Yantikheliyaaya Akalasiya
1 Miiva Paulu, Apostolu thanliye kahi naapinaatamu masi ni Yesu Kristu wamoca ni Nluku, Apaapeehu, amunwelelihile Yesu Kristu, 2 ni ciicammo mayamunna otheene ari ni miiva, ninantikhela ila iwarakheela maloko otheene o Kalasiya:
3 Nkhalane unamaana woonironya ni nnema na Nluku, akhanle Apaapeehu ni ciicammo na Pwiiyeehu Yesu Kristu. 4 Uyo heevaherera nlattu wo matampiihu wiira anoopole ila ituniya yoohinamaaneela, toko cimpheelaawe Nluku, khanle Apaapeehu; 5 attitthimihiye Nluku mpaka. Amem.
6 Kiri ootikhinihiya nlattu woocuwela wiira woohipica, nyuuva nhonhiya ule wiihanneni wiira mwaakhele unamaana wowuuronyani wa Kristu, wiira ntthare ihapari comaana cikhwaawe. 7 Akineeraka wiira khacivo-tho ihapari comaana cikhwaawe, masi ahaavo atthu anoohapusani ni ampheela urukunusa ihapari comaana ca Kristu. 8 Vano, hataa akhumelelaka ntthu iriyariihu awula nlayikha no wiirimu, nalalyeeraka ihapari comaana coovirikana ni nnye cuulalyenreehuni, nno nlayikhanno awula uyo ntthuuyo alaphakaciye. 9 Khampa cuuhimenryeehuni va, kinawaakulela wuuhimeeryani: Khula ntthu nohala wuulalyeerani ihapari comaana coovirikana ni nnye nyuuva cinkupaliinyu, uyo ntthuuyo alaphakaciye.
10 Mi akinapheelaka ukupaliya naapinaatamu, masi kimpheela ukupaliya ni Nluku. Unari wiira kimmananiha ukupaliya naapinaatamu, mi akaahala ukhala ipottha ya Kristu. 11 Mayamunna, kimpheela ncuwele wiira ihapari comaana cuulalyenryaakani, khacinaakhumakhuma apinaatamu; 12 kontha nnyo ihaparinnyo akihimeeriye naapinaatamu ni hataa akiitthucihiye nintthu, masi, miivano kihimeeriye ni Yesu Kristu.
13 Nyuuva mwaatthi nheewa weeriyaka wiira ukati weettelaka ittiini yaayuuta, mi kaaneekurumica cinene waalupattha atthu onloko na Nluku ni kampanka citthu coohinamaana wiira kimalamalihe nno nloko nno; 14 ni mi kanvahaceriyaka mirintti nhina ittiini yaayuuta, waapwaha ale yaarina myaakha cimocaaru ni miiva, iyo itthwiiyo yeerannya kontha miiva kaaneekurumica weettela ileema caasipaapaaka. 15 Masi, Nluku eerihile miiva uyariya, ni kiihanne nlattu Woonamaanaawe woonironya, ahoona ukhala itthu yomaana, 16 waahimyeera atthu mwanawe akivarelaka nteko miiva, wiira miiva kaalalyeere ihapari comaana atthu ontuniyani co uyo mwaanooyo, mi nkaarweele unkohakoha ntthu nnyo ihapari comaanannyo; 17 ni hataa akaarweele ukohakoha u Yerusalemu, waaphwanyannyaaya maapoostolu athanliye miiva kihinaaya uthanliya, masi mi kahorwaa u Arapiya ni ciicammo kahoturuwela u Tamaasku.
18 Vano, uvira waya myaakha miraru, kahorwaa u Yerusalemu wiira kanthotole* Sefas ni kahokhala nuuyova mahuku 15. 19 Masi mi akaawoonananne maapoostolu akhwaawyaayo, hikhanle Tiyaku paasi, mwanhimaaya Apwiiya. 20 Vano, citthu kinwantikhelaakani nnyo, mi kinawuukhuluvelihani uhoolo wa Nluku wiira akinoothaka itthu.
21 Vano, ukhuma waka nwo, mi kahorwaa ncoko wo Asiiriya ni wo Siliisiya. 22 Masi mayamunna o Yuteya yaamwaataanana Kristu, yaari ahinapaca ukoona. 23 Ayo yaaca wiiwa weeriyaka co: “Nlopwana aanilupatthoole, nnaco neera alalyeeraka ihapari comaana cinuuluma waamini urineehu waapheelaawe umalamaliha.” 24 Mpaka ayo yahancera unttitthimiha Nluku nlattu waawaka.