Iwarakha yoopacera yantikheliyaaya akorintu
1 Miiva Paulu, kiihaniye wiira kikhale apostolu a Kristu Yesu nuutthuna wa Nluku, wamoca ni munneehu Sostene, 2 ninwantikhela ila iwarakheela mayamunna o nloko na Nluku nimphwanyannya u Korintu, nyuuva nreerihiye va wiira nkhale wamoca ni Kristu Yesu. Nyuuva mwiihaniye wiira nkhale owaarya, wamoca naatthu amphwanyannya mapuro otheene, anlompa mwancina na Yesu Kristu khanle Pwiiyaaya ni Pwiiyeehu:
3 Nkhalane unamaana woonironya ni nnema ninvahaawe Nluku, khanle Apaapeehu, ni ninvahaaya Apwiiyeehu Yesu Kristu
4 Kinansukhuru Nlukwaaka ukati wotheene, uwooniherani wawe unamaana wowuuronyani anvarelaka nteko Kristu Yesu; 5 kontha uyo hoovahani mihakhu nhina citthu cotheene, ookhitirihakani wuuluma ni ukhalana ucuwelaca, 6 ukhala wiira ihapari ca Kristu cihoolipihani, 7 nlattu wo iyo, khunhala wuuhaleelani ucuwelaca hataa vakaani, mwawehereraka ukati Apwiiyeehu Yesu Kristu anhalaaya wooniheriya. 8 Ni uyo naahala wuulipihani mpaka wuumaleloni, wiira nhootheriye hataa itthu nihuku na Apwiiyeehu Yesu Kristu. 9 Nluku, ule wiihanneni wiira nkhale wamoca* nimwanawe Yesu Kristu, Apwiiyeehu, akhanle ookhuluvelyaa.
10 Mayamunna, mwancina na Apwiiyeehu Yesu Kristu, kinawuusovenrihani* otheene wiira mwaataane ni uhikhale uhiiwanana iriyariinyu, masi nkhalane moopuwelelo ni moonelo mamocaaru. 11 Kontha ahaavo amucyaawe Kolowe, akihimyenre wiira khanneewanana. 12 Impheelaaka uhimya phiila, nyuuva mwaatthiva nneera: “Mi kiri mphantte wa Paulu,” vano akhwaawe aneera, “mi kiri mphantte wa Apolu,” akinaayo aneera “mi kiri mphantte wa Sefas,” vano akinakwaayo aneera “mi kiri mphantte wa Kristu.” 13 Niireke wiira Kristu hookawannyaaca? Niireke wiira Paulu heeviya wanipottoni wiira awoopoleni? Awula, niireke wiira nyuuva mpattisiye mwancina na Paulu? 14 Kinansukhuru Nluku, ukhala wiira iriyariinyu khaavo kimpattisilyaaka, hikhanle Krispu ni Kaayu. 15 Wiira hikhale neera wiira mpattisiye mwa ncina naka. 16 Kihaapattisa ciicammo amucyaawe Esteefani. Atthu akhwaawyaayo, akincuwela wakhala wiira ahaavo ciicammo kaapattisilyaaka. 17 Ni khweeliini, Kristu khakirumile waapattisa atthu, masi kirumile ulalyaa ihapari comaana; ni khakirumile ulalyaa koolumacaka nimananna owoonihera ucuwelaca, wiira nipotto* nawe nihihiye ukhalana ifayita.
18 Atthu anweherera utankanyiya, khacinaacivela myaha cinooluma nipotto naakhomeliyaawe Yesu, masi hiiva ninweherera woopoliyava, ninoona ukhala ikuru ya Nluku. 19 Kontha uhantikhiya co: “Kinaahala umaliha ucuwelaca waatthu oocuwelaca ni akinhala utthuna woorya urinaaya anamasoma.” 20 Ari vayi acuwelaci? Ari vayi anamantikha? Ari vayi ale anvaanyiha citthu co ila ituniyeela? Niireke Nluku khoonihenre wiira ucuwelaca wo ila ituniyeela ukhanle woololo? 21 Ukhala wiira atthu o ila ituniyeela anaakhuluvela ankhilyaaya, ayo khaanoncuwela Nluku, citthu cinlalyeereehu anoona ukhala coololo. Uhookhalaru commo, Nluku howoopola ale yaaminni.
22 Ukati ayuuta anlepelaaya mathoonyero ni akereeku anaanvyaaya ucuwelaca, 23 hiiva ninonlalyaa Kristu eeviye wanipottoni, ule khottiye naayuuta ni nooniya ukhala nlolo naamalaponi. 24 Nyuuva nkhanle ayuuta ni akereeku, ncuwele wiira Kristu phikhanle ikuru ni ucuwelaca wa Nluku. 25 Kontha itthu ya Nluku inooniya ukhala ilolo, phiri yoocuwelaca waavikana atthu. Ni itthu ya Nluku inooniya ukhala yoohilipa, phiri yoolipa waavikana atthu.
26 Nlattu wowiihaniya winyu nyuuva mayamunna, nnaakhitiri woona wiira iriyaryaaya ale yiihaniye, khanyincivile atthu oocuwelaca cinene uhoolo waapinaatamu, akhulupale ni atthu ookhuma mmatthokoni coopuhiya. 27 Masi Nluku haathanla atthu anooniya ukhala alolo ontuniyani, wiira awoonihace ihaaya atthu oocuwelaca. Ni Nluku hothanla citthu coohikuru contuniyani wiira oonihace ihaaya citthu cokuru. 28 Ni Nluku hothanla citthu cinooniya ukhala coohifayita, coothanyiya ni coohiphureliya itthu contuninyani, wiira amalamalihe citthu cinooniya ukhala cofayita. 29 Wiira hikhale nohala wiicoona uhoolo wa Nluku. 30 Nlattu wa Nluku, phimmwaataananeenyu Kristu Yesu, khanle ucuwelaca wihu unweela mphantte wa Nluku, isariyeehu, uttitthima wihu ni woopoliya wihu mmatampini. 31 Wiira ukhale khampa cantikhiyaaya: “Ule neettottopa,* eettottope nlattu wa Yehova.”