MPANTTA 21

Ipeteli isiyani?

Masaahiti a Yehova eeli yavaraka nteko nipuro nimpankiya maphinto u Peteli — Nipuro nimpankiya maphinto, EUA.

Saahiti a Yehova avaraka nteko wo wimpirimiri ilivuru u Peteli yo Alemanha — Alemanha

Saahiti a Yehova avaraka nteko nipuro ninkatthiya ikuwo u Peteli yo Quénia — Quénia

Atthu yathotokanihacaka iyoolya nipuro ninlyalyaaciya u Peteli yo Colômbia — Colômbia

Ipeteli ninkhala ncina niiluuka iheperewu ni maanaaya wiira “inupa ya Nluku.” (Uphattuwaca 28:17, 19, niwehero.) Nna ncinanna ninaaphwanela kontha ninhimya inupa cuulupale citekilyaaya Masaahiti a Yehova cimphwanyannya nlaponi motheene wiira athotokanihe ni akavihere nteko woolalyeera khula ilapo. Mphwinko wo Mahumu Unhoolela unkhala nipuro ninhooleliya miteko co Masaahiti a Yehova nlaponi motheene, u Estado de Nova York, EUA, ni ikhumelo wonwo uyo mphwinkooyo unaawehaweha miteko cinvariya mmapeteli ntuninyani motheene. Ale anvara miteko u Peteli ankhala toko amuci, ukhala wiira ankhala ni anvara miteko nkhayi, anlya nkhayi ni ansoma Ibiiblya nkhayi.—Isaalimu 133:1.

Nipuro nootepa uttitthima ni nowiivahereriya ninrima wotheene. Makristau alopwana ni athiyana anvara miteko u Peteli, otheene caya ahiivaherera ukati wotheene upanka ile impheelaawe Nluku ni ukavihera miteko co Umwene. (Matewus 6:33) Khaavo ntthu nopokera nsurukhu, masi otheene anawaavyeriya nipuro noorupa, iyoolya ni anaakaviheriya uthuma citthu cikhwaawe cinkavihera ukumyaaya. Khula ntthu naathanleliya mphantte woopheela uvara nteko toko: nipuro ninvariya miteko cowantikhaciya, unaapyaaciya, unlyalyaaciya, umpankiyaaya ilivuru, unkatthiya ikuwo, ulokihaca iPeteli ni miphantte cikhwaawe.

Nipuro ninvariya miteko cinkavihera nteko woolalyeera wo Umwene. Itthu impheeliya khula Ipeteli urii umwarusela ikhweeli yo mbiiblyani nlaponi motheene. Ila ibroxureela inaathoonyera iyo. Ila ibroxureela yantikhiye ni Mphwinko wo Mahumu Unhoolela, phiveleelihiyaka ivareliyaka nteko ikomputatore mapuro menci antaphuleliya ilivuru cihu amphwanyannya ituninya yotheene, wowaakulela, phimpirimiriyaka mmakhula iPeteli cirina maakina moolupale owimpirimiri, womalihera phiveleelihiyaka mmalokoni 120.000. Ukati wotheene unvira wavariyaka nteko woopankiya ilivuru, amuci o Peteli anaakavihera cinene nteko muulupale ukhanle: ulalyeera ihapari comaana.—Markus 13:10.

Taapani anvara miteko co Peteli ni ayo ankaviheriya cani?
Miteko cinvariya khula iPeteli cinkavihera ntekoni muulupale?