Yonayeeli ya Akorintu
6 Hi ninvara nteko wamoca ni Nluku, ninawuulepela wiira nhaakhelele unamaana woonironya wa Nluku masi woohivarela Nteko. 2 Kontha uyo heera co: “Ukati miiva waathonyenryaaka wuuwacera, mi kaahowiiwa, ni nihuku waapheelaa woopoliya, mi kahookavihera.” Moone, ula phiri ukati wootepa ureera. Moone, ula phiri ukati wowoopoliya!
3 Hi khanimpanka hataa itthu yaahala umwiiriha ntthu ukakathuwa, wiira ntekweehu woolalyeera uhuulumiye pusya; 4 Phimaana, ninaathoonyera nimananna otheene wiira hiiva ninonvarela nteko Nluku, nimpanka iyo nivilelaka nattehattehiyaka vale, naananaka marikariko, yanithwaaka itthu, naananaka masankiho, 5 naattakaciyaka vale, natthukeliyaka mmakhatteya, nakhalaka iriyari yaatthu annoopopiha, ukati unvareehu nteko mwinci, navirihaka uhiyu nteru woohirupa, ukati uhinooneehu itthu yoolya; 6 neekurumicaka ukhalana meettelo omaana, weettela citthu cineetthuceehu, nithoonyeraka unamaana, nihiyaka nnepa wowaarya unihoolelaka, nithoonyeraka nifento neekhweeli, 7 noolumaka ikhweeli, nikhuluvelaka ikuru ya Nluku, nivarelaka ikaputthi cosariya moonweehu wonlopwana ni moonweehu wonthiyana, 8 hiiva ninaattitthimihiyaka ni ninaaterempulaciyaka,* ninaaveehiyaka ni ninaattottopeliyaka. Ninawooniyaka ukhala anawootha hataa ukhala wiira ninhimya ikhweeli; 9 hataa ukhalaka wiira nintafitiyaka khampa atthu oohicuweliya, masi hi ninaacuweliya ni Nluku, hataa nooniyaka ukhala khampa atthu unaahaleela ukati vakaani wiira akhwe, masi hiiva nihaavo akumi; hataa nooniyaka ukhala khampa atthu anhuvihaciya, masi khanihukhumwiye wiiviya; 10 hataa nooniyaka ukhala atthu ooriipiya nrima, masi hiivano ukati wotheene ninkhala ootteeliya, hataa nooniyaka ukhala atthu oohuva, masi hi ninawaavahaka atthu citthu cinci ni comaana, hataa nooniyaka uhikhalana itthu, masi hiiva nihaana citthu cinci.
11 Mayamunna o Korintu, ninwuulumanani nyuuva woohuukhuwakhuwani itthu, ni ninawuufentani ninrimeehu wootheene. 12 Hi ninawiikurumica wuufentani, masi nyuuva mwaatthi kannothoonyera unifenta. 13 Mi kinaawuulumanani khampa asaanaaka, nthoonyere unifenta toko hiiva ninoofenteehuni.
14 Nhaatakaneelane atthu oohaamini, kontha isariya khinvaranaca ni itthu yoohinamaana; ni hataa iluusu khinvaranaca niipiphi. 15 Inanna imocaaru, Kristu khanvaranaca ni Sotwani;* Ciicammo ntthu owaamini khanvaranaca ni ntthu ohaamini. 16 Anluku oohikhweeli khanlamuliya ukhala ntempuluni ya Nluku eekhweeli. Kontha hiivano nikhanle itempulu ya Nluku nkumi, khampa uyo enryaawe co: “Kinaahala ukhala iriyaryaaya ni kinaahala weetta wamoca naayova, mi kinaahala ukhala Nlukwaaya ni ayo anahala ukhala apoovwaaka.” 17 Yehova neera: “‘Phimaana, nkhume iriyaryaaya ni nkhale uttayi naayo’ ‘nhiye uvara citthu coohiirya,’” “‘ni mi kinaahala uwaakhelelani.’” 18 “Yehova Nakuru-Cotheene neera: ‘ni mi kinaahala ukhala Apaapeenyu, ni nyuuva otheene nnahala ukhala asaanaaka.’”