Miteko co Mapostolu
14 U Ikoniyu, ayo yahokela nkhayi nsinakooka ya ayuuta ni yahooluma mpaka atthu enci ayuuta ni akereeku, yahopacera waamini. 2 Masi, ayuuta yahaaminni, yahaatheperya atthu akhwaawe wiira yaarukunuwele mayamunna. 3 Vano, Yehova ahonvaha ikuru Paulu ni Pernape ni yahoviriha ukati mwinci yuulumaka yalipakoono nrima; ni Uyo ahovaha usaahiti woonamaanaawe woonironya, aakaviheraka wiiraneeha mathoonyero ni miiriirya. 4 Masi, atthu o ile isittattiile, yahanca ukawannyaaca: akiina yaakhala mphantte waayuuta ni akhwaawyaayo yaakhala mphantte wo maapostolu. 5 Vano, atthu omaloko makhwaawe, nkhayi naayuuta ni ahoolelyaaya, yaholakela waahuviha ni waavonyakaca nimaluku. 6 Ucuwela waya, yahotthawela u Listra ni u Terpe, isittatti yo Likawoniya, ni micoko cowaattamela. 7 Nwo, khayaahiyerenre ulalyeera ihapari comaana.
8 U Listra, ahaavo nlopwana mmoca oopahuwa manyaa; uyo khoorya weetta iyaryeelwaawe. Uyo aahowunkoma 9 anviriyanaka Paulu oolumacaka. Paulu, ahonweheeha ni woona wawe wiira ahaana waamini wiira avonihiye, 10 Paulu ahokhuwela venci eeraka: “Wunwe ni weemele.” Vano, nlopwanooyo ahotupha ni ahopacera weetta. 11 Vano, atthu otheene woona waya itthu Paulu yaapankilyaawe, yahokhuwela niiluukaaya yeeraka: “Anluku ahoonikhuruwela khampa apinaatamu!” 12 Vano, yahomwiihana Pernape, nluku Zewu ni Paulu, nluku Ermes, ukhala wiira ayo phooluma ayo moolumwaayo. 13 Itempulu ya nluku Zewu, yaakhala wakhiviru ni wankhora woosittatti. Vano, nankuttho anluku Zewu, ahocisa imope ni ikhara yofoloore ni ahorwaana mpaka waari mikhora cuulupale, ni aapheela uvaha itthuvo nkhayi naapoovu.
14 Ukati maapostolu Paulu ni Pernape waacuwenlyaaya iyo itthwiiyo, yahaanyula ikuwo caya, yahotthawelela iriyari yaapoovu yahokhuwela yeeraka: 15 “Alopwana, nnopankelani ila itthwiila? Hiiva ciicammo naapinaatamu oopahuwa toko nyuuva. Ni ninoolalyeerani ihapari comaana wiira nnyeme nnya citthunnya ni mmwaamini Nluku nkumi, umpile irimu, ituninya, ipahari ni citthu cotheene cirivo. 16 Khalayi, uyo ahotthuniha wiira atthu omaloko makhwaawe yeettele mittala caya, 17 uhookhalaru wiira khaahiile uvaha usaahityaawe. Kontha hothoonyera unamaanaawe oovahakani ipula ni ukati woohepha, wiira ihuuvoleni itala ni wuutteeleni nrima.” 18 Wahookhalaru wiira yahowiirela commo, wahaarika cinene waahiiha ayo atthwaayo uvaha itthuvo.
19 Vano, yahowa ayuuta o Antiyokiya ni o Ikoniyu yaathepenrye ayo atthwaayo; vano, yahonvonyakaca nimaluku Paulu ni yahompurulela vate waya isittatti, yoonihaka toko wiira ahokhwa. 20 Vano, ukati atthari wanthukumanenlyaaya, uyo ahonwa ni ahorwaa nsittatti. Waaseele, uyo ahokhuma ni Pernape arwaaka u Terpe. 21 Ulalyeera waya ihapari comaana iyo isittattiiyo ni waapanka waya atthari enci, yahoturuwela u Listra, u Ikoniyu ni u Antiyokiya. 22 Nwo, yahaalipiha atthari, yaakurumicaka wiira ahihiyerere ukhalana waamini, awiirelaka: “Wiira nikele muumweneni wa Nluku, nihaana waanana masakha menci.” 23 Uhiya commo, yahaathanla mahumu o khula nloko, yapankaka mavekelo ni yatthukaka, ni yaahonhiya Yehova wiira aawacere.
24 Vano, yahovira u Pisiitia ni yahophiya u Panfiiliya, 25 ni ulalyeera waya u Perke yahorwaa u Italiya. 26 Ni ukhuma waya nwo, yahowela ikalawa yaturuwelaka u Antiyokiya, nwo phaavahiyaaya unamaana woonironya wa Nluku wiira avare-tho nteko, waamalihilyaaya.
27 Uphiya waya nwo, ni uthukumaniha waya nloko, yahaahimeerya citthu cinci Nluku aapankilyaawe aavarelaka nteko ayova, nimananna aakavihenryaawe atthu enci ukhalana waamini. 28 Vano, yahoviriha ukati mwinci anari nkhayi naayo attharyaayo.