Yesu nari mwammirawo

Yusufu ni Maria wamoca ni Yesu yakhalaka u Nazaree nkhayi ni asaanaaya akhwaawe. Yusufu aavara nteko weekalipinteeru, ni anwiitthuciha amucyaawe myaha ca Yehova ni malamulwaawe. Imuci ya Yusufu khayaacompa usinakoka wiira yanswalele Nluku, ni khula mwaakha yanrwaa u Yerusalemu weetta ifesta yo Paasikuwa.

Ukati Yesu aarinaawe myaakha 12, uyo ni amucyaawe yahorwaaca u Yerusalemu khampa yaalemalenlyaaya. Nlattu wo Paasikuwa isittattiiyo yahocara atthu. Ukati Paasikuwa waamanlyaawe, Yusufu ni Maria yahopacera weetta nkhwaha arwaaka uwaani. Ni yoopuwela wiira Yesu aari nkhayi naayo. Masi ukati yaapacenryaaya unwehaweha, khayaamonne.

Vano, Yusufu ni Maria yaahoturuwelaca u Yerusalemu ni yaahovirihaca mahuku mararu amwaavyaka Yesu, masi khayamphwanyile. Vano yaaholakela urwaa utempulu. Ni nwo yahomphwanya nonkomile iriyari yaatthu yeetthuciha malamulo, aviriyanaka citthu ceetthucihaaya ni aakohaka citthu caatikhiniha. Atthu yeetthuciha malamulo, yaahokhala ootikhinihiya ni Yesu ni mpaka yahopacera unkohakoha. Ni yantepa ukhala ootikhinihiya ukhala wiira Yesu anaakhula khampa yaaphulaaya. Ayo yahoona wiira Yesu ancuwela sana-saana malamulo a Yehova.

Yusufu ni Maria yahosanka cinene. Mpaka Maria ahonkoha Yesu amwiirelaka co: “Mwanaka, hi khanimala uwaavya mapuro menci, Waari vayi?” Vano Yesu ahaakhula eeraka co: “Khannocuwela wiira miiva kihaana kikhalaka mpaani Waapaapa.”

Yesu ahoturuwela u Nazaree naasithumwaane. Yusufu aahomwiitthuciha Yesu nteko weekaripinteeru. Yesu aahoonuwa ni antepa ukhala oocuwelaca cinene. Atthu enci a naacivela cinene Yesu ni Yehova antteeliha cinene nlattu wo citthu Yesu apankaawe. Nnaacuwela mananna Yesu aryaawe?