Mahumu ankavihera manannani nloko?

Mphwinkweehu khanirina mahooleli anliviya nsurukhu. Nittharihelelaka ntakihero no makristau oopacera, ahooleli oophwanela anaathanliya ‘wiira yeettihere saana nloko na Nluku.’ (Miteko 20:28) Ayo mahumu oocuwelacaayo ni ookhalana makhalelo omaana nhina mminepani, anaahoolela nloko ni anaweettihera saana nikhoto ‘woohikhanyererihiya, masi yooniheraka untthunela Nluku ninrimaaya wotheene, woohinyonkaca, masi yaciveliyaka.’ (1 Peturu 5:1-3) Isiyani impankaaya hiiva inniphwaanyiha ifayita?

Ayo anaaniwacera ni anaanikhikicera. Mahumu anaweettihera ni anaakavihera ukhikicera nloko nhina mminepani. Ukhala wiira Nluku phaathanlile uvara ula ntekoola, ayo khaanaahuviha mayamunnaaya o wanlokoni, uhiya commo ayo anaanikavihera ukhala saana ni uphwanya utteeliya. (2 Akorintu 1:24) Toko vaavale makampuci waneekurumicaawe uwacera ikhonthwa cawe, mahumu ciicammo anawaavya waacuwela mayamunnaaya otheene o wanlokoni.—Miruku 27:23.

Ayo anaaniitthuciha inanna yoopanka ile inoncivela Nluku. Khula isumana, mahumu anaahoolela mikutthaano wiira alipihace waamini wihu. (Miteko 15:32) Ala mayamunna owiivahereraala ciicammo anaavaha ntakihero nomaana nhina muulalyeerani, yakhalaka wamoca ni hiivano ni yanilakiheraka uvara saana uyo ntekooyo.

Ayo ananlipiha khula ntthu o wanlokoni. Wiira alipihace waataana wihu ni Yehova, mahumu anaanithotola mmawannyihu awula Usalau yo Umwene wiira anikavihere nakhala wiira ninaarikarikiya ni animaalihe yavarelaka nteko Ibiiblya.—Tiyaku 5:14, 15.

Kahi paasi ukavihera nloko, mahumu enci anaavara miteko ni anawiikurumica utafiti itthoko caya. Ala mayamunna owiikurumicaala unawaaphwanela khweeli uhisiminya.—1 Atesalonika 5:12, 13.

• Isiyani mahumu impankaaya wanlokoni?

• Mahumu anoonihera cani wiira anaaniwacera otheene cihu?