Ibibliyoteka yo Nsalau yo Umwene inhala unikavihera manannani?

Nnaapheela utotha citthu ciri mbiiblyani wiira muncerere ucuwelaca winyu myaha co mbiiblyani? Waanoocivelani wuncerera ucuwela itthu inhimyaaya iversiikulu awula ihantisi yantthu o mbiiblyani? Ucuwela nipuro awula itthu ikhwaawe iromoliye mbiiblyani? Nhotoko wiikoha wakhala wiira Nuulumo na Nluku pooti wuukaviherani itthu yuusankihileni? Wakhala commo, nvarele nteko ibibliyoteka yo Nsalau yo Umwene.

Ihaana ikaruma comaana cinkavihera utotha myaha. Pooti ukhalaka wiira nyuuva khanrina ilivuru cotheene co Masaahiti a Yehova co iluuka nnoolumeenyu. Masi ibibliyoteka iri Nsalau yo Umwene ihaana ilivuru cinci cinkumiheriya mahukwaala. Ciicammo atthunaka cihaavo Ibiiblya cootaphuleliya naatthu akhwaawe, itisiyonaariyu ni ilivuru cikhwaawe cinkavihera utotha myaha. Nhoovelele uvarela nteko ibibliyoteka yo nsalau, uhinaaya upacera nkutthaano awula unamanle. Pooti ukhalaka wiira ihaavo ikomputatoore irina Watchtower Library (Biblioteca da Torre de Vigia). Iyo ikhanle iporokarama cimphwanyannyaaya ilivuru cihu cinci, ni khinrika uvarela nteko, uphwanya mwaha, moolumo awula iversiikulu yo mbiiblyani.

Inawaakavihera ale ampanka miphantte unkutthaanoni Vida e Ministério Cristãos. Ibibliyoteka yo Nsalau yo Umwene inaahala wuukaviherani utthenkaca miphantte cinhaleenyu uthanliya upanka. Humu nohoolela mikutthaano Vida e Ministério Cristãos phinvahiya uwehaweha ibibliyoteka yo wanlokoni. Uyo humuuyo naawehaweha wakhala wiira ilivuru cikumiheriye naanaano cinaaphwanyannya mbibliyoteka ni wakhala wiira ciri coothotokanihiya saana. Nyuuva pooti unlepela uyo humuuyo awula ntthu noofunttani Ibiiblya wiira ookavihereni ucuwela inanna yoophwanya inhaleenyu upheelaca. Masi cinaakhottihiya ukusa uwaani ilivuru co mbibliyoteka. Uhiya commo, cihaana uvareliya nteko ratta ilivurunnyo ni woohantikhaca.

Ibiiblya inaahimya wiira napheelaka uphwanya “ucuwelaca wa Nluku,” nihaana niikurumicaka waavya “toko mihakhu coovithiya.” (Miruku 2:1-5) Ibibliyoteka yo Nsalau yo Umwene inaahala wuukaviherani upanka iyo.

• Ikarumani cinkavihera utotha myaha cirivo ubibliyoteka yo Nsalawiinyu yo Umwene?

• Tipani nohala wuukaviherani uvarela nteko ratta ibibliyoteka yo nsalau?