Yesu nanvoniha ntthu oohoona

Mafariseu yaananlupattha Yesu, phimaana yaanaapanka khula itthu wiira amootherye itthu ni antthuke. Ayo yahohimya wiira Yesu khaalamuliya unvoniha ntthu isaapatu, vano isaapatu nimoca, Yesu ahomoona ntthu oohoona alepelacaka nsurukhu. Vano aheerela attharyaawe wiira anaahala unvoniha niikuru ca Nluku. Vano, Yesu ahosuwela itthaya ni ahonttikittela mmeethoni wawe ule nlopwanoole ni ahomwiirela co: “Urwee ni wakhuce itanki yo Silowe.” Ukhuca wawe ahopacera woona, uyo khoona ikhumelo nenne iyareliyo.

Atthu enci yahotikinihiya cinene ni yaaneera ula khanakhala nlopwana ayariye hoonakoole. Vano uyo anaakhula eeraka thi mi. Vano yaanankoha mananna civonilyaawe. Ukati waahimyaawe mananna caakhitinryaawe woona, atthwaayo yahonrweeha wo mafariseu.

Vano nlopwanooyo ahaahimerya mafariseu mananna caavonihiyaawe nne nihuku no isaapatunne. Nlamulo na Nluku naahimya wiira khaavo aalamuliya uvara nteko Isaapatu. Phimaana, mafariseu akhwaawe yeera co: “Uneera Yesu oovonihile isaapatu? Woonakanwo, ikuru cawennyo khacinwela wa Nluku. Masi mafariseu akhwaawe, yeera Yesu akhitiri waavoniha atthu kontha Nluku ananvaha ikuru.

Mafariseu yahowiihanaca asitthumwaane nlopwanooyo ni yahaakohaca mananna caavonilyaawe mwanaya. Asithumwaane yaanoova cinene kontha khayaapheela woomoliya ule ncokoole. Thimaana, yenre khaancuwela mananna caavonihiyaawe mwanaya. Vano, mafariseu yahovira enkohakohaka nlopwanooyo. Uyo ahaakhula co: “Mi kihoohimeryani mananna kivonnyaaka, masi nyuuva khamuntthuna ukupali.” Mafariseu yahorusiya ni yahomoomola nlopwanooyo.

Yesu wiiwa wawe itthu yaamwiiranyeenele ule nlopwanoole ahorwa umuulumana. Uyo ahonkoha co: “unankupali Mesiya?” Nlopwanooyo ahaakhula: “Pwiiya, Mesiya tipani?” Yesu aheera: “Mi ki Mesiya!” Yesu ari ntthu ooreera nrima, keera? Uhiya unvoniha paahi ule nlopwanoole, uyo ahonkavihera ukhalana waamini.