Iwarakha yoopacera yantikheliyaaya akorintu
12 Vano mayamunna, kinookurumicani wiira nhivyaavyeehe citthu cinkhitiriinyu upanka coominepani. 2 Nyuuva nnaacuwela wiira ukati mwaariinyu naatthu ontuninyani, mwaaneettihiya naanluku oohuulumaca, ni mwaanaatthara ayo anlukwaayo khula nipuro noorwaanaayani. 3 Phimaana, kimpheela ncuwele wiira khaavo neera: “Yesu hotakhaliya!” akaviheriyaka ninnepa wa Nluku, ni khaavo neera: “Yesu phiri Pwiiya!” uhikhanle wiira nokaviheriya ninnepa wowaarya.
4 Citthu cinkhitiriihu upanka cinaavirikana, masi nnepa wowaarya unnikavihera, uri mmoca paasi; 5 cihaavo miteko cinci coovara, masi Apwiiya ari amoca paasi. 6 Cihaavo miteko cinci coovirikana, masi Nluku naakavihera atthu uvara nnyo mitekonnyo ri mmoca paasi. 7 Masi unawoonannya wiira citthu cotheene atthwaayo cimpankaaya, ankaviheriya ninnepa wowaarya, ni Nluku nopanka commo, wiira atthu otheene aphwanyere ifayita iyo itthwiiyo. 8 Kontha nnepa wowaarya, unaawiiriha atthu akhwaawyaayo wuuluma nuucuwelaca; akinaayo wuuluma citthu cihincuweliya; 9 akhwaawyaayo ukhalana waamini woolipa; akinakwaayo ukhitiri waavoniha atthu; 10 ni akiina, unawaakavihera upanka miiriirya, ukhitiri uhimyaca citthu cinhala wiirannya uhoolo, ucuwelela wakhala wiira itthu yiiwilyaaya inkhuma wa Nluku awula mena, ukhitiri wuuluma iluuka cinci ni akhwaawyaayo unawaakavihera utaphulela iluuka cinci. 11 Masi citthu cotheene nnya cimpankiya ninnepa wowaarya, ni uyo nnepa wowaaryooyo, phimmwiiriha ntthu ukhitiri upanka citthu cimpheelaaya.
12 Kontha irutthu ihookhalanaru miphantte cinci, iyo iri imoca paasi, ni Kristu phiryaawe ciicammo. 13 Kontha otheene cihu nipattisiye ninnepa mmoca wiira nikhale irutthu imoca, hataa nikhalaka ayuuta, akereeku, ipottha awula atthu ootaphuwa, ni otheene cihu, naakhenle ikuru co uyo nnepooyo.
14 Khweeliini, irutthu kirina mphantte mmoca paasi, iyo ihaana miphantte cinci. 15 Nnyaa neera co: “Ukhala wiira akinakhala ntata, akimpanka mphantte wo irutthu,” kahi iyo phaahala wiiriha nnyaa uhiya upanka mphantte wo irutthu. 16 Ni nnyaru neera co: “Ukhala wiira akinakhala niitho, akimpanka mphantte wo irutthu,” kahi iyo phaahala wiira nnyaru uhiya upanka mphantte wo irutthu. 17 Unari wiira irutthu yotheene yaari niitho, manyarwaayo yaahala ukhala vayi? Unari wiira irutthu yotheene yaari nnyaru, iphuleeyo yaahala ukhala vayi? 18 Masi khweeliini, Nluku eesile khula mphantte wo irutthweehu nipuro nincivenlyaaya.
19 Unari wiira miphantte co irutthweehu caari cimocaaru, irutthu yaahala ukhala cani? 20 Masi cihaavo miphantte cinci, uhookhalaru commo, iri irutthu imoca paasi. 21 Niitho khaninlamuliya wiirela ntata co: “Akinoopheela weeva,” ni hataa muru khunlamuliya wiirela manyaa co: “Akinoopheelacani nyuuva.” 22 Miphantte co irutthu cinkhala khampa coovyaavya, cihaana ifayita cinene, 23 ni miphantte co mwiirutthuni wihu ninooneehu uhikhalana ifayita cinene, ninaakhuneelaca sana-saana; ni iyo inanneeyo, miphantte co irutthu cinooneleehu ihaaya, phintepeehu ureeriha. 24 Masi miphantte comwiirutthuni wihu cooreera, khacimpheela ureerihiya. Nluku commo phumpilyaawe irutthu. Phimaana, uyo notepa uttitthimiha mphantte yo irutthu uhitepile ureera, 25 wiira miphantte co mwiirutthuni cihikhale cookawannyaaca, masi wiira nnyo miphanttennyo cikaviherane. 26 Mphantte mmoca wo mwiirutthuni wahuvahuvaka, miphantte cikhwaawennyo ciicammo cinaahuva, mphantte mmoca wo mwiirutthuni wattottopeliyaka, miphantte cikhwaawennyo cinaakhala cootteeliya.
27 Coo, nyuuva mwaatthi nkhanle irutthu ya Kristu, ni khula ntthu khanle mphantte wo irutthu ya Kristu. 28 Ni Nluku heesa wanlokoni miphantte cinci: woopacera, maapoostolu; wonayeeli, maporofeeta; woneeraru, eetthucihi; ciicammo ahaavo ale ankhitiri upanka miiriirya, ahaavo ankhitiri uvoniha iretta; ahaavo unaacivela waakavihera akhunanaya; ahaavo ankhitiri uhoolela sana ni ciicammo ahaavo ale ankhitiri wuuluma iluuka cinci. 29 Niireke otheene akhanle maapoostolu? Niireke otheene akhanle maporofeeta? Niireke otheene akhanle eetthucihi? Niireke otheene anaakhitiri upanka miiriirya? 30 Niireke otheene anaakhitiri uvoniha iretta? Niireke otheene anaakhitiri wuuluma iluuka cinci? Niireke otheene anaakhitiri utaphulela iluuka cinci? 31 Nhihiyerere wiikurumica ukhitiri upanka citthu cuulupale, ni miiva, kinaahala uwooniherani itthu yootepa ureera inlamuliyeenyu upanka.