Miteko cinvareehu nlaponi motheene cincankiya cani?

Mphwinkweehu unaakumihera ni unaakawa khula mwaakha Ibiiblya imiliyau cene ni ilivuru cikiina woohiliviha hatiitthu. Ciicammo, mphwinkweehu unaateka ni unaalokihaca Isalau co Umwene ni iPeteli. Unawaakavihera atthu enci anvara miteko u Peteli, mamisiyonaariyu ni unaakavihera yakhumelelaka ihasara. Pooti nyuuva wiikohaka co: ‘Nsurukhu unvareliya nteko unkhuma vayi?’

Miteko cihu khaninliviha, khaninlepela idiizimu ni khaninviriha iphace nilepelaka nsurukhu. Unookhalaru wiira miteko cihu cinvareehu cinaarika nsurukhu mwinci, hiiva khaninlepelaca nsurukhu. Toko inhimyaaya irevisteehu Ukhalenla yonayeeli, ikumiheriye iseekulu ivinre, hiivano ninaakupali wiira Yehova phinnikavihera ni “khaninhala hataa vakaani waalepela apinaatamu wiira akavihere ntekweehu”— ni khaninatoko upanka iyo!—Matewus 10:8.

Miteko cihu cinkaviheriya ni micanko coohikhanyererihaninya. Atthu enci anaalemeliha cinene nteko unvareehu wo wiitthuciha Ibiiblya ni ayo anaacanka wiira akavihere. Masaahiti a Yehova naayo ciicammo anaavarela nteko ninrima wotheene ukatyaaya, ikuru caya, nsurukhwaaya ni citthu cirinaaya wiira akavihere wiirannya ile impheelawe Nluku nlaponi motheene. (1 Ikoronika 29:9) Atthu otheene pooti ucanka yahelaka mmakaaxani co micanko cimphwanyannyaaka nhina khula Isalau co Umwene, mmamithukumanoni ni mmakonkreesuni. Ciicammo unawoorannya ucanka nsayitini wihu jw.org. Micanko cinci cimpankiyaka naatthu oohikhalana mihakhu. Ayo atthwaayo ampanka toko athiyana amoca nankhweeli oohuva yaattottopeliye ni Yesu nlattu woocanka nnupani ya Nluku nsurukhu vakaani waarinaaya. (Luka 21:1-4) Coo, khula ntthu pooti “weesa itthu mphanttyaayaru” wiira avahe “toko cilakenlyaawe wanrimani wawe.”—1 Akorintu 16:2; 2 Akorintu 9:7.

Hiivano ninaakupali wiira ale ampheela ‘unttitthimiha Yehova ni citthu cofayita cirinaaya’ Yehova Nluku khanhala uhiya waapankiha micanko wiira akavihere nteko wo Umwene ni wiirannya ile impheelaawe.—Miruku 3:9.

• Manannani mphwinkweehu unvirikanaaya ni ittiini cikhwaawe?

• Cinvareliya cani nteko micanko ninaakheleehu?