Moolumo yantikhiye wasirini

Unavinreene ukati, Belsazar ahokhala mwene o Babilooniya. Nkwaha mmoca uhiyu, uyo ahotthenkaca ifesta ni ahaalattula atthu yaarina ifayita cinene u Babilooniya. Ni uyo ahaaruma anantekwaawe wiira awaane ikoopu co iwooru athumwaane amwene Nabukodonosor yaakumihilyaaya ntempuluni wa Yehova. Belsazar ni atthu yaalattunlyaawe yahopacera uwurerya nyo ikoopunyo yaattottopelaka anlukwaaya. Vano, wootutusera, isaala yaamakiyeeyo naahokhumela ntata nantthu! Ni nno ntatanno nahopacera wantikha wasirini va moolumo ootikhiniha.

Belsazar ahoova cinene. Uyo ahowiihana anamacuwelacaawe ni aheerela co: “Ntthu nohala ukhitiri utaphulela ala moolumwaala naahala ukhala nkhulupale oneeraru ni nohala ukhala ntthu ofayita cinene o Babilooniya wotheene.” Anamacuwelaca otheene wamoca ni anahako aamwennyaayo yahomananiha utaphulela, masi khaavo akhitinri. Vano, apwiyamwennyaayo yaheera co: “Haavo nlopwana mmoca neehaniya Daniele, uyo antaphulelaka citthu caalohaaya amwene Nabukodonosor. Ni ciicammo uyo pooti utaphulela ala moolumwaala.” Vano amwennyaayo yahomwiihaniha Daniele.

Ukati Daniele waawilyaawe, amwene Belsazar yaahomwiirela co: “Daniele wakhitiri utaphulela itthu inhimyaaya ala moolumwaala kinaahala wuuvaha ikolaare yo iwooru ni kinaahala wuupanka nkhulupale oneeraru ni nlopwana ofayita cinene u Babilooniya wotheene.” Vano Daniele ahaakhula eeraka: “Pooti uhalana citthu cinyunyo, masi kinaataphulela itthu inhimyaaya ala moolumwaala. Athumwaninyu Nabukodonosor yaari nlopwana owiittottopa, masi Yehova aahowiitthuciha itthu yofayita cinene. Uhookhalaru commo, nyuuva nhocuwela citthu cotheene ciirannyeele, masi nhowurerya nipha ikoopu co ntempulu wa Yehova. Vano Yehova horusiya cinene. Phimaana, rumilyaawe nna ntatanna wiira nantikhe ala moolumwaala va, aneera Mene, Mene, Tequel ni Parsim. Ala moolumwaala antaphulela wiira u mwene wo Média ni wo Persiya unaahala utuphela u Babilooniya ni nyuuva amwene nnaahala waakhiya umweneenyu.

Isittatti yo Babilooniya yaatekiye ni isiri yoorekama ni yowaatapuwa ni ciicammo iyo isittattiiyo yaarukureriye ni mooloko wowiisya. Phimaana, atthu otheene yoopuwela wiira khaavo aahala ukhitiri utuphela u Babilooniya. Masi nenno nihuku naapankiya ifestanno, anakhotto o Média ni o Persiya yahotuphela isittatti yo Babilooniya. Mwene o Persiya eehaniya Siiru aahohapusa moolokooyo. Vano, khawaarikenle anakhottwaayo uphiya mpaka wankhorani va. Ukati waaphilyaaya, mikhora cotheene caari coohuliyeene! Anakhottwaayo yaahokela ni yahaakeelela isittatti yo Babilooniya, yaaheviya amwene Belsazar. Vano Siiru aahokhala mwene o Babilooniya.

Uvira waya mwaakha mmoca, Siiru aaholalya eeraka co: “Yehova hokiruma wiira kalokihace itempulwaawe u Yerusalemu. Ni ayuuta ampheela ukavihera pooti urwaa. Khampa Yehova aakhuluvelihilyaawe, ayuuta enci yahoturuwela uwaani cinavinre myaakha 70 Yerusalemu nakwanyulaciyeene. Siiru aahoturusela ikoopu co iwooru ni coparaata ni citthu cotheene amwene Nabukodonosor yaakumihilyaaya ntempulu wa Yehova. Nhoona mananna Yehova anvarenlyaawe nteko Siiru wiira aakavihere ayuuta?