Gideau wamoca ni alopwana 300

Unavinreene ukati, a Sarayeeli yahoturuwela waaswalela anluku oohikhweeli. Phimaana, Yehova ahaahiya a Sarayeeli myaakha 7 yinnyeriyaka naalopwana o mitiyani. Ayo yaninnyeriya inama caya ni cankwannyulaciya imatta caya. Wiira yaatthawe atthu o mitiyani, a Sarayeeli yaaneepitha mmakhukuni ni mmamyaakoni. Ayo yaahonlepela Yehova wiira aakavihere. Phimaana, Yehova ahoruma nlayikha nimoca wiira namuulumane mwammirawo mmoca eehaniya Gideau. Nno nlayikhanno, nahomwiirela Gideau co: “Yehova hoothanla wiira uwoopole asarayeli.” Gideau ahokoha nlayikhanno co: “Mi? Mi kinhala ukhitiri cani upanka iyo itthwiiyo? Ntirikhi khampa mi!”

Gideau aaholakela upanka mwaavi wiira acuwele wakhala wiira Yehova aahonthanla. Vano, uyo aheesa nttapala vathi ni aholompa eeraka: “Yehova! wakhala wiira nna nttapalanna kinaaphwanya meelo ninattapwile ni itthayeeyo inoomile, mi kinaahala ucuwela wiira weeva uhokithanla wiira kiwoopole asarayeli.” Usa waya, nttapalanno naahonaana ni itthayeeyo yaahooma. Masi Gideau nanlelo aari hinakupaleeha. Phimaana, aahonlepela Yehova wiira avirikanihe. Uyo aaholepela eeraka co: “Meelo wakhalaka wiira ila itthayeela kinaaphwanya inanaanile ni nttapalanno ninoomile, kinaahala ukupali wiira uhokithanla para woopola asarayeli.” Ni usa waya, yaheerannya. Vano, Gideau ahokupali wiira aahothanliya ni Yehova. Vano Gideau ahaatthenkaca anakhotto otheene ni aahorwaa waanana mamitiyanita.

Yehova aahomwiirela Gideau co: “Mi kinaahala waakavihera a Sarayeeli. Masi akimpheela wiira ayo yuupuwele wiira akhitinri upanka iyo veekhaaya. Phimaana, waahimeerye atthu anoova wiira arwee uwaani.” Vano anakhotto 22.000 yahoturuwela uwaani. Ni yaahanle paahi 10.000. Yehova aahomwiirela Gideau co: “Nanlelo khaamalaca. Waarume wiira arwee umoolokoni yawurye. Waahalane paahi anakhotto anhala ukhitiri uno yawuryakoono ni yawehawehaka.” Atthu 300 paahi phakhitinri uwurya uno yawehawehakoono. Yehova ahonkhuluveliha Gideau wiira anhala waavarela nteko ayo atthu 300 ayo wiira yaattheme anakhotto 135 o mitiyani.

Ule uhiyuule, Yehova aahomwiirela Gideau wiira wahophiya ukati para waatuphela atthu o mitiyani. Gideau ahaavaha anakhottwyaayo mapalapatta ni ijaaru cuulupale ni mithuko nhinammo ni ciicammo nttapala ni ahowiirela co: mwiitthenkace, itthu inhalaaka upanka ni nyuuva mpanke yeeyo, Gideau ahoopa nipalapatta, ahopwesa ijaarwiiyo ni aahokhuwela eeraka: “Ikatana ya Yehova ni ya Gideau!” Alopwana otheene 300 yahopanka itthu imocaaru. Atthu oo mitiyani yahoova cinene ni yaahotthawela miphantte coovirikana. Atthawakoono, yaahopacera wiivakana ayaayoru. Vano, Yehova aahaakavihera-tho asarayeli waatthema awanannyaaya.