Nluku hopattusa irimu ni ituniya

Yehova Nluku phinipattusile. Uyo phipattusile citthu cotheene cirivo, cinkhitiriihu woona ninnye nihinooneehu. Woopacera Nluku ahopattusa malayikha menci. Weeva unaacuwela malayikha? Malayikha akhanle nnepa anlikana ni Nluku ni ankhala wiirimu, hiiva khaninkhitiri woona malayikha toko nihinkhitiriihu umoona Nluku. Nlayikha Yehova aapacenryaawe wumpa nahonkavihera. Nno nlayikhanno nankavihenre ukati apattusaawe itthonttwa, iplaneta ni citthu cikhwaawe. Nhina nnyo iplanetannyo, inhela nhina ila ituniya ninkhaleehwiila.

Yehova hotthenkaca ila ituniyeela wiira inama ni apinaatamu akhitiriki ukhala. Yehova hopanka ncuwa wiira nimwaleele ituniya. Nuuwakatyaaya, uyo ahompa myaako, ipahari ni myooloko.

Isiyani yaakhumelenle-tho? Yehova aheera: “Kinaapattusa malasi ni miri.” Ni caheema mihokorokho coovirikana. Ciicammo yaahomela makukhu ni ifuloore ituniya yotheene. Nuuwakatyaaya Yehova ahopattusa inama cotheene, toko asaanuni, ihopa ni inama contakhwani, uyo ciicammo ahopattusa inama cankaani toko hukula, ni inama cuulupale toko itthepo. Weeva cinawuucivela inama? Inamani inoocivela?

Vano Yehova aheerela nlayikha noopaceranno co: “Nttwee nimpanke pinaatamu wiira akhale watuniyani.” Masi uyo naahala uvirikana ni inama, kontha uyo naahala ukhitiri upanka citthu, wuulumaca, uthyaa ni umlopa Nluku. Ayo ciicammo anaahala uwacera ituniya ni inama. Nyuuva nnaacuwela ncina nanlopwana oopacera? Nttwee noone.