Miteko co Mapostolu
6 Ale mahukwaale, atthari yantepa winciva, ayuuta yooluma ikereku yahopacera uwuuluma pusya ayuuta yooluma iheperewu, kontha ukati waakawiyaaya iyoolya yo khula nihuku anankhweli okhurupwaaya khayaavahiya. 2 Vano, maapostolu 12, yahothukumana naatthari akhwaawe ni yaheera: “Khawaahala ureera uhiya uhiya nuulumo na Nluku wiira nikawe iyoolya. 3 Phimaana, mayamunna, mwaathanle alopwana 7 iriyariinyu, arina makhalelo omaana, owaacara nnepa wowaarya ni oocuwelaca ni hiiva ninaahala waathanla wiira avare uyo ntekooyo. 4 Vano, hiiva ninaahala wiikurumica uhihiyerera ulompa ni ulalyeera.” 5 Itthu yoolumacilyaaya yahaacivela atthu otheene, ni yahonthanla Estevau nlopwana aarina waamini ni wancanre nnepa wowaarya, ciicammo Filipe, Porokoru, Nikanori, Timawu, Parimena ni Nikolawu, eevaherenre unswalela Nluku aakhuma u Antiyokiya. 6 Vano, yahaarwaana nipuro yaaryaaya maapostolu, ni maapostolu ulompa waya, yahoweeserera matataaya.
7 Vano, nuulumo na Nluku nahopacera umwaryeela ilapo yotheene ni atthari yahopacera wuncererya u Yerusalemu. Ni anankuttho enci yahopacera waamini.
8 Estevau unancanreene nnepa wowaarya ni ikuru, ampanka mathoonyero ni mitikhiniho iriyari yaapoovu. 9 Masi, alopwana yaapanka mphantte Isinakooka Yaatthu Ootaphuliya, nkhayi naatthu yaakhuma u Sireene ni o Alixantriya, ni atthu akhwaawe yaakhuma u Siliisiya ni u Asiya, yahorwaa unnyakulihanana Estevau. 10 Masi, ayo khayaakhitiri unvaanyiha, nlattu woocuwelaca wawe ni ooluma akaviheriyaka ninnepa wowaaryaa. 11 Masi, yahaavo alopwana akhwaawe yaatheperya yiiraka: “Hi nihomwiiwa ula anveehaka Moceesi ni Nluku.” 12 Ni ayo, yahaatheperya apoovu, mahumu aapoovu ni anamantikha, wiira yanvare niikuru ni anrwaane u Sinedriyu. 13 Ni yahaawaana masaahiti owootha, yenre: “Ula nlopwanoola khanhiyerera wuuluma pusya nna nipuro nowaaryanna ni anawuuluma pusya nlamulo. 14 Wootakihera, hi nihomwiiwa ula eeraka wiira Yesu o Nasaree, naahala ukwanyulaca nna nipuronna ni naahala waakakhaniha malamulo Moceesi nivahilyaawe.”
15 Vano, atthu otheene yonkomile u Sinedriyu unweheeha waya saana, yahoona wiira ikhovyaawe yaakhala khampa ikhove yo nlayikha.