IHANTISI 54
Yehova ahompisera nrima Jonas
Ilapo yo u Siiriya yahaavo isittatti yeehaniya u Niinive atthu o iyo isittattiiyo yaari ootakhala nrima, phimaana Yehova ahonruma Jonas wiira arwee iyo isittattiiyo ni ahimeerye atthwaayo wiira arukunuse moopuwelelwaaya ni attharuwe. Masi Jonas uhiya urwaa u Niinive, uyo ahowela ikalawa ni ahotthawela u Tarsis ncoko waattalivanne cinene ni Niinive.
Ukati weettaaya Ikalaweeyo, yahopacera iphyo yuulupale mpaka atthu yeettiha ikalaweeyo yahoova cinene. Yahopacera waalompa anlukwaaya wiira acuwele nlattuni yaakhumelelaaya ile ihasareele. Vano, Jonas ahowiirela atthu yeettiha ikalawaayo co: “Ila ihasareela inkhumelela nlattu waawaka. Yehova ihaavo ikurumilyaawe upanka vano mi kihootthawa. Mwakivonyeraka mu mpahari mu ila iphyoola inaahala umaala.” Atthu yeettiha ekalawaayo khayaapheela unvonyeera mpaharimmo, masi Jonas ahaakhanyereriha. Vano ukati wanvonyenryaawe mpaharimmo iphyooyo yahomaala.
Jonas oopuwela wiira anhala ukhwa, ukati aaviraawe atepaka uneela mmaacinimmo ahonlompa Yehova. Uyo ukatyuuyo Yehova ahoruma ihopa yuulupale. Iyo ihopeeyo yahommirya Jonas masi khayamwiivile. Naryeene mmirimani wo ihopa Jonas ahonlompa eeraka: “Yehova, kinaalapha wiira, ikhumelo ileelo mpaka uhoolo, kinaahala uwiiwelelani.” Jonas ahokhala mmirimani wo ihopa mahuku mararu. Nuuwakatyaaya, Yehova aheeriha ihopeeyo unraphyaa Jonas ninseresere ipahariiyo.
Niireke iyo itthwiiyo yaataphulela wiira Jonas khaalamuliya uturuwela uwaani? Mena. Jonas ahoturuwela uwaani, ni Yehova ahonruma tho Jonas wiira arwee u Niinive, masi ula nkwahoola Jonas aheewelela. Uphiyawawe nwo ahopacera ulalyaa eeraka: “Yamalaka mahuku 40, Niinive naahala ukhwanyulaciya.” Masi yaaherannya itthu yootikhiniha. Atthu o Niinive yaahottharuwa, mpaka a mwennyaayo yaheera co: “Nttwee ninlepele Nluku wiira anilevelele. Atthunaka uyo khanhala uniiva. Ukati Yehova onnyaawe wiira atthu o Niinive yahottharuwa, aaholakela uhikwanyulaca isittattiiyo.
Nlattu wo iyo itthwiiyo Jonas ahoriipiya nrima cinene. Uyo khaakhitinri waapisera nrima atthu o Niinive, khampa uyo aapiseriyaawe nrima ni Yehova. Uhiya commo uyo ahokhuma nsittattimmo ni aahorwa wunkoma wamwirini mwankaani wootthavelanaca. Vano mwamwiriiyo wahooma, ni iyo ittwiiyo yahotepihaca Jonas urusiya. Vano Yehova ahomwiitthuciha Jonas itthu yo fayita cinene amwiirelaka co: “Weeva ohokhitiri woonela utthunku ula mwaamwiryuula ni uhoorusuya cinene wuuma waya. Khunaamini wiira atthu o Niinive ahaana ifayita cinene uvikana ula mwamwiryuula?”
“Yehova khampicapica upanka ikhuluvelihalyaawe, kahi toko atthu akiina cinoopuwelayaaya, masi uyo nawuuvilelani, kontha khaavo ntthu nompheelaawe umoona atankanyiyaka, masi nawiira uweherera wiira atthu otheene arukunuse mirima caya.”—2 Peturu 3:9