaviherani nyuuva ni ciicammo mayamunna o Layotiseya ni o Eraapoli.
14 Luka, khanle meetiku oofentiya, wamoca ni Demas, ciicammo anawuuveleliherani isalamu. 15 Mwaavahe isalamu caka mayamunna o Layotiseya, arokorihu Ninfa, ni mayamunna anthukumana wapuwani waya. 16 Ni ila iwarakheela mwahalaka usomeliya, mwaavahe ciicammo mayamunna onloko no Layotiseya, wiira ayova ciicammo asome, ni nyuuva ciicammo nsome iwarakha iveleeliheriyaaya. 17 Ciicammo, munhimyeere Rikhipu co: “Uvaresese nteko uvahiyaa naapwiiya, wiira ukhitiri upanka saana.”
18 Mwaakhele isalamu cantikhilyaaka nimatataaka. Nhiliyale wuupuwela unyolo miiva utthukeliyaaka. Unamaana woonironya wa Nluku ukhale ni nyuuva mayamunna.