Itthokwaa Inhala Ukhala Cani Yootteeliya?

1. Ikhanlee itthu yuulupale uthelana woocuweliya munlamuloni wiira itthoko ikhale yootteeliya?

Yehova, Nluku ohapari comaana, uyo khanlee Nluku ootteeliya ni naapheela wiira watthokoni oothene akhale ootteeliya. (1 Timotiyu 1:11) Uyo phikhumelelihale uthelana. Uthelana woocuweliya munlamuloni irii itthu yuulupale wiira amuci akhale ootteeliya kontha inawaakavihera oothelana ni asaanaaya akhalaka woolipa. Makristau ahaana ahisimaka malamulo onlaponiwaya anaaca uthelana woocuweliya ni ikuvernu.​—Unsome Luka 2:1, 4, 5.

Nluku noonela cani uthelana? Uyo mpheela wiira nlopwana ni nthiyana akhaleke wamoca woohihiyanaca. Yehova mpheela wiira nlopwana ni nthiyana oothelana akhaleke owaaminana. (Maberewu 13:4) Uyo unrusa umwalanaca. (Malakiya 2:16) Masi nawaahiya makristau umwalana wakhumelelaka uluva, ni pooti uthela awula utheliya ni ntthu nkina.​—Unsome Matewus 19:3-6, 9

2. Nlopwana ni nthiyana oothelana atafitaneke cani?

Yehova homumpa nlopwana ni nthiyana wiira athelaneke ni akhaleke ookaviherana. (Uphattuwaca 2:18) Ukhala wiira nlopwana phinhooleli otthoko, uyo phinaavya coopheela waakhalihera amuci watthokoni ni phinaasomiha myaha ca Nluku. Uyo haana waathoonyera nifento neekhweeli amwaarawe. Nlopwana ni nthiyana oothelana ahaana ufentana ni uhisimana. Ukhala wiira nlopwana ni nthiyana atthu oopahuwa, wiitthuca ulevelelana unaawana utteeliya watthokoni.​—Unsome Efesu 4:31, 32; 5:22-25, 33; 1 Peturu 3:7.

3. Nlattu woohitteeliya nhina muuthelanani, yooreera yakookhala uhiyanaca?

Wakhala wiira weeva ni ntthu nthenlyaa nnokhala ni masankiho watthokoniwinyu nhana wiilipiherera ufentana. (1 Akorintu 13:4, 5) Nuulumo na Nluku khaninlaka wiira uhiyanaca phikhanle inanna yoorehelela masankiho ahinlova ukhumelela watthokoni.​—Unsome 1 Akorintu 7:10-13

4. Asaana, Nluku noopheelelani isiyani?

Yehova noopheelelani utteeliya. Uyo nawuuvahani ikano co mananna oolawa umiravweenyu. Unoncivela wiira mphwanyere ifaita ucuwelaca ni uttehatteha waasithumwaninyu. (Akolosu 3:20) Yehova numpale, unancivela ciicammo wiira ntteeliyeke nlattu woopanka intthunaawe uyova ni intthunaawe Mwanawe.​—Unsome Eklesyaste 11:9–12:1;Matewus 19:13-15; 21:15,16.

5. Asinnapaapa, munhala waaphwanyiha cani utteeliyaasaaniinyu?

Nhaana mwiikurumicaka wiira asaaniinyu aphwanye iyoolya, inupa ni ikuwo. (1 Timotiyu 5:8) Masi mwaapheelela utteeliya nhana mwaasomihaka unfenta Nluku ni weetthuciha citthu cawe. (Efesu 6:4) Mathoonyiherweenyu oonfenta Nluku pooti waavara nrima asaaniinyu. Yakhalaka wiira meetthuciherweenyu nnokhumana nnuulumoni na Nluku, asaaniinyu anaahala ukhalana ankhili ootthuniya.—Unsome Deuteronomiyu 6:4-7; Miruku 22:6.

Asaanaa anaahala woona ifaita waasovenrihaka ni waattottopelaka. Anaapheela uhinhiya nuuhimeeriya. Meetthucihero toko ala anawaakihera asaanaa wiira ahikhalane moopuwelelo yaahala uhaakhaliha ootteeliya. (Miruku 22:15) Masi wowaahimeerya khamunlamuliya waahuviha awula waatulumu.​—Usome Akolosu 3:21.

Masaahiti a Yehova anaakumihera ilivuru co khula inanna cinantikhiya wiira caakavihere asinnapaapa ni asaanaaya. Ilivurucenennyo cinlipihera Ibiiblya.​—Usome Isaalimu 19:7, 11.