Iwarakha yoopacera yantikheliyaaya akorintu
16 Vano, koolumaka micanko cinlamuliyaaya uvahiya atthu ookhuluvelyaa, kinawuulepelani utthara malakihero kaavahilyaaka mayamunna o maloko o Kalasiya. 2 Nihuku noopacera no khula isumana, khula ntthu asunke mwansurukhu mphanttyaayaru attharihaka makhalelwaawe, wiira nnyo micankonnyo cihipankiye kinawileene. 3 Vano kawaaka vale nwo, kinaahala waaveleeliha u Yerusalemu alopwana nyuuva mwaatthi vaa nnohaleenyu waathanla, wiira ayo arwaane ncanko nvahileenyu ninrimeenyu wotheene. 4 Wakhala wiira unaahala ureerana ni miiva urwaa wonwo, kinaahala waarwaanana.
5 Masi kinaahala uwa wuuthotolani kapwahaka u Masetoniya, ukhala wiira khimpheela uvira wonwo; 6 ni atthunaka kinaahala uviriha mahuku menci kinari ni nyuuva, ni pooti ukhalaka wiira iyiita yotheene inhala uvira kinari wonwo, wiira nihuku kinhalaaka ukhuma nwo mwaatthiva nsikiveleele. 7 Kontha akimpheela uwa wuuthotolani kinari niikwaha, Yehova natthunne, waakicivenle uviriha ukati mwinci kinari ni nyuuva. 8 Masi, kinkookhala u Efesu mpaka uvira ifesta yo Pentekositi, 9 kontha uhokihulyeela nkhora wiira kivare miteko cinci, masi ahaavo awanani enci.
10 Timotiyu awaaka nwo, mpanke* mananna wiira hoove hataa itthu ukati unhalaawe ukhala ni nyuuva, kontha uyo nvara nteko wa Yehova, khampa miiva kinvaraaka. 11 Phimaana, hikhale nontanyifu.* Munveleele ninnema wiira aphiye nipuro kiryaaka, ukhala wiira miiva ni mayamunna ninaamwaareriha.
12 Munneehu Apolu, kihonkhanyereriha uwa wuuthotolani nkhayi ni mayamunna akhwaawe. Masi uyo khatthunile uwa wuuthotolani naanaano, masi naahala uwa mahuku makhwaawe.
13 Nhiitthaale, nkhalane waamini woolipa ni nkhale okuru. 14 Citthu cotheene cimpankeenyu mpanke ni nifento.
15 Ihaavo inoolepelaakani mayamunna: Toko cincuweleenyu, amucyaawe Esteefani phaapacenre ukhala eetthuci ilapo yo Akaya ni ayo aheekurumica waavarela nteko atthu ookhuluvelyaa. 16 Nwiiwelele atthu toko ayo ni otheene ale aneewelela malakihero ni aneekurumica uvara nteko. 17 Masi, kiri ootteeliya nrima cinene nlattu woowa Esteefani, Fortunatu ni Akayiku. Kontha ayo ahokikavihera venci ukati wahaarivweenyu. 18 Ukhala wiira ahokilipiha miiva ni ahoolipihani nyuuva. Phimaana, mwaattitthimihe alopwana toko ayo.
19 Mayamunna omaloko o Asiya anawuuveleeliherani isalamu. Aakila ni Priska wamoca ni mayamunna anthukumana uwannyaya, ciicammo anawuuveleliherani isalamu nyuuva eetthuci Aapwiiya. 20 Mayamunna otheene anawuuveleeliherani isalamu. Nsalamihane nvahanaka ipeecu.
21 Nnya isalamunnya thi mi Paulu kinooveleeliherani, kantikhilyaaka imwaneennyaaka.
22 Ntthu aahaafenteke Apwiiya, uyo ntthuuyo alaphakaciye. Pwiiya, nwe! 23 Unamaana woonironya wa Pwiiya Yesu ukhale ni nyuuva. 24 Kinawuufentani mayamunna otheene, wamoca ni Kristu Yesu.