Kontha Isiyani Nluku Inhiyaawe Cikhumelelaka Cootakhala ni Uhuva?

1. Cikhumelenle cani cootakhala?

Cootakhala cipacenree watuniyani ukathi Sotwani wancalyaawe wootha.Wuupaceroni aari nlaikha nomaana, masi “khakhitinri weettela ikhweeli.” (Joau 8:44) Nswaleliya Nluku paahi, masi Sotwani nahomuunuwa nttima noopheela uswaleliya. Sotwani ahomoothacera nthiyana oopacera eehaniya Hawa, ula ahokhitiriya uthepiya ni ahohiya umwiwelela Nluku. Atamu ahotakaneela ni Hawa uhiya umwiwelela Nluku. Uthanla wa Atamu uhowaana uhuva ni ukhwa.​—Usome Uphattuwaca 3:1-6, 19.

Ukathi Sotwani wanthepenryaawe Hawa wiira ahiye umwiwelela Nluku, uyo ancera utapanana Umwene wooverihela wa Nluku, awula, Ukhulupale wa Nluku. Toko cipankalyaawe Sotwani, atthu enci ahonkhotta Nluku ukhala Nhoolelyaaya. Coo, Sotwani hokhala “nhooleli otuniya.”​—Unsome Joau 14:30; 1 Joau 5:19.

2. Cowumpiya ni Nluku cahaana ipahuwa?

Miteko ca Nluku coothene khacipahuwale. Apinaatamu ni malaikha Nluku yumpalyaawe yaanaakhitiri umwiwelela wooreereene. (Deuteronomiyu 32:4, 5) Wanumpalyaawe honihiya uthanla upanka yooreera awula upanka yootakhala. Unihiyawawe nithanlaka, ninaakhitiri unthoonyera nifento Nluku.​—Unsome Tiyaku 1:13-15; 1 Joau 5:3.

3. Kontha isiyani Nluku inhiyereraawe uhuva?

Ukathi vakani, Yehova naahiyerera utapananiyaka ukhulupalyaawe. Kontha isiyani? Mpheela uthoonyera wiira ikuvernu caapinaatamu khacinkhitiri veekhacaya waavaha ifaita atthu. (Eklesyaste 7:29; 8:9) Uvirawaya myaakha 6.000 co ihantisi yaapinaatamu, iyo iheethoonyihera ukhala ikhweeli. Ikuvernu khacikhitinri umaliha ikhotto, ikhirini, uhuvihana awula iretta.​—Unsome Jeremiya 10:23; Arooma 9:17.

Uvirikana ni ikuvernu caapinaatamu, ikuvernu ya Nluku inawaavaha ifaita ale anaamineela. (Isaiya 48:17, 18) Woohipica, Yehova naarwaa umaliha ikuvernu coothene cirivo. Atthu anthanla uhooleliya ni Nluku paahi phinrwaa ukhala watuniyani vaava.​—Isaiya 11:9. Unsome Daniele 2:44.

4. Uvilela wa Nluku unnivaha ukathi woopanka isiyani?

Sotwani himyalee wiira khaavo nohala unswalela Yehova ni nifento. Weeva waanoocivela umoothiha ihimyalyaawe? Weeva unaakhitiri! Uvilela wa Nluku unnithoonyihera wiira nihana ukathi wowoonihera khampa nirii mphantte wo ikuvernu ya Nluku awula ikuvernu caapinaatamu. Inthanleehu ninhala woonihera ni makhalelweehu okhula nihuku.​—Unsome Jó 1:8-12; Miruku 27:11.

5. Manannani cinhaleehu ukhitiri unthanla Nluku ukhala Nhooleliihu?

Ninaakhitiri unthanla Nluku ukhala Nhooleliihu natothaka ucuwela uswali weekhweeli unoonannyaa nnuulumoniwawe, Ibiiblya, nuuttharelela inhimyaaya. (Joau 4:23) Hiivano pooti unkhotta Sotwani ukhala nhooleliihu nanyemaka isiyasa awula ikhotto, toko Yesu cihimyalyaawe.​—Unsome Joau 17:14.

Sotwani nawiikurumica umwarusela ntuniyani usece ni makhalelo makhwaawe oohiloka. Nakhottaka upanka cila, asipatthaniihu awula amuciihu pooti uhala unitarawa awula unithunanela. (1 Peturu 4:3, 4) Coo nihaana nithanlaka. Ninhala weetta ni atthu onfenta Nluku? Ninrwaa wiwelela malamulo oocuwelaca ni onifento a Nluku? Napankaka iyo, ninaahala uthoonyihera wiira Sotwani ahootha ukathi weeralyaawe wiira mmasakhani khaavo aahala upanka yoncivela Nluku.​—Unsome 1 Akorintu 6:9, 10; 15:33.

Nifento nirinaawe Nluku naapinaatamu, ninlipihera wiira cootakhala ni uhuva cikhanlee citthu cinrwaa umala. Ale anhala wiithoonya wiira anaakupali ila phanrwaa ukhala watuniyani mpaka.​—Unsome Joau 3:16.